Davlat xavfsizlik xizmati tomonidan Samarqand va Toshkent viloyatlari bojxona va ichki ishlar boshqarmalari bilan hamkorlikda o‘tkazilgan tadbirda 4 kilodan ortiq narkotik moddalarning aylanma savdosiga chek qo‘yildi. Bu haqda O‘zA xabar berdi.
Samarqandda o‘tkazilgan tadbirda Samarqand–Qoraqalpog‘iston yo‘nalishida harakatlanib ketayotgan Cobalt salonida 992 gramm “opiy” moddasi borligi aniqlangan. Mazkur narkotik moddani to‘rtko‘llik xaridorlarga sotgan samarqandlik fuqarolardan birining xonadonidan 767 gramm “gashish” moddasi protsessual tartibda rasmiylashtirib olingan.
Boshqa bir holatda, Urgut tumanida harakatlanayotgan Matiz to‘xtatilib, ko‘zdan kechirilganda, undagi yo‘lovchining yonida 500 gramm “opiy” moddasi borligi aniqlangan. Bulung‘ur tumanida o‘tkazilgan tadbirda esa Samarqand—Namangan yo‘nalishida harakatlanayotgan Cobalt’da yo‘lovchi sifatida ketayotgan shaxsyonida 978 gramm “gashish” moddasi topilgan.
Toshkent viloyatida o‘tkazgan tadbirda Andijon viloyati Paxtaobod tumanida yashovchi shaxs boshqaruvidagi Cobalt motor qismiga yashirib qo‘yilgan 951 gramm “gashish” giyohvandlik vositasi protsessual tartibda rasmiylashtirib olingan.
Aniqlanishicha, ushbu giyohvandlik vositalari O‘zbekistonga uchinchi shaxslar tomonidan Qirg‘iziston va Tojikistondan kontrabanda yo‘li bilan olib kelingan.
Mazkur holatlar yuzasidan fuqarolarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Mavzuga doir:
Izoh (0)