Qoraqalpog‘iston Respublikasi bojxona boshqarmasi tomonidan “Dovut-ota” chegara bojxona postida sof og‘irligi 18 kg dan ziyod sintetik giyohvandlik moddasini olib kirishga urinish fosh qilindi. Bu haqda Bojxona qo‘mitasi matbuot xizmati xabar berdi.
Maʼlum qilinishicha, respublikaga kirib kelgan Lada Largus rusumli avtotransport vositasi belgilangan tartibda bojxona ko‘rigidan o‘tkazilgan.
Ko‘rik davomida avtotransport yukxonasidagi 2 dona ovoz kuchaytirgich bojxona xodimlarining diqqatini tortdi. Xolislar ishtirokida ushbu kolonkalar ochib ko‘rilganida, ularning ichida 36 dona polietilen o‘ramlar mohirlik bilan yashirilganligi fosh bo‘ldi.
O‘ramlardagi oq rangli, o‘tkir hidli, kukunsimon moddalar esa Markaziy bojxona laboratoriyasining xulosasiga ko‘ra 18 kg 97 gr og‘irlikdagi “mefedron” sintetik giyohvandlik moddasi bo‘lib chiqdi.
Hozirda holat yuzasidan bojxona organlari tomonidan jinoyat ishi qo‘zg‘atildi.
Izoh (0)