Buxoro viloyatida ayol oilaviy muammolar sabab o‘zini suvga tashlamoqchi bo‘ldi. Bu haqda viloyat IIB xabar berdi.
Ma’lum qilinishicha, ruxsat etilmagan cho‘milish havzalarida yosh bolalarning ota-onasi yoki kattalarning nazoratisiz ushbu joylarga borishi oqibatida cho‘kish holatlari kuzatilmoqda.
Buxoro viloyati IIB patrul-post xizmati xodimlari tomonidan shu kabi ruxsat etilmagan suv havzalarida cho‘milmaslik bo‘yicha aholi bilan targ‘ibot ishlari olib borish jarayonida Buxoro shahrida yashovchi fuqaroning suv bo‘yida maqsadsiz o‘tirgani aniqlandi.
“Ushbu fuqaro bilan olib borilgan suhbat davomida hayotiy qiyinchilik va oilaviy muammolar sababli turli o‘y-xayollar bilan suv bo‘yiga kelganligini ma’lum qilgan.
Aytish mumkinki, Patrul-post xodimlarining sergakligi sabab sodir bo‘lishi mumkin bo‘lgan ko‘ngilsiz hodisaning oldi olindi, bir insonning hayoti saqlab qolindi”, deyiladi xabarda.
5-iyun kuni Farg‘ona viloyati Oltiariq tumanida uch nafar voyaga yetmagan bola sun’iy suv havzasiga cho‘kib ketgan edi. Hozirda prokuratura tomonidan tergovga qadar tekshirish harakatlari olib borilmoqda.
May oyining boshlarida esa Toshkentning Bo‘rijar kanaliga tushib ketgan qizlarni qutqargan erkakning o‘zi halok bo‘lgandi. Davlat rahbari marhumning rafiqasi va farzandlariga hamdardlik bildirdi va marhum Abdumannop Samiqov “Jasorat” medali bilan mukofotlandi. Mukofot uning oila a’zolariga topshirildi. Marhumning turmush o‘rtog‘iga moddiy yordam tariqasida 50 mln so‘m topshirildi.
Ayni payda Favqulodda vaziyatlar vazirligi tomonidan yoz mavsumida suvda cho‘kish holatlarining oldini olish maqsadida keng ko‘lamli profilaktik tadbirlar olib borilmoqda. Tegishli mutaxassislar ishtirokida o‘tkazilgan o‘rganishlar natijasida respublika bo‘ylab 2 004 ta cho‘milish taqiqlangan suv obyektlari aniqlanib, ular ro‘yxatga olinib, nazoratga olingan.
Qibrayda FVV qutqaruvchilari tomonidan kanalga tushib ketgan fuqaro qutqarilgandi.
Izoh (0)