Mashhur xonandalarning kliplari orqali tanilgan, bir muddat boshlovchilikda ham o‘zini sinagan professional kaskadyor va aktyor, bugungi kunda besh farzandning otasi Yigitali Mamajonov 35 yoshni qarshiladi. Shu munosabat bilan aktyorning hayoti va ijodiy faoliyatiga nazar tashlaymiz.
“Men Moskvada dunyoga kelganman”
— Dadam savdogar inson bo‘lganlar. Dastavval savdoni meva-sabzavot mahsulotlarining savdosi bilan boshlagan, keyinchalik esa valyuta savdosi bilan shug‘ullanganlar. Dollar u vaqtlarda yurtimizda yo‘q edi. Bo‘lsa ham sanoqli insonlarda bo‘lgan. Dadam asli O‘zganda dunyoga kelganlar. Dadam tengi insonlar hozir ham dadamni juda yaxshi bilishadi. Ular sportchi bo‘lgan.
Meva-sabzavotlarni O‘zbekistondan olib, Rossiyaga sotgan. O‘sha vaqtlarda onam bilan tanishishgan. Ular turmush qurgan va men Moskva shahrida dunyoga kelganman. Moskvada uyimiz bo‘lgan. Uch yoshimda ota-onam ajrashganlaridan so‘ng, alohida yashaganmiz. Dadam sakkiz yoshimda olamdan o‘tganlar. “Bo‘ldi, sizlarni ham o‘zim bilan olib ketaman”, degandilar o‘sha kelganlarida. Ammo o‘sha voqeadan uch oy o‘tib, baxtsiz hodisa sababli vafot etganlar. Aka yoki ukalarim bo‘lmagan, deydi Yigitali.
“Ilk daromadimni sovuqda ishlab topganman”
— Birinchi gonorar bilan bog‘liq xotiralar insonni quvontirishi kerak. Ammo menda unday emas. 2011-yili davlat filmida suratga tushganman. Bu filmdagi ilk katta rolim edi. Davlat filmi, shart-sharoitlar boshqacha bo‘ladi, degan umid bo‘lgan. Adashmasam, qish oyi edi. Sovuqda eshakdek (shunday deyishga majburman) ishlab, hamma ish bitganidan so‘ng qo‘limga 870 ming so‘m gonorar berishgan, deydi aktyor Yigitali Mamajonov.
“To‘ylarda ham boshlovchilik qilganman”
— “Shu ishni qila olmaysan”, degan gapni yoqtirmayman va shu gapni aksini takrorlagim keladi. Yoshligimda omma oldida gapirishga, intervyu berishga uyalar edim. Birinchi bergan intervyularimni ko‘rgim kelmaydi. Ma’lum vaqt to‘ylarda boshlovchilik qilganman. To‘y insonni pulga qiziqtiradi, ammo ijodini to‘xtatib qo‘yadi. Shuning uchun to‘ylarimni ko‘paytirishga harakat qilmasdim. To‘yda janjalli holatlar bo‘lmagan, san’atkormiz, hurmatimizni bilib, ibrat bo‘lishga harakat qilganmiz. To‘ylarda birinchi chiqishlarimda 200 dollar gonorar olganman. Keyinchalik 400-500 dollar haq olardim. Oxirgi to‘yim bir qadrdonimizning to‘yida ayolim bilan birgalikda boshlovchilik qilganmiz, deydi Yigitali Mamajonov.
Yigitali Rossiyada antenna o‘rnatib, kuniga 150-200 dollar pul topgan
— Mohirilla aka degan usta akamiz, menga Rossiyada antenna qo‘yishni o‘rgatdi. U akani ham boshidan juda qiyin kunlar o‘tgan ekan. Eng qiyin, baland tomlarga chiqib antenna qo‘yardim. “Ali unaqa baland joylarga chiqmang, pastroqqa qo‘yaveramiz”, deb xavotir olib o‘tirardi. Rossiyada to‘rt oy vaqt davomida antenna qo‘yganman. Bu ishdan kuniga 150-200 dollar pul topardim. Ustamni topishini ko‘rib, “menga 150 dollar kammasmikan”, deb o‘ylab qolardim. Bu juda qiyin kasb edi.
O‘sha vaqtlarda “Oyqiz ertagi” filmida bosh rolni ijro etish uchun 6 million so‘m gonorar beramiz, deb chaqirishgan. O‘sha film uchun Rossiyadan qaytganman, deydi aktyor.
