Qoraqalpog‘iston Respublikasining To‘rtko‘l tumanida giyohvandlik vositasini 90 ming dollarga sotmoqchi bo‘lgan shaxs qo‘lga olindi.
Ma’lum qilinishicha, Davlat xavfsizlik xizmatining Qoraqalpog‘iston Respublikasi bo‘yicha boshqarmasi xodimlari tomonidan tezkor tadbir o‘tkazilgan. Tadbirda To‘rtko‘l tumanida yashovchi 34 yoshli shaxs Samarqand shahridan Nukus shahriga 2 kilogramm 10 gramm geroin moddasini olib kelib, xaridorga 90 ming dollarga sotayotgan vaqtida qo‘lga olingan. Aniqlanishicha, mazkur giyohvandlik vositasi tojikistonlik narkokuryer tomonidan O‘zbekiston hududiga o‘tkazilgan.
Shuningdek, DXX Toshkent shahar bo‘yicha boshqarmasi xodimlari ham bojxona va ichki ishlar organlari bilan hamkorlikda bir nechta tezkor tadbirlar o‘tkazgan. Jumladan, Uchtepa tumanida yashovchi, muqaddam giyohvandlik vositalari bilan bog‘liq jinoyat sodir etgani uchun sudlangan 58 yoshli shaxsning yashash xonadoni belgilangan tartibda ko‘zdan kechirilgan. Tekshiruv davomida uyning shift qismiga yashirib qo‘yilgan 1,924 kilogramm opiy moddasi borligi aniqlanib, protsessual tartibda rasmiylashtirib olingan.
Ta’kidlanishicha, mazkur giyohvandlik vositasi ham uchinchi shaxslar tomonidan Tojikistondan keltirilgan. Shuningdek, xonadonda tegishli hujjatlari bo‘lmagan 1 dona pnevmatik pistolet ham borligi ma’lum bo‘lgan.
Uchtepa tumanida kuzatilgan boshqa bir holatda Tojikistondan aylanma yo‘llar bilan o‘tkazilgan narkotik moddalarni Toshkent shahriga olib kelib sotish bilan shug‘ullangan, Surxondaryo viloyatida tug‘ilgan 3 nafar shaxsning noqonuniy faoliyatiga chek qo‘yilib, ulardan 943 gramm gashish moddasi protsessual tartibda rasmiylashtirib olingan.
Bundan tashqari, Qirg‘izistondan noqonuniy yo‘llar bilan O‘zbekiston hududiga o‘tkazilgan narkotik moddalar va kuchli ta’sir qiluvchi dori vositalari ham aniqlangan. Xususan, Farg‘ona tumanida yashovchi ikki fuqaro (1976 va 1997-yillarda tug‘ilgan) kelayotgan Lacetti rusumli avtotransport vositasi Toshkent shahriga kiraverishdagi “Sharq” YPX maskanida to‘xtatilgan. Mashina ko‘zdan kechirilganda salonida 939 gramm gashish moddasi borligi aniqlangan hamda tegishli tartibda rasmiylashtirib olingan.
DXX xodimlari tomonidan Bojxona qo‘mitasining Toshkent shahar boshqarmasi bilan hamkorlikda o‘tkazilgan tezkor tadbirda Toshkent shahrida yashovchi ikki fuqaro (1977 va 1995-yillarda tug‘ilgan) Chilonzor tumanida xaridorga 560 dona “Regapen” hamda 100 dona “Tropikamid” kuchli ta’sir qiluvchi dori vositalarini 26 million so‘mga sotayotgan vaqtlarida qo‘lga olingan.
Shuningdek, ularning sherigi 20 yoshli shaxs ham ushlanib, uning vaqtincha yashash xonadonidan 1540 dona “Regapen”, 630 dona “Tropikamid” hamda 30 dona “Selofen” kuchli ta’sir qiluvchi dori vositalari o‘rnatilgan tartibda olib qo‘yilgan.
Farg‘ona viloyatida o‘tkazilgan tezkor tadbirda Farg‘ona—Namangan yo‘nalishida harakatlanayotgan 32 yoshli shaxs boshqaruvidagi avtomashina Yozyovon tumani hududida to‘xtatilib, ko‘zdan kechirilgan. Natijada, uning salon qismida O‘zbekistonda muomalasi cheklangan narkotik moddalar turkumiga kiruvchi 1920 dona “Tramadol” dori vositasi, shuningdek, dorixonalarda shifokor retsepti asosida sotilishi lozim bo‘lgan 4704 dona “Regapen” va 150 dona “Tropikamid” kuchli ta’sir qiluvchi dori vositalari borligi aniqlangan.
Yana bir holatda Quvasoy—Toshkent yo‘nalishida harakatlanayotgan avtomashina “Namangan” YPX maskanida to‘xtatilib ko‘zdan kechirilganda, unda Quvasoy shahrida yashovchi 25 yoshli shaxsga tegishli 840 dona “Regapen” va 240 dona “Tropikamid” kuchli ta’sir qiluvchi dori vositalari borligi ma’lum bo‘lgan hamda protsessual tartibda olib qo‘yilgan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Farg‘onada tomorqasida 100 tup ko‘knori yetishtirayotgan shaxs aniqlangani, Toshkent shahri va viloyatida kuchli ta’sir qiluvchi dorilar savdosi bilan shug‘ullangan 9 kishi ushlangani to‘g‘risida xabar berilgandi.
Izoh (0)