O‘zbekiston aholisining qariyb 40 foizi o‘tgan yili pul jamg‘armagan. Bu haqda Markaziy bankning Osiyo taraqqiyot banki ko‘magida o‘tkazilgan so‘rovnomasi natijalarida keltirilgan.
Miqdoriy tadqiqot 2025-yilning yanvar—fevral oylarida olib borildi va unda mamlakatning 6 ta hududidan (Qoraqalpog‘iston Respublikasi, Qashqadaryo, Farg‘ona, Samarqand, Jizzax viloyatlari va Toshkent shahri) 1200 nafar aholi ishtirok etdi.
So‘rovda ishtirok etganlar tarkibi quyidagicha bo‘lgan:
- yashash joyi bo‘yicha: qishloq hududlari — 45 foiz, shaharlar — 55 foiz;
- yoshi bo‘yicha: 45 yoshgacha — 58 foiz, 46-60 yosh — 24 foiz;
- jinsi bo‘yicha: ayollar — 60 foiz erkaklar — 40 foiz;
- ta’lim darajasi bo‘yicha: oliy ma’lumotlilar — 15 foiz, umumiy o‘rta ma’lumotlilar — 33 foiz, o‘rta maxsus ma’lumotlilar — 45 foiz.
Sifatli tadqiqot esa 5 ta hududda o‘tkazilgan (Xorazm, Andijon, Surxondaryo, Buxoro viloyatlari va Toshkent shahri) fokus-guruhlarni qamrab oldi va 2024 yil noyabr-dekabr oylarida amalga oshirilgan. Ushbu so‘rovnomada 75 nafar ayol, 42 nafari yoshlar va 32 nafari qishloq aholisi bo‘lgan jami 198 nafar ishtirokchi qatnashdi.
Hududlar ijtimoiy-iqtisodiy rivojlanish darajasi (agrar, sanoat, kam rivojlangan, shahar markazi) dan kelib chiqqan holda tanlab olindi. Tadqiqot maʼlumotlari “Ekspert fikri” ijtimoiy-iqtisodiy va marketing tadqiqotlari markazi tomonidan yuzma-yuz suhbatlar orqali yig‘ildi.
O‘zbekistonda pul jamg‘arish xulq-atvori hudud, ta’lim darajasi va bandlik holatiga ko‘ra aniq farqlarni namoyon etgan.
Respondentlarning katta qismi (39 foiz) o‘tgan yilda umuman pul jamg‘armaganini ma’lum qilgan. Toshkent shahrida so‘nggi 12 oy ichida mablag‘ yig‘magan qatnashchilar ulushi 25 foiz ni tashkil etgan bo‘lsa, Qoraqalpog‘istonda bu 54 foiz — eng past ko‘rsatkichga yetgan.
Oliy ma’lumotlilarga qaraganda faqat 8-9-sinf ma’lumotiga ega bo‘lganlar orasida pul jamg‘armaslik ko‘rasatkichi yuqori bo‘lgan — 53 foiz. Eng faol jamg‘aruvchilar talabalar bo‘lgan. So‘nggi bir yilda umuman jamg‘armaga ega bo‘lmaganlar ulushi nafaqaxo‘rlar orasida 46 foizni tashkil etgan.
Izoh (0)