O‘zbekistonda qurol uchun ruxsatnoma qanday tartibda olinishi ma’lum bo‘ldi

O‘zbekiston Milliy gvardiyasi “Qurol va uning o‘q-dorilari muomalasi sohasida yuridik shaxslar, O‘zbekiston Respublikasi fuqarolari, fuqaroligi bo‘lmagan shaxslar va chet el fuqarolari tomonidan ruxsat berish tartib-taomillaridan o‘tish tartibi to‘g‘risida”gi Vazirlar Mahkamasining qarori loyihasini muhokamaga qo‘ydi.

Qurol va uning o‘q-dorilari muomalasi sohasida jismoniy shaxslarga beriladigan ruxsat etish xususiyatiga ega hujjatlar quyidagi ruxsatnomalar hisoblanadi:

• fuqaroviy qurolni, kolleksiyalash uchun mo‘ljallangan qurol va uning o‘q-dorilarini olishga doir;
• fuqaroviy qurol, mukofot qilingan qurol va uning o‘q-dorilarini, kolleksiyalash uchun mo‘ljallangan qurol va uning o‘q-dorilarini realizatsiya qilishga doir;
• fuqaroviy qurolni, mukofot qilingan qurolni saqlash va olib yurishga doir;
• sport o‘qotar quroli va uning o‘q-dorilarini, og‘iz qismidagi quvvat 3 jouldan yuqori va kalibri 4,5 millimetrdan ortiq bo‘lgan pnevmatik sport qurolini, tig‘li sovuq sport va sport uloqtirish qurolini saqlashga doir;
• soyli stvolli sport o‘qotar quroli va uning o‘q-dorilarini, tig‘li sovuq sport va sport uloqtirish qurolini, kolleksiyalash uchun mo‘ljallangan qurol va uning o‘q-dorilarini, ko‘rgazmaga qo‘yish uchun mo‘ljallangan qurol va uning o‘q-dorilarini tashishga doir;
• qurol va uning o‘q-dorilarini kolleksiyalashga doir;
• qurol va uning o‘q-dorilarini ko‘rgazmaga qo‘yishga doir;
• fuqaroviy qurol va uning o‘q-dorilarini, mukofot qilingan qurol va uning o‘q-dorilarini, kolleksiyalash uchun mo‘ljallangan qurol va uning o‘q-dorilarini, ko‘rgazmaga qo‘yish uchun mo‘ljallangan qurol va o‘q-dorilarini O‘zbekiston Respublikasi hududiga olib kirishga doir;
• fuqaroviy qurol va uning o‘q-dorilarini, mukofot qilingan qurol va uning o‘q-dorilarini, kolleksiyalash uchun mo‘ljallangan qurol va uning o‘q-dorilarini, ko‘rgazmaga qo‘yish uchun mo‘ljallangan qurol va o‘q-dorilarini O‘zbekiston Respublikasi hududidan olib chiqishga doir;
• fuqaroviy qurol va uning o‘q-dorilarini, mukofot qilingan qurol va uning o‘q-dorilarini, kolleksiyalash uchun mo‘ljallangan qurol va uning o‘q-dorilarini, ko‘rgazmaga qo‘yish uchun mo‘ljallangan qurol va o‘q-dorilarini O‘zbekiston Respublikasi hududi orqali tranzit qilishga doir.

Og‘iz qismidagi quvvat 7,5 jouldan kam va kalibri 4,5 millimetrga qadar bo‘lgan pnevmatik ov qurolini hamda og‘iz qismidagi quvvat 3 jouldan kam bo‘lgan pnevmatik sport quroli va ko‘rsatib o‘tilgan qurol turlarining o‘q-dorilari muomalasi sohasida harakatlarni bajarish va (yoki) faoliyatni amalga oshirish Milliy gvardiya organlari ruxsatnomalarisiz amalga oshiriladi.

Tig‘li sovuq ov va signal beruvchi ov qurolini olish, realizatsiya qilish, saqlash, olib yurish va tashish Milliy gvardiya organlari ruxsatnomalarisiz ovchilar jamoat birlashmasi tomonidan berilgan ovchilik guvohnomasi asosida amalga oshiriladi.

