Қорақалпоғистон Республикасининг Тўрткўл туманида ўтказилган тезкор тадбир давомида опий гиёҳвандлик воситаси аниқланди. Бу ҳақда Хоразм вилояти божхона бошқармаси хабар берди.
Маълум қилинишича, Isuzu автотранспорт воситасида йўловчи сифатида ҳаракатланаётган фуқаронинг сумкаси белгиланган тартибда кўздан кечирилган. Унда цилиндрсимон шаклдаги целлофан пакетларга ўралган, соф оғирлиги 217,15 грамм бўлган опий гиёҳвандлик воситаси борлиги маълум бўлди.
Шунингдек, фуқаронинг ўзи кийиб олган ички кийими ичида ҳам яна 1 ўрамда, соф оғирлиги 37,52 грамм бўлган опий моддаси борлиги аниқланди.
Тадбир давомида жами соф оғирлиги 254,67 грамм бўлган гиёҳвандлик воситасининг ноқонуний муомаласига чек қўйилган.
Ҳозирда ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)