O‘tgan oyda oziq-ovqat mahsulotlari umumiy hisobda 1,1 foiz arzonlashdi. Bu haqda Statistika qo‘mitasining navbatdagi tahlilida maʼlum qilindi.
2025-yil iyunda yillik inflyatsiya 8,7 foiz bo‘lib, 2024-yil mos davridagidan (10,6 foiz) 1,9 foizga pasaydi. Isteʼmol tovarlari oylik narxlarida esa 0,2 foiz deflyatsiya kuzatildi.
O‘tgan oyda oziq-ovqat mahsulotlari 1,1 foiz arzonlashgan bo‘lsa, nooziq-ovqat mahsulotlari 0,2 foiz, xizmatlar 0,8 foiz qimmatlashgan. Oy davomida Surxondaryo (0,4 foiz), Qoraqalpog‘iston (0,2 foiz) va Xorazmda (0,1 foiz) narxlar o‘sishi davom etgan.
Iyunda hududlar kesimida eng yuqori yillik inflyatsiya Farg‘ona viloyatida qayd etildi — 10 foiz. Shu bilan birga, Xorazm (9,3 foiz) va Qashqadaryo (8,8 foiz) viloyatlari hamda Toshkent shahrida (9,1 foiz) o‘rta darajadan yuqori inflyatsiya aniqlandi.
Oy davomida narxlar tushishi asosan meva va sabzavot mahsulotlarida kuzatilgan. Jumladan, meva va yong‘oqlar 3,3 foiz, sabzavot, ildizmevali va dukkakli mahsulotlar 10,2 foiz arzonlashgan.
Asosiy turdagi quyidagi sabzavotlar narxlari sezilarli pasaygan:
- baqlajon (-51,6 foiz)
- pomidor (-46,6 foiz)
- bulg‘or qalampiri (-38 foiz)
- bodring (-30,9 foiz)
- tarvuz (-26,8 foiz)
- karam (-23 foiz)
- sarimsoq narxlarida (-10,5 foiz).
O‘z navbatida sitrus mevalar narxlari 13,8–36,2 foiz oralig‘ida, sabzi 12,4 foiz, parranda go‘shti 1,6–1,8 foiz, tuxum 5,3 foiz qimmatlashgan.
2025-yil iyundan Andijon, Surxondaryo, Xorazm viloyatlari hamda Qoraqalpog‘istonda sovuq suv va kanalizatsiya uchun yangilangan tariflar joriy qilindi. Navoiy viloyati va Qoraqalpog‘istonda maishiy chiqindilarni olib ketish xizmati tarifi yangilandi.
Qo‘mita sharhida yozilishicha, sovuq suv va turar joylar bilan bog‘liq boshqa xizmatlar bo‘yicha inflyatsiya iyun oyi davomida respublika bo‘yicha 6,1 foizni tashkil etdi.
Sog‘liqni saqlash sohasida ambulatoriya va emlash xizmatlari, diagnostika va tibbiy laboratoriyalar uchun narxlarning 1,1–1,3 foiz oralig‘ida o‘sishi qayd etildi.
Izoh (0)