O‘qotar ov quroli va og‘iz qismidagi quvvat 7,5 jouldan yuqori va kalibri 4,5 millimetrdan ortiq bo‘lgan pnevmatik qurolining o‘q-dorilarini olish, realizatsiya qilish, saqlash va olib yurish, tashish Milliy gvardiya organlari tomonidan berilgan o‘q-dorilarning turi va kalibriga mos ov qurolini saqlash va olib yurishga doir ruxsatnomasi va ovchilar jamoat birlashmasi tomonidan berilgan ovchilik guvohnomasi asosida amalga oshiriladi.

Silliq stvolli o‘qotar ov quroliga shaxsiy foydalanish uchun ishlab chiqarilishi mumkin bo‘lgan patronlar uchun foydalaniladigan initsiyalanadigan va olovlanadigan modda va materiallarni (porox, kapsyullar) olish, realizatsiya qilish, saqlash, tashish Milliy gvardiya organlarining silliq stvolli o‘qotar ov qurolini saqlash va olib yurishga doir ruxsatnomasi va ovchilar jamoat birlashmasi tomonidan berilgan ovchilik guvohnomasi asosida amalga oshiriladi.

O‘qotar ov, silliq stvolli sport, mukofot qilingan qurol va uning o‘q-dorilari, o‘zini o‘zi himoya qilish qurolini tashish Milliy gvardiya organlarining qurolni saqlash va olib yurishga doir ruxsatnomasi asosida amalga oshiriladi.

Jo‘natuvchilari yoki qabul qiluvchilari chet davlatlarining mudofaa vazirligi, ichki ishlar, xavfsizlik organlari, chegara qo‘shinlari va boshqa harbiylashtirilgan davlat tuzilmalari harbiy qismlari bo‘lgan fuqaroviy, xizmat, kolleksiyalash va ko‘rgazmaga qo‘yish uchun mo‘ljallangan qurol hamda uning o‘q-dorilarini tranzit qilish maxsus yuklar va harbiy tarkiblarning tranziti to‘g‘risidagi qonun hujjatlariga muvofiq amalga oshiriladi.

Qurol va uning o‘q-dorilari muomalasi sohasida ruxsatnomalar berish, berishni rad etish, ruxsatnomalarning amal qilishini to‘xtatib turish, tugatish hamda ularni bekor qilish to‘g‘risidagi qarorlar Milliy gvardiya markaziy devoni, Milliy gvardiyaning Qoraqalpog‘iston Respublikasi, viloyatlar va Toshkent shahri bo‘yicha boshqarmalari (vakolatli organ) tomonidan qabul qilinadi.

Ruxsatnomaning amal qilishini to‘xtatib turish, tugatish va uni bekor qilish sud qarori asosida ham amalga oshirilishi mumkin.

Ruxsatnomalar Milliy gvardiyaning Qoraqalpog‘iston Respublikasi, viloyatlar va Toshkent shahri bo‘yicha boshqarmalari tomonidan beriladi, ushbu bandning to‘rtinchi xatboshisida nazarda tutilgan ruxsatnomalar bundan mustasno.

Fuqaroviy, mukofot qilingan, kolleksiyalash va ko‘rgazmaga qo‘yish uchun mo‘ljallangan qurol va uning o‘q-dorilarini O‘zbekiston hududiga olib kirish, O‘zbekiston hududidan olib chiqish, O‘zbekiston hududi orqali tranzit qilishga, soyli stvolli o‘qotar qurolini, shu jumladan kombinatsiyalangan o‘qotar qurolni, shuningdek og‘iz qismidagi quvvat oltmish besh jouldan yuqori va kalibri to‘qqiz millimetrdan ortiq bo‘lgan pnevmatik ov qurolini olishga doir ruxsatnomalar Milliy gvardiya markaziy devoni tomonidan beriladi.

