Nyu York shahrida mahalla institutiga bag‘ishlab o‘tkazilgan forumda xalqaro tashkilotlar vakillari O‘zbekistondagi mahallalarning yoshlar muammolarini bevosita hal etishdagi saʼy-harakatlarini yuqori baholadi.
O‘zbekistonning BMTdagi doimiy vakolatxonasi hamda O‘zbekiston Mahallalar uyushmasi hamkorligida tashkil etilgan forumda BMTga aʼzo davlatlarning doimiy vakillari va diplomatlari, shuningdek, xalqaro tashkilotlar, OAV va fuqarolik jamiyati vakillari ishtirok etdi.
BMTning Yoshlar masalalari bo‘yicha boshqarmasi vakili Sudxa Balakrishnan taʼkidlaganidek, O‘zbekistonda keyingi yillarda prezident Shavkat Mirziyoyev boshchiligida amalga oshirilayotgan islohotlar natijasida mahallalarda tatbiq etilayotgan raqamli yechimlar va inklyuziv g‘oyalar xalq va davlat o‘rtasidagi ishonch mustahkamlanishiga xizmat qilmoqda.
BMTning Aholishunoslik fondi vakili Leyla Sharafi o‘z chiqishida barqaror rivojlanish maqsadlariga faqatgina mahalliy jamoalar faol ishtirok etgan taqdirda erishish mumkinligini qayd etdi. L.Sharafi O‘zbekistonda 9400 dan ortiq mahallada olib borilayotgan islohotlar haqida to‘xtalar ekan, bu jarayonda xotin-qizlarning ijtimoiy-huquqiy savodxonligini oshirish va muhim qarorlarni qabul qilishga yoshlarni faol jalb qilish borasida erishilgan yutuqlarni eʼtirof etdi.
Zo‘ravonlik ekstremizmi bilan kurashish bo‘yicha Tahlil markazi direktori Jozef Gayt BMTTD bilan hamkorlikda O‘zbekiston mahallalarida o‘tkazilgan tadqiqotlar natijalarini taqdim etdi. Tadqiqot natijasiga ko‘ra, o‘zbekistonliklarda oilalardagi zo‘ravonlikni qabul qilish 67 foizga, gender tenglik masalasidagi eskicha yondashuvlar esa 12 foizga qisqargan. Bu esa mahallalar barqaror ijtimoiy o‘zgarishlar uchun samarali maydon bo‘lib xizmat qilayotganini isbotlashi qayd etildi.
BMTning O‘zbekistondagi doimiy koordinatori Sabine Mahl o‘z chiqishida Qoraqalpog‘iston Respublikasi, Qashqadaryo va Surxondaryo viloyatlariga qilgan safari haqida so‘zlab berdi. U o‘z ko‘zlari bilan mahallada bandlikni taʼminlash, sog‘liqni saqlash va ayollar huquqlari masalalari qay tarzda hal qilinayotganini ko‘rganini so‘zlab berdi. S.Mahl mahallani “mahalliy jamoalar qalbi”, deb taʼkidlagan holda, O‘zbekiston prezidentiga BMTning tashabbuslarini qo‘llab-quvvatlagani uchun minnatdorlik bildirdi.
Forum yakunida 2026-yilda BMT shafeligida mahalla instituti faoliyatiga doir II butunjahon konferensiyasini Samarqand shahrida o‘tkazish taklifi ilgari surildi.
Izoh (0)