Qoraqalpog‘istonda muqaddam sudlangan fuqaro gugurt qutisi ichidagi geroinni sotayotganda ushlandi

Qoraqalpog‘iston bojxona boshqarmasi xodimlari tomonidan geroin giyohvandlik moddasining noqonuniy aylanmada bo‘lishi holati fosh etildi.

Xabar qilinishicha, To‘rtko‘l tumanida o‘tkazilgan tezkor tadbir davomida fuqaro T.S. shartli xaridorga 1 dona “Spichki” yozuvli gugurt qutisiga solingan, 4 dona o‘ramda, sarg‘ish rangli, o‘tkir hidli kukunsimon moddani oldindan kelishilgan 200 dollarga sotgan vaqtida tadbir ishtirokchilari tomonidan to‘xtatib qolingan.

Shundan so‘ng ushbu fuqaro xolislar ishtirokida shaxsiy ko‘rikdan o‘tkazilganida ustidagi ko‘k rangli shimining o‘ng cho‘ntagida 1 dona o‘ramda 0,15 gramm sarg‘ish rangli, o‘tkir hidli kukunsimon modda borligi aniqlandi. Mazkur fuqaro boshqaruvida bo‘lgan “Niva” avtotransport vositasi ko‘zdan kechirilganida esa salon ichida 1 dona o‘ramda 0,58 gramm sarg‘ish rangli, o‘tkir hidli kukunsimon modda topildi.

Tezkor tadbir davom ettirilib, fuqaroning To‘rtko‘l tumanidagi yashash xonadoni ko‘zdan kechirilganida uy xonalaridan biridagi kontramarka pechining ustida 1 dona shaffof sellofan paketga solingan 3,49 gramm sarg‘ish rangli, o‘tkir hidli kukunsimon modda borligi aniqlandi.

Tegishli ekspertiza xulosasiga ko‘ra, fuqarodan ashyoviy dalil sifatida olingan moddalar geroin deb nomlanishi hamda uning sof og‘irligi 4,82 grammga teng ekani tasdiqlandi.

Ushbu fuqaro Jinoyat kodeksining tegishli moddasi bilan muqaddam ham sudlangan. Mazkur holat yuzasidan bojxona organlari tomonidan tergovga qadar surishtiruv harakatlari olib borilmoqda.