Quyidagilar qurol va uning o‘q-dorilari muomalasi sohasida harakatlarni bajarish va (yoki) faoliyatni amalga oshirish uchun ruxsat berishga doir talablar va shartlar hisoblanadi:

a) qurol va uning o‘q-dorilari muomalasi, jamoat tartibi va jamoat xavfsizligini ta’minlash sohasidagi qonunchilikka rioya qilish;

b) qurol va uning o‘q-dorilari but saqlanishi, saqlash xavfsizligini va maqsadli foydalanilishini ta’minlash hamda ulardan begona shaxslar foydalanishini istisno etishga qaratilgan choralarni ko‘rish;

v) quyidagilar muomalasi sohasida harakatlarni bajarish va (yoki) faoliyatni amalga oshirishga yo‘l qo‘ymaslik:

“Qurol to‘g‘risida”gi O‘zbekiston Respublikasi Qonunining 9 va 19-moddalariga muvofiq O‘zbekiston Respublikasi hududida muomalasi taqiqlangan fuqaroviy va mukofot qilingan qurol va uning o‘q-dorilari;

shikastlovchi ta'siri radioaktiv nurlanish, kimyoviy va biologik (bakteriologik) omillardan foydalanishga yoki elektromagnit, nur, issiqlik, infratovush, ultratovush nurlanishdan foydalanishga asoslangan kolleksiyalash va ko‘rgazmaga qo‘yish uchun mo‘ljallangan qurol hamda uning o‘q-dorilari;

g) ruxsatnomada ko‘rsatilgan qurol va uning o‘q-dorilari doirasida va ularga oid harakatlarni shaxsan bajarish va (yoki) faoliyatni shaxsan amalga oshirish;

d) arizachining yigirma bir yoshga (fuqaroviy ov, kolleksiyalash va ko‘rgazmaga qo‘yish uchun mo‘ljallangan qurol va uning o‘q-dorilariga egalik qilish uchun) va o‘n sakkiz yoshga (fuqaroviy sport quroli va uning o‘q-dorilari, o‘zini o‘zi himoya qilish quroliga egalik qilish uchun) yetgan bo‘lishi;

e) arizachining doimiy yashash joyiga ega bo‘lishi hamda “Qurol to‘g‘risida”gi O‘zbekiston Respublikasi Qonuni 13-moddasi to‘qqizinchi qismining uchinchi, beshinchi, oltinchi, sakkizinchi, to‘qqizinchi, o‘ninchi va o‘n birinchi xatboshilarida nazarda tutilgan asoslarning mavjud emasligi;

j) jamoat tartibiga, boshqaruvning belgilangan tartibiga tajovuz qiluvchi huquqbuzarliklarni sodir etganlik, badanga yengil shikast yetkazganlik va giyohvandlik vositalarini, ularning analoglarini yoki psixotrop moddalarni oz miqdorda g‘ayriqonuniy ravishda tayyorlaganlik, olganlik, saqlaganlik, tashiganlik yoki jo‘natganlik uchun bir yil davomida takroran ma’muriy javobgarlikka tortilmaganligi (O‘zbekiston Respublikasi hududida vaqtincha turgan chet el fuqarolari va fuqaroligi bo‘lmagan shaxslar bundan mustasno);

z) ov qoidalarini buzganlik uchun bir yil davomida takroran ma’muriy javobgarlikka tortilmaganligi (fuqaroviy qurol va uning o‘q-dorilariga egalik qilish uchun);

i) ovchilar jamoat birlashmasida (ov quroli uchun) va otish sporti sohasidagi faoliyat bilan shug‘ullanuvchi yuridik shaxslarda (sport quroli uchun) qurol bilan xavfsiz muomalada bo‘lish qoidalariga oid bilimlarining tekshiruvidan, shuningdek qurolga egalik qilishga qarshi ko‘rsatmalar mavjud emasligi to‘g‘risidagi tibbiy tekshiruvdan o‘tishi (qurol bilan mukofotlangan O‘zbekiston Respublikasi hududida vaqtincha turgan chet el fuqarolari va fuqaroligi bo‘lmagan shaxslar bundan mustasno);

k) doimiy yashash joyi o‘zgargan taqdirda, yangi doimiy yashash joyi bo‘yicha propiska qilingan kundan e'tiboran o‘n kun muddat ichida tegishli vakolatli organga o‘ziga tegishli fuqaroviy qurolni qayta ro‘yxatdan o‘tkazish choralarini ko‘rish;

l) qurol va uning o‘q-dorilarini olish, kolleksiyalash yoki ko‘rgazmaga qo‘yishga doir ruxsatnomaning muddatini uzaytirish uchun zarur bo‘lgan hujjatlarni ruxsatnomaning amal qilish muddati tugashidan kamida o‘ttiz ish kunidan oldin, boshqa turdagi ruxsatnomalar muddatini uzaytirish uchun zarur bo‘lgan hujjatlarni ularning muddatlari tugashidan kamida o‘n ish kunidan oldin vakolatli organga taqdim etish;

m) amal qilishini tugatish yoki bekor qilish uchun asos bo‘lgan holatlar yuzaga kelgandan keyin qurol va uning o‘q-dorilari muomalasi sohasida ruxsatnomalarni o‘n kunlik muddatda vakolatli organga qaytarish;

n) qurol to‘g‘risidagi qonun hujjatlarining talablariga rioya etilishini tekshirish uchun Milliy gvardiya organlari xodimlarining qurol va uning o‘q-dorilari saqlanadigan joylarga soat 6-00 dan 22-00 gacha moneliksiz kirishini ta’minlash, tanishib chiqish uchun ularga zarur hujjatlarni taqdim etish;

Qurol va uning o‘q-dorilari muomalasi sohasida harakatlarni bajarish va (yoki) muayyan faoliyatni amalga oshirishda ruxsat berishga doir qo‘shimcha talablar va shartlarga quyidagilar kiradi:

a) fuqaroviy qurol, kolleksiyalash uchun mo‘ljallangan qurol va uning o‘q-dorilarini olish bo‘yicha:

• O‘zbekiston hududida qurol va uning o‘q-dorilarini fuqaroviy va xizmat qurolini hamda uning o‘q-dorilarini realizatsiya qilish bo‘yicha faoliyatni amalga oshirish uchun litsenziyaga ega bo‘lgan yuridik shaxslar orqali sotib olish;
• qurol va uning o‘q-dorilarini olgandan so‘ng o‘n kunlik muddatda ularni saqlash va olib yurish, kolleksiyalash yoki ko‘rgazmaga qo‘yishga doir ruxsatnomalarni rasmiylashtirish (qurol va uning o‘q-dorilarini ro‘yxatdan o‘tkazish) uchun zarur bo‘lgan hujjatlarni vakolatli organga taqdim etish;

b) fuqaroviy, kolleksiyalash va mukofot quroli hamda uning o‘q-dorilarini realizatsiya qilish bo‘yicha:

• O‘zbekiston hududida qurol va uning o‘q-dorilarini fuqaroviy va xizmat qurolini hamda uning o‘q-dorilarini realizatsiya qilish bo‘yicha faoliyatni amalga oshirish uchun litsenziyaga ega bo‘lgan yuridik shaxslar orqali realizatsiya qilish;
• qurol va uning o‘q-dorilarini realizatsiya qilgandan so‘ng o‘n kunlik muddatda ularni saqlash va olib yurish, kolleksiyalash yoki ko‘rgazmaga qo‘yishga doir ruxsatnomaga o‘zgartirishlar kiritish uchun tegishli hujjatlarni (qisman realizatsiya qilinganda), shuningdek qurol va uning o‘q-dorilarini saqlash va olib yurish, kolleksiyalash yoki ko‘rgazmaga qo‘yishga doir ruxsatnomaning aslini (to‘liq realizatsiya qilinganda) vakolatli organga taqdim etish;

v) fuqaroviy va mukofot quroli hamda uning o‘q-dorilarini saqlash bo‘yicha:

• o‘qotar ov quroli, og‘iz qismidagi quvvat 7,5 jouldan yuqori va kalibri 4,5 millimetrdan ortiq bo‘lgan pnevmatik ov quroli, signal beruvchi qurol va uning o‘qdorilari, tig‘li sovuq ov quroli, kolleksiyalash va mukofot qilingan qurol hamda uning o‘q-dorilarini doimiy yashash joyida qulflanadigan seyflarda yoki metall shkaflarda saqlash;
• kolleksiyalash uchun mo‘ljallangan qurol va uning o‘q-dorilarini Milliy gvardiya organlarining texnik qo‘riqlash pultiga ulangan qo‘riqlash-yong‘in signalizatsiyasi bilan jihozlangan xonalarda saqlash;
• og‘iz qismidagi quvvat 3 jouldan yuqori va kalibri 4,5 millimetrdan ortiq bo‘lgan pnevmatik sport qurolini, tig‘li sovuq sport qurolini va sport uloqtirish qurolini sport (o‘q otish) obektlari hududidagi jihozlangan qurolxonalaridagi qulflanadigan seyflarda yoki metall shkaflarda saqlash;
• qurolni seyflarda yoki metall shkaflarda, uning o‘q-dorilarini esa – ushbu seyflar yoki shkaflar ichidagi qulflanadigan alohida qismida (bo‘linmasida) yoki alohida qulflanadigan seyflarda yoxud metall shkaflarda saqlash;

g) soyli stvolli o‘qotar sport quroli va uning o‘q-dorilarini, tig‘li sovuq sport va sport uloqtirish qurolini, kolleksiyalash va ko‘rgazmaga qo‘yish uchun mo‘ljallangan qurol va uning o‘q-dorilarini tashish bo‘yicha:

• qurolni jildlarda, qinlarda yoki maxsus (moslashtirilgan) g‘iloflarda o‘qi chiqarib olingan holatda o‘q-dorilaridan alohida tashish;
• begona shaxslarning to‘g‘ridan-to‘g‘ri ko‘rishi va ularni erkin olishi imkoniyatini istisno etadigan sharoitlarda tashish;
• o‘n donadan ko‘p miqdordagi o‘qotar qurol yoki uning besh yuz donadan ortiq miqdordagi o‘q-dorilari turkumi tashilayotgan yo‘lda Milliy gvardiya organlari yoki idoraviy harbiylashtirilgan qo‘riqlash xizmati (avtomobil transportida tashishda), “O‘zbekiston temir yo‘llari” AJ harbiylashtirilgan qo‘riqlash xizmati xodimlari tomonidan (temiryo‘l transportida tashishda) kuzatib borilishini ta’minlash;

d) qurol va uning o‘q-dorilarini ko‘rgazmaga qo‘yish bo‘yicha:

• qurol va uning o‘q-dorilarini ko‘rgazmaga binolarini ijara olish (ular o‘z egaligida bo‘lmaganda), qurolni va uning o‘q-dorilarini ko‘rgazmaga qo‘yish tartibi, qurol va ularning but saqlanishini ta’minlash bo‘yicha shartnomalarni tuzish;
• ko‘rgazmani yong‘inga qarshi avtomatika va qo‘riqlashning muhandislik-texnik va videokuzatuv vositalari hamda Milliy gvardiya organlari texnik qo‘riqlash pultiga ulangan qo‘riqlash-yong‘in signalizatsiyasi vositalari bilan jihozlangan statsionar turdagi bino va inshootlarda tashkil etish;
• ko‘rgazmaga (shu jumladan, chet ellik ishtirokchilar tomonidan) qo‘yilgan qurol va uning o‘q-dorilarini but saqlanishi, saqlash xavfsizligini ta’minlash, qurol va uning o‘q-dorilari joylashtirilgan va saqlanadigan joylarga begona shaxslarning ruxsatsiz kirishini oldini olishga qaratilgan choralarni ko‘rish;
• ko‘rgazmaga qo‘yish rejalarini va ekspozitsiyalarni joylashtirish sxemalarini ishlab chiqib, ko‘rgazma o‘tkazish joyidagi Milliy gvardiya organiga kelishish uchun taqdim etish;
• qurol va uning o‘q-dorilarini boshqa predmetlar bilan birga ko‘rgazmaga qo‘ymaslik, qurolni ishlab chiqarish, unga texnik xizmat ko‘rsatish, ta’mirlash mo‘ljallangan qurilmalar va asboblar, sport, ov va baliq ovlash ashyolari hamda qurolning ehtiyot qismlari, shuningdek tarixiy-madaniy ko‘rgazmalar eksponatlari bundan mustasno;
• qurolni va uning o‘q-dorilarini muzeybop tarzda ko‘rgazmaga qo‘yishni ularni Milliy gvardiya organlarining texnik-qo‘riqlash pultiga ulangan qo‘riqlash-yong‘in signalizatsiyasi vositalari bilan jihozlash yopiq (qulflanadigan) vitrina va stendlarda amalga oshirish;
• qurolni va uning o‘q-dorilarini but va xavfsiz saqlanishini ta’minlash, ular joylashtiriladigan va saqlanadigan joylarga begona shaxslar kirishini istisno etish;
• qurolning o‘q-dorilarini o‘qsizlantirilgan xolda ko‘rgazmaga qo‘yish;
• ko‘rgazmaning chet ellik ishtirokchilari uchun ularga tegishli qurol va uning o‘q-dorilarini O‘zbekiston hududiga olib kirish, O‘zbekiston Respublikasi hududi bo‘ylab tashishga doir O‘zbekiston Milliy gvardiyasi ruxsatnomalarini olish, ularni tashish, ko‘rgazma o‘tkazilayotgan obekt hududida ularni qabul qilish va joylashtirish bo‘yicha choralarni ko‘rish (chet ellik ishtirokchilarning olib kirilayotgan qurol va uning o‘q-dorilarini ko‘rgazmaga qo‘yishda);

e) qurol va uning o‘q-dorilarini O‘zbekiston hududiga olib kirish va ularni O‘zbekiston hududidan olib chiqish bo‘yicha:

• ushbu bandning “g” kichik bandida ko‘rsatilgan talablarga rioya qilish;
• O‘zbekiston hududiga olib kirilgan ov va sport quroli va uning foydalanilmagan o‘q-dorilarini, ko‘rgazmaga qo‘yish uchun mo‘ljallangan qurol va uning o‘q-dorilarini ov to‘g‘risidagi shartnomada, sport musobaqalarida qatnashish yoki ko‘rgazmaga qo‘yish uchun taklifnomalarda belgilangan muddatlarda O‘zbekiston Respublikasi hududidan olib chiqish (O‘zbekiston hududida vaqtincha turgan chet el fuqarolari va fuqaroligi bo‘lmagan shaxslar uchun);
• O‘zbekistonda olingan fuqaroviy qurol va uning o‘q-dorilarini ular olingan kundan e'tiboran besh kundan kechiktirmay O‘zbekiston Respublikasi hududidan olib chiqish (O‘zbekiston Respublikasi hududida vaqtincha turgan chet el fuqarolari va fuqaroligi bo‘lmagan shaxslar uchun);

j) qurol va uning o‘q-dorilarini O‘zbekiston hududi orqali tranzit qilish bo‘yicha:

• tranzit qilinadigan qurol va uning o‘q-dorilarini jo‘natuvchi davlat hududidan olib chiqish va qabul qiluvchi davlat hududiga olib kirish huquqini beruvchi ruxsatnomalarni taqdim etish;
• ushbu bandning “g” kichik bandi ikkinchi va uchinchi xatboshisida ko‘rsatilgan talablarga rioya qilish;
• o‘n donadan ko‘p miqdordagi o‘qotar qurol yoki uning besh yuz donadan ortiq miqdordagi o‘q-dorilari turkumi tashilayotgan yo‘lda O‘zbekiston Respublikasi Ichki ishlar vazirligi Davlat yo‘l harakati xavfsizligi bo‘linmalari (avtomobil transportida tashishda) yoki “O‘zbekiston temir yo‘llari” AJ harbiylashtirilgan qo‘riqlash xizmati xodimlari tomonidan (temiryo‘l transportida tashishda) kuzatib borilishini ta’minlash.

Ruxsatnoma olish uchun arizachi yashash joyidagi vakolatli organga quyidagi hujjatlarni taqdim etadi:

Nizomning 10-ilovasidagi shaklga muvofiq ruxsatnoma berish to‘g‘risida quyidagilar ko‘rsatilgan ariza:

• familiyasi, ismi, otasining ismi, fuqaroligi, pasport (yashash guvohnomasi) seriyasi va raqami, tug‘ilgan sanasi va joyi, doimiy yashash manzili, murojaat uchun telefon raqamlari;
• arizachining bajarmoqchi va (yoki) amalga oshirmoqchi bo‘lgan harakati va (yoki) muayyan faoliyati uchun ruxsatnoma olishdan maqsadi, harakatni bajarish va (yoki) faoliyatni amalga oshirishga daxldor qurol (turi, xili, modeli va kalibri) va uning o‘q-dorilari (turi, kalibri) to‘g‘risida ma’lumot;
• qurol va uning o‘q-dorilarni joylashtirish, saqlash joyi;
• harakatni bajarish va (yoki) faoliyatni amalga oshirish uchun taxminiy muddat (zarur bo‘lganda).

Arizada qo‘shimcha ravishda quyidagilar ko‘rsatiladi:

a) fuqaroviy va kolleksiyalash uchun mo‘ljallangan qurol hamda uning o‘q-dorilari realizatsiya qilishda – realizatsiya qilish rejalashtirilayotgan fuqaroviy va xizmat quroli hamda uning o‘q-dorilarini realizatsiya qilish bo‘yicha faoliyatni amalga oshirish uchun litsenziyaga ega bo‘lgan yuridik shaxsning nomi va manzili to‘g‘risida ma’lumotlar;

b) o‘qotar sport quroli va uning o‘q-dorilari, og‘iz qismidagi quvvat 3 jouldan yuqori va kalibri 4,5 millimetrdan ortiq pnevmatik sport quroli va uning o‘q-dorilari, tig‘li sovuq sport va sport uloqtirish qurolini saqlashda – sport (o‘q otish) obektining nomi va joylashgan joyi to‘g‘risida ma’lumotlar;

v) soyli stvolli o‘qotar sport quroli va uning o‘q-dorilari, tig‘li sovuq sport va sport uloqtirish qurolini tashishda – sport musobaqalari va o‘quv-mashq yig‘inlari tashkilotchisi va o‘tkazish joyi, O‘zbekiston Respublikasi hududi bo‘ylab tashish yo‘nalishi, foydalaniladigan transport turi (avtomobil transportida tashishda – tashish uchun jalb qilingan transport vositalarining rusumi va ro‘yxatdan o‘tgan davlat belgilari) to‘g‘risidagi ma’lumotlar;

g) qurol va uning o‘q-dorilarini ko‘rgazmaga qo‘yishda – ko‘rgazmaga joyi, shuningdek har kuni ko‘rgazma ish vaqti tugagach qurol va uning o‘q-dorilarini topshirish uchun ular but saqlanishini ta’minlaydigan qurolxona to‘g‘risidagi ma’lumotlar (ko‘rgazmaga qo‘yish uchun mo‘ljallangan qurol va uning o‘q-dorilari ochiq vitrina va stendlarga joylangan xollarda);

d) fuqaroviy, kolleksiyalash va ko‘rgazmaga qo‘yish uchun mo‘ljallangan qurol hamda uning o‘q-dorilarini O‘zbekiston hududiga olib kirish, O‘zbekiston Respublikasi hududidan olib chiqish, O‘zbekiston hududi orqali tranzit qilishda — O‘zbekiston hududiga kirish, O‘zbekiston hududidan chiqish joylari, jo‘natuvchi va qabul qiluvchi davlatlar, O‘zbekiston hududi bo‘ylab tashish yo‘nalishi, foydalaniladigan transport turi (avtomobil transportida tashishda – transport vositalarining rusumi va ro‘yxatdan o‘tgan davlat belgilari), olib kirishning (olib chiqish, tranzit) taxminiy vaqti, shuningdek tranzit ishtirokchilari – davlatlar hududi bo‘ylab harakatlanishning taxminiy yo‘nalishi to‘g‘risidagi ma’lumotlar (tranzit qilishda).