“Eng katta gonorarni Rayhon bergan”
Yigitali Mamajonov sobiq rafiqasi bilan ijodiy hamkorlik va kliplar orqali tanilganidan uyalmaydi.
— Rayhonning klipi tramplin bo‘ldi. Undan keyin Lola klipi syomkasiga chaqirdi. Kamerani o‘zimga berib qo‘yishdi, real hayotni ko‘rsatib bergandek bo‘lasiz. Ular boshqacha g‘oyalar bilan muxlislarni hayratda qoldiradigan ijodkorlar edi. Loladan keyin Rayhon “Samoda” deb nomlangan klipiga chaqirdi. Eng katta gonorarni ham Rayhonning klipidan olganman, chunki o‘sha paytda o‘zimni yulduz deb o‘ylaganman. Birinchi, ikkinchi kliplarim bilan tanilib bo‘lgandim. Qo‘limga oz-muncha pul berishgan, lekin u pul menga kerakmas edi, sababi maza qilib ijod qilganman, deydi u.
“Kliplar sabab Yigitali Mamajonov bo‘ldim”
— Agar umumiy xulosa qiladigan bo‘lsak, mening hayotimda kliplar alohida o‘ringa ega, chunki o‘sha kliplar sabab Yigitali Mamajonov bo‘ldim, hozirgi darajaga yetib keldim. Bu narsalarni inkor etib bo‘lmaydi. Inson baribir kimligini unutishi kerak emas. Men bu narsadan uyalmayman va g‘ururlanib aytishimning sababi aynan kliplar professionalizm darajasiga chiqib, syujetlar qiziqarli cho‘qqiga yeta boshlaganida ijodimni boshlaganman. Bu ham bir omad. Institutdagi guruhimizda 25 ta bola bor edi, orasida mendan ham iste’dodlilari bo‘lgan. Biroq kliplarga aynan meni chaqirishgan. O‘rtacha iste’dodli bola edim, o‘zimni zo‘rman deya olmasdim, deydi aktyor.
“Rayhonning uyida ichkuyov edim”
O‘zbekistonda xizmat ko‘rsatgan artist Rayhon G‘aniyeva va aktyor Yigitali Mamajonov 2012-yilning noyabrida turmush qurgan. Juftlik 2014-yil may oyida egizak farzand ko‘rgan bo‘lib, ularga Islom va Imron deb ism qo‘yishgan. 2016-yilning mayida esa Rayhon va Yigitalining nikohi rasman bekor qilingan. Egizak o‘g‘illar xonanda Rayhon qaramog‘ida qolgan.
— Men bir marta ichkuyovlikning issiq-sovug‘ini tatiganman. Birinchi sobiq ayolim Rayhon to‘yimizdan oldin menikida yashaymiz, deb aytganida men rad qilishga uringanman. Ichkuyovlik bu uyat, men erkak kishiman, sening uyingda yashash mening g‘ururimga tegadi, kel, yaxshisi, ijarada yashaymiz, deganman. Rayhon “Mening onam vafot etgan. Onamdan yolg‘iz yodgorim — singlimni bu katta uyga qanday qilib tashlab ketaman? Kim qaraydi unga? Yaxshisi, vaziyatni murakkablashtirmaylik, axir biz bir oila bo‘lamiz, seniki-meniki yo‘q, hammasi bizniki”, deb aytgan. Uylanishimdan oldin men o‘zim bilmagan holda notariusda nikoh shartnomasiga qo‘l qo‘yib kelgan ekanman. Keyin bilsam, u shartnomada agar biz ajrashsak, hamma o‘z mol-mulki bilan qolishi haqida band bo‘lgan ekan.
Men o‘shanda u qanday shartnoma ekanini bilib qolganimdan keyin Rayhonga “Demak, siz menga ishonmayotgan ekansiz-da, mening tuyg‘ularim siz uchun ahamiyatsiz ekan-da”, deganimda u yoshi katta qarindoshlari shuni xohlashayotganini aytgan. Hozir o‘ylab qarasam, hammasini o‘shanda to‘xtatishim kerak bo‘lgan ekan. U vaqtda to‘yimizga ozgina vaqt qolgandi. Men hammasini yaxshilikka yo‘yib, uylanaman dedimmi, tamom, uylanaman, deb qaror qabul qilganman.
O‘ylasam, Rayhon o‘shanda ehtiyotkorlik jihatidan aqlli ish qilgan. Lekin men 100 foiz Rayhondan unday narsalar talab qilmas edim. O‘zi men uning uyida yashashim uyatli narsa, men yana qanday qilib boshqa narsa talab qilishim mumkin? Undan ko‘ra o‘lib keta qolay. Unaqa harom luqmani yeganimdan ko‘ra o‘lib ketganim yaxshi, deydi aktyor.
“Farzandlarim otasini so‘raydi” — Rayhon
Rayhon G‘aniyeva farzandli bo‘lishni uzoq vaqt orziqib kutgan. 2014-yili u bir emas, ikkita o‘g‘il farzandlarni dunyoga keltirdi, ammo o‘sha paytda bolalarni otasidan ajratish unga ham oson kechmagani aniq.
— Farzandlarim otasini so‘raydi, albatta. Ular tez-tez ko‘rishib turadi. Bundan tashqari, men o‘zim Yigitalidan ular bilan tez-tez ko‘rishishini, muloqot qilishini so‘rayman. Har doim farzandlarimni otasini hurmat qilishga, sevishga o‘rgataman, chunki u o‘g‘illarimning otasi, deydi Rayhon G‘aniyeva.
“Qozog‘istonlik qizga uylandim, ammo bir-birimizga to‘g‘ri kelmadik”
Yigitali Mamajonov Qozog‘istondagi ijodiy safarlari chog‘ida esa Nigina ismli qiz bilan tanishib qolgan va turmush qurish taklifini bergan. Uning ikkinchi turmushidan qiz farzandi bo‘lib, u 2018-yilning 17-fevral kuni Qozog‘istonning Chimkent shahrida dunyoga kelgan. Ammo aktyorning bu munosabati ham uzoqqa cho‘zilmagan.
— Ikkinchi ayolim ham bir sinov bo‘ldi. Inson baxtli bo‘lishga arzimaydimi, uni baxtli qila olaman, deganman. Ikkinchi ayolimning ham birinchi turmushi bo‘lmagan. Birinchi turmushidan bir-ikki yil o‘tib uchrashib qolganmiz. Qandaydir bir jihatlari yoqqani uchun, ham erkak kishi so‘qqabosh bo‘lib, bo‘ydoq yurishi yaxshi bo‘lmagani uchun unga turmushga chiqishni taklif qilganman. Ozgina birga yashadik. Ularning tarbiyasi bizning tarbiyamizga to‘g‘ri kelmas ekan. Ularni ham yomonlamayman. Ikkinchi ayolim o‘zimdan to‘rt yosh kichkina edi. U ham hayotida o‘ziga yarasha qiyinchiliklarni, har xil odamlarni ko‘rgan, oilaviy muammolarni bilgan, turli sinovlardan o‘tgan edi.
Mening xarakterim juda og‘ir, aytgan gapimni qildirmasam bo‘lmaydi. Bir narsani undan juda qattiq iltimos qilganman, aytganimni qilmagan, u burchga rozi emasman, o‘zim bilganimni qilaman, degan. Unda mayli, bilganingni qilaver, deganman. Qilmayman, degandan so‘ng uni urib, johillik bilan aytganingizni qildirmaysiz-ku, to‘g‘rimi? Shundan so‘ng u tomonga qarab yo‘l yurilmagan. Demak shunday bo‘lishi kerak ekan, bu ham xatolarimdan biri bo‘lgan, deydi aktyor.
“Uchinchi ayolim bilan turmush qurganimizni ommadan yashirganman”
Aktyor Yigitali Mamajonov turmush o‘rtog‘i aktrisa Muqaddas Saʼdullayeva bilan 2018-yilda tanishgan. Ularning uchrashuviga “O‘zimizning yigitlar” nomli shou dasturi sabab bo‘lgan. Aktrisa o‘g‘li Abubakrni dunyoga keltirgunga qadar Yigitali bilan oila qurganini yashirgandi.
— Ayolim bilan ko‘rsatuv syomkasida tanishganmiz. U paytda menga ham, unga ham qiyin vaziyat edi. Oilaviy ajrimdan keyingi ruhiy muammolarni yengish uchun vaqt va ruhiy madad kerak. Biz avvaliga bir-birimizga ruhiy ko‘mak berish uchun gaplashganmiz. Keyinchalik munosabatlarimiz jiddiylashgan. Uning sabrli ekanini va aytgan gapimni qonundek qabul qilishini sezganman. Avvaliga oila qurganimizni odamlardan yashirganmiz, ammo o‘g‘lim tug‘ilish arafasida hammasi oshkor bo‘lgan, deydi Yigitali Mamajonov.
“Tug‘uruqxonada ikkimizni ko‘rib hayron qolishgan”— Muqaddas Sa’dullayeva
Yigitali Mamajonovning uchinchi turmushidan Abubakr va Xadicha ismli farzandlar dunyoga kelgan. U hozirda Muqaddas Sa’dullayeva bilan baxtli turmush kechirmoqda. Aktrisa ko‘z tegishi sabab turmush o‘rtog‘ining xohishi bilan oila qurishgani ma’lum qilinmagani haqida gapirdi.
— Turmush o‘rtog‘im ham mengacha ikki marta oila qurgandi. “Men avvalgi oilalarimni ommadan yashirmagandim. Menimcha ko‘z tegdi. Shu bois siz bilan bo‘lgan nikohimizni hozircha hech kimga aytmaymiz”, degan. Uning gapini qonun deb bilganim uchun oila qurganimizni eng yaqin dugonam Shahzoda Muhammedovaga ham aytmaganman. Homilador bo‘lmasimdan avval birga restoranlarga borardik. Ammo homiladorligim sezila boshlagach, hatto birga ko‘chaga ham chiqmaganmiz. Baʼzan bu holat qachongacha davom etarkan, deb ko‘p o‘ylardim. Tug‘ruq kunim kelganida birgalikda tug‘uruqxonaga borganmiz. Ikkimizni birga ko‘rib, ko‘pchilik hayron qolgan. O‘g‘lim Abubakr dunyoga kelganidan keyin menga ajoyib syurpriz tayyorlaganlar. Yaʼni oila qurib, farzandli bo‘lganimizni ommaga oshkor etgan. Yig‘lab yuborganman, deydi aktrisa Muqaddas Saʼdullayeva.
“Ayolimning rashki sabab ajrim yoqasiga keldik”
Muqaddas bir necha yildan buyon deyarli ijod qilmaydi. Faqatgina turmush o‘rtog‘i bilan partnyor sifatida suratga tushadi, xolos. 2022-yili esa Muqaddas va Yigitalining munosabatlariga darz ketgani va ular alohida yashayotgani maʼlum bo‘ldi. Aktrisa turmush o‘rtog‘ining xonadonidan ketgani va farzandlarini yolg‘iz tarbiyalayotgani haqida bir necha videolar joyladi. Yigitali Mamajonov keyinchalik buning sabablarini va Aysanemxon Yusupova bilan munosabatlari haqida gapirdi.
— Har bir aktyorning o‘ziga yarasha metodikasi bor. U o‘zi uchun muayyan holatga kirish uchun yo‘nalish tanlab oladi. Aysanemxon bilan kliplar, seriallar orqali tanishmiz, lekin yaqinmasmiz. U qiz bilan sevishib, muhabbatni boshdan kechirmadik. Mening filmdagi obrazim Rustam Aysanemxonning obrazini sevadi. Men filmda Rustamga aylandim. Syomka tugaganidan keyin holatdan chiqdim. Har bir erkakning o‘z dididagi ayoli bo‘ladi. Aysanemxon mening didimdagi qiz emas. Ayolim juda qattiq rashk qiladi. To‘g‘ri, sevgani uchun rashk qiladi, lekin bu mening ishim, erkak kishimiz biz, tirikchilik sababi kino. Ishimni yaxshi ko‘raman, shuning uchun ayollardan iltimos, erkak kishining shaxsiy hududini buzmang, deydi u.
“Telbalarcha sevilishga men tayyor emasman”
— Oilamiz kuchli rashk sabab ajrim yoqasiga keldi. Telbalarcha bir insonni sevish — psixologik yaxshi narsa emas. Buning oqibatida fojialar yuz berishi mumkin. Eng yengili oila buzilishiga, keyinroq esa o‘limgacha olib keladi. Ayol kishi o‘zi bilib-bilmay, ko‘nglingizni og‘ritadigan, nafsoniyatingizga tegadigan gaplarni gapirib qo‘yadiki, shunaqa paytda “Shuncha umrimni, vaqtim, energiyamni shu ayolga sarflab kelayotganim qanchalik to‘g‘ri ekan? Bundan keyin hayotimni baxshida qilib, bu inson bilan yashash to‘g‘rimikan, arzimaydi-ku bu inson?”, deb o‘ylab qolasiz. Bu fikr sekin-asta kuchayaveradi, kuchayganidan keyin yana gapirib qo‘yadi. Aynan mana shunday vaziyat 7 oy avval bizning oilamizda ham bo‘lgan. Rashk, qattiq yaxshi ko‘rish shaxsan menga kerak emas. Jinnilarcha yaxshi ko‘radigan insonga siz bo‘yin egib yashashingiz kