Xorazm viloyatida giyohvandlik vositalarining yashirin aylanmasiga qarshi bojxona organlari tomonidan tizimli tarzda kurash olib borilmoqda, deb xabar beradi viloyat Bojxona boshqarmasi matbuot xizmati.
Ma’lum qilinishicha, Xorazm viloyati Bojxona boshqarmasi xodimlari DXX va IIB xodimlari bilan hamkorlikda “Urganch xalqaro aeroporti” yaqinida tezkor tadbir o‘tkazgan.
Tadbir davomida O‘zbekistonga uchib kelgan fuqaro S.A. tomonidan konfetlar orasida yashirincha olib kelingan 10 dona polietilen paketchada og‘irligi 175 grammga teng bo‘lgan geroin hamda 16 dona polietilen paketchada og‘irligi 405 grammga teng bo‘lgan gashish giyohvandlik vositasini fuqaro M.A. qabul qilib olayotgan vaqtida ashyoviy dalillar bilan qo‘lga olingan.
Hozirda mazkur holat yuzasidan jinoyat kodeksining tegishli moddalari bilan jinoyat ish qo‘zg‘atilgan.
Giyohvand moddalar savdosi
Bundan oldin Toshkent viloyatida tojikistonlik shaxs salkam 11 kg gashish giyohvand moddasi bilan qo‘lga tushgani, Buxorodagi xonadonda Afg‘oniston fuqarosiga tegishli 54 kg giyohvand modda ko‘mib qo‘yilgani aniqlangani, Qoraqalpog‘iston, Samarqand va Namanganda giyohvand moddalarni mamlakat hududiga olib kirgan shaxslar qo‘lga olingani to‘g‘risida xabar berilgandi. May boshlarida Surxondaryo viloyati bojxona boshqarmasi tezkor tuzilmalari tomonidan o‘tkazilgan tadbir natijasida O‘zbekistonga sintetik giyohvandlik vositalarining anor sharbatlari orasiga yashirib olib kirilishining oldi olingan edi.
Izoh (0)