Surxondaryoda kartoshka ichiga yashirib olib o‘tilayotgan 154 kg gashish to‘xtatib qolindi

Surxondaryo viloyati bojxona boshqarmasi “Ayritom” chegara-bojxona posti xodimlari DXX Chegara qo‘shinlari harbiy xizmatchilari bilan hamkorlikda yirik miqdordagi giyohvandlik vositasining navbatdagi yashirin aylanmasini fosh qildi. Bu haqda Davlat bojxona qo‘mitasi matbuot xizmati “Daryo”ga ma’lum qildi.

Surxondaryo viloyati bojxona boshqarmasi “Ayritom” chegara-bojxona postiga qo‘shni mamlakatdan kirib kelgan yuk avtotransport vositasi O‘zbekistonda tranzit tarzida harakatlanib, Andijon viloyatidagi “Do‘stlik” chegara-bojxona posti orqali qo‘shni davlatga chiqib ketishi kerak bo‘lgan. Hujjatlarga ko‘ra, unga 533 ta qopda 22 tonnadan ziyod kartoshka yuklangan.

O‘rnatilgan tartibda ushbu transport vositasi postdagi inspeksion ko‘rik majmuasi orqali ko‘zdan kechirilganida, yuklarning rentgen tasviri bojxona xodimlarini shubhalantirgan.

Natijada, avtomashinadagi kartoshka solingan 533 ta qopning 38 tasiga 1305 dona mohirlik bilan tayyorlangan kartoshka shaklidagi o‘ramlar – giyohvandlik vositalari joylangani fosh bo‘lgan.

Mazkur o‘ramlardagi gashish giyohvandlik vositasining umumiy og‘irligi 154 kilogramm 90 grammni tashkil qilgan.

Ta’kidlanishicha, qonunbuzarlar har bir o‘ramga polietilen, nusxa ko‘chirishda foydalaniladigan qora qog‘oz va germetik skotch yordamida ishlov bergan.Hozirda yuqoridagi holat yuzasidan bojxona organlari tomonidan jinoyat ishi qo‘zg‘atilgan.

Avvalroq Toshkent viloyatida tojikistonlik shaxs salkam 11 kg gashish giyohvand moddasi bilan qo‘lga tushgani, Buxorodagi xonadonda Afg‘oniston fuqarosiga tegishli 54 kg giyohvand modda ko‘mib qo‘yilgani aniqlangani, Qoraqalpog‘iston, Samarqand va Namanganda giyohvand moddalarni mamlakat hududiga olib kirgan shaxslar qo‘lga olingani to‘g‘risida xabar berilgandi.