O‘zbekistonda taʼlimga to‘yinish yuz berayotgani sabab oliy maʼlumotli bo‘lishga qiziqish kamaymoqda. Bu haqda Oliy taʼlim, fan va innovatsiyalar vaziri Qo‘ng‘irotboy Sharipov “Daryo” muxbiriga bergan intervyusida fikr bildirdi.
Yangi o‘quv yili uchun davlat oliy taʼlim muassasalariga abituriyentlarni ro‘yxatga olish yakunlandi. Qayd etilishicha, jami 732 ming 411 nafar talabgor ro‘yxatdan o‘tgan. Taqqoslash uchun, 2020-yilda bu raqam 1 million 484 mingdan ortiq bo‘lgan. Yaʼni besh yil ichida OTMlarga hujjat topshiruvchilar soni qariyb ikki baravar qisqargan. Qo‘ng‘irotboy Sharipov bunga munosabat bildirib, mamlakatda oliy taʼlimga to‘yinish ro‘y berayotganini aytdi.
“Biz abituriyentlar soni nega kamayganini tahlil qildik. Joriy yilgi bitiruvchilar soni 15 mingtaga oshgan. O‘tgan va undan oldingi yillarda bitiruvchilar 177 mingtaga kam bo‘lgandi. Oldingi yillarda institutlarga kira olmaganlar xususiy, nodavlat oliy taʼlim muassasalariga kirib, taʼlimga bo‘lgan ehtiyojini qondirgan deb o‘ylayapman. Shuning hisobiga abituriyentlar kam. Shu bilan birga, oxirgi yillarda xususiy universitetlar ko‘paydi. Ularning ochilishi 2019-yilda boshlangan bo‘lsa, hozir xususiy universitetlar soni 71 taga yetdi. Ular ko‘paygani bozorda oliy taʼlimga kira olmay yurgan yoshlarimizning hammasini qamrab olgan. Endi bozor to‘yindi demoqchiman. Diplomga qiziqish kamayib ketayotgani tabiiy hol. Shunday bo‘ladi sekin-sekin. O‘tgan yoki oldingi yillar davomida ko‘pchilikda oliy taʼlimga kirishga qiziqish yuqori bo‘lsa-da, imkoniyat cheklangan edi. Davlat universitetlarida kvota bo‘lardi. Avvallari faqat 70 mingga yaqin talaba qabul qilingan bo‘lsa, o‘tgan yili bu son 360 mingtaga yetdi. Shuning hisobiga yildan yilga oliy taʼlimga kiradigan, oldingi yillarda o‘qishni bitirgan bolalar soni kamayyapti”, dedi vazirlik rahbari.
Maʼlumot uchun, mamlakatda 201 ta OTMlari faoliyat yuritmoqda. Shundan 90 tasi Toshkent shahrida, qolganlari Qoraqalpog‘iston Respublikasi va viloyatlarda joylashgan.
Izoh (0)