Samarqandda huquq-tartibot idoralari bilan hamkorlikda o‘tkazilgan tadbirlar davomida 1,2 kilogramm giyohvand moddalar, 312 dona psixotrop dori vositalari savdosiga chek qo‘yildi. Bu haqda “Daryo”ga DXX Samarqand viloyat boshqarmasi ma’lum qildi.
Xususan, Urgut tumanida yashovchi S.Z.ning yashash manzilini ko‘zdan kechirish davomida 715 gramm opiy giyohvandlik moddasi borligi aniqlangan.
Samarqand—Toshkent yo‘nalishi bo‘yicha harakatlanib ketayotgan Spark avtomobili haydovchisi, Xorazm viloyati Xazorasp tumanida yashovchi X.O‘.ning yonida 2,83 gramm opiy va 0,08 gramm geroin topilgan.
Yana bir tadbirda K.S., M.I. va N.B. ismli fuqarolar 0,5 kilogramm marixuana giyohvandlik moddasini Urgut tumani “Sariqtepa” mahallasi hududida mahalliy fuqaroga 1700 dollarga sotayotgan vaqtda qo‘lga olingan.
Bundan tashqari, Bulung‘ur tumanida yashovchi fuqarolar A.U. va T.J. Toshkent—Samarqand yo‘nalishi bo‘ylab harakatlanib ketayotgan Cobalt rusumli avtomashinada 200 dona “Zardeks” va 112 dona “Regopen” psixotrop dori vositalari borligini aniqlagan.
Aniqlangan holatlar bo‘yicha huquqbuzarlarning harakati protsessual tartibda rasmiylashtirilgan. Barcha holatlar bo‘yicha Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Toshkent viloyatida tojikistonlik shaxs salkam 11 kg gashish giyohvand moddasi bilan qo‘lga tushgani, Buxorodagi xonadonda Afg‘oniston fuqarosiga tegishli 54 kg giyohvand modda ko‘mib qo‘yilgani aniqlangani, Qoraqalpog‘iston, Samarqand va Namanganda giyohvand moddalarni mamlakat hududiga olib kirgan shaxslar qo‘lga olingani to‘g‘risida xabar berilgandi.
Mavzuga doir:
Izoh (0)