Komik aktrisa va xonanda sifatida tanilgan Shahlo Zoirova “Milliy” telekanalining “Ayol qalbi” ko‘rsatuvida ishtirok etib, shaxsiy hayoti, ijodiy faoliyati va yoshligidagi qiyinchiliklar, sahnaga qadar bosib o‘tgan yo‘li va oilaviy baxti haqida gapirdi.
San’at qalbimni zabt etdi
Shahlo Zoirova Toshkent davlat axborot texnologiyalari universiteti qoshidagi akademik litseyni tamomlagan, mutaxassisligi esa matematika va fizika bo‘lgan. Biroq do‘stlari uning san’atga bo‘lgan moyilligini ilg‘ab, bu yo‘nalishni tanlashga undagan.
O‘sha vaqtda san’atga ota-onam ruxsat bermaydi, deb qo‘rqardim. Dadam huquqshunos, yurist bo‘lishimni xohlagan. Shu sababli huquqshunoslikka topshirdim, biroq kirolmadim. Harbiy bojxona institutiga ham topshirdim, 4 ball yetmay qolganida “hali bu joyga baribir kelaman” deb yig‘laganman. Hozir esa san’at sohasi orqali o‘sha orzumga yetdim, deydi aktrisa.
U fizika yo‘nalishiga tavakkal qilib hujjat topshirgan va 1-o‘rin bilan grant asosida o‘qishga qabul qilingan. O‘sha vaqtdan boshlab omad unga kulib boqishni boshlagan. Ammo bu yo‘l oson kechmagan.
“Uyga qaytish uchun avtobusga pul topolmasdim, yotoqxonada qolardim”
Shahlo Zoirova katta farzand sifatida oilasiga moddiy yordam berishga majbur bo‘lgan. U hatto avtobusga pul topolmagani uchun talabalik yillarini yotoqxonada o‘tkazgan.
Yoshligimdan oilaviy qiyinchiliklarga ko‘nikkanman. 9-sinfdaligimda onam menga shirin choyga non to‘g‘rab berardi. Men kichkina bola emasman-ku deb aytolmasdim. Otam ham, onam ham ishsiz qolganlarida o‘qib, ishlab, oilamni boqishga harakat qilganman, eslaydi aktrisa.
U bozorlarda pirojki sotgan, farroshlik qilgan, ofitsiantlikdan kassirlikka o‘tgan. Bu jarayonlar esa uni kuchli, mehnatsevar ayolga aylantirgan.
O‘qib yurgan vaqtlarimda, hadeb yotoqxonada turaveramanmi deb 3-4 ta qizlar bilan ijarada turganman kvartirada. Bir kuni xonadon egasi uyida yo‘qolgan narsasini “sen olgansan, sen o‘g‘irlagansan” deb tuhmat qilgan. Shundan keyin uyga ketaman deb ko‘chada yig‘lab, uyqusirab uxlab qolganman, deydi aktrisa
Shahlo Zoirovaning turmushga chiqqaniga 12 yil bo‘ldi. U turmush o‘rtog‘ining doimiy qo‘llab-quvvatlovi sabab san’at sohasida o‘z yo‘lini topa oldi.
Meni mashhur bo‘lish orzum uchun qo‘llab-quvvatlagan inson — turmush o‘rtog‘im. “Sening orzularing ko‘p ekan, lekin hammasi asta-sekin bo‘ladi”, degan. Menga prodyuserlik qilgan ham aynan u. Birinchi uchrashuvimizda qo‘shiq aytib berganman. “Rosa ko‘p qobiliyatlaring bor ekan, buni hammasini ko‘rsatish kerak”, degan turmush o‘rtog‘im, deydi ijodkor.
U birga yashash, kelinlik vazifalari va sahna faoliyatini qanday uyg‘unlashtirayotgani haqida so‘z yuritar ekan, har bir oilada kelin-qaynona o‘rtasida kichik tushunmovchiliklar bo‘lishi mumkinligini tan oladi. Ammo sabr va hurmat bu vaziyatlarda eng katta kalit, deydi u. Chunki yoshligida ota-onasi aktrisaga doim sabr qil, og‘zingni yum, jim deb uqtirib kelgan.
Qaynonamni birinchi ko‘rganimda rosa o‘zimga o‘xshatganman. Bizni ko‘rganlar ham menga “rosa onangizga o‘xshar ekansiz-a deganida, qaynonam bo‘ladi” deb aytardim, deydi aktrisa.
Shahlo maktab davrida sinfdoshlarining kulgisi, moddiy yetishmovchilik, yo‘lkiraga pul topolmay ko‘chada uxlashga majbur bo‘lgan kunlarini ham eslab o‘tdi. U bozorda pirojki sotgan paytlarini “mening shaxsiy biznesim” deb ataydi.
“Boshqalarning oyoq kiyimini so‘rab kiyganman, yolg‘on gapirib, jismoniy tarbiyaga kerak deb olganman. Aslida esa o‘zimda oyoq kiyim yo‘q edi. Mana shunday holatlarda ham hech kimga dardimni aytmaganman, deydi u.
Bugungi Shahlo Zoirovaning yutuqlari aynan o‘sha og‘ir kunlarda egallangan sabr, mehnat va qat’iyat mahsuli.
Kim bo‘lishidan qat’i nazar, xoh u mendan kuchli inson bo‘lsin, xoh hali tanishmagan odam bo‘lsin — hattoki izohlar ostida haqorat qilsa ham — men hech qachon “meniki to‘g‘ri” demayman. Aksincha “siz to‘g‘ri gapiryapsiz, rahmat. Bu joyda aybimni to‘g‘rilayman” deb aytaman. Muhimi — qalb pokligi, deydi u.
Shahlo Zoirova kasbi taqozosi bilan doim omma e’tiborida ekanligi haqida gapirdi.
Ertalab chiroyli kiyinib chiqamiz, kechga borib bosh og‘rib qoladi. Turmush o‘rtog‘im “kamroq odamlar orasiga chiqaylik, biz haddan ortiq chiroyli oila ko‘rinamiz. Nazar, ko‘z degan narsa bor” deydi.
Mashhurlik bilan birga keladigan muhokamalar, noto‘g‘ri talqinlar Shahloni hech qachon tushkunlikka solmagan. U bu holatlarni tushunib, sabr bilan qarshi olganini aytadi:
Baribir taniqli bo‘lsangiz, sizni muhokama qilishadi. Ba’zan bir og‘iz so‘zimni teskari talqin qilishadi. Oilamni, turmush o‘rtog‘imni ko‘rsatmasligim ham sabab bo‘ladi. Lekin men o‘zimdan yaxshi energiya tarqatishga harakat qilaman. Muhokama qilishlariga hojat qolmasin, deyman.
Ijoddagi to‘siqlar va jamoadan ketish
Shahlo Zoirova jamoadan bekordan-bekorga ketmaganini aytadi. U har bir ishi, roli, loyihasiga mehr bilan yondashgan:
San’atdan pul topish, bu sohada o‘z o‘rningizni topish oson emas. Qiyinchiliklar, tanbeh, aldov, qizg‘anish, ishonchsizliklar juda ko‘p ekan. Aynan san’at sohasida haddan ortiq ekan.
Zoirova ko‘z yoshlarini hech qachon omma oldida to‘kmaydi. Turmush o‘rtog‘i unga “Men yo‘q joyda hech qachon yig‘lama” deb aytadi.
“Men o‘zimni bosib turaman, ichimdan yig‘layman. Lekin bu dunyoda yig‘lamaslikning iloji yo‘q, deydi komik aktrisa.
“Sabr va shukr — ikki kalitim bor”
“Men sabr qildim. Ko‘p qiynaldim, ammo hech kimdan alamzada emasman. Alloh sabrim uchun meni mukofotladi. Shuning uchun ikki kalitim bor: sabr va shukr”, deydi Shahlo.
Ayolligingizni unutmang. Har qanday holatda ham sabrli bo‘ling, kuchli bo‘ling. Eng muhimi, o‘zingizga ishoning. Maslahatni esa avvalo yuragingizdan eshiting. Qanday vaziyat bo‘lmasin, tabassumni unutmang, deya yurakdan maslahat berdi Shahlo Zoirova.
Izoh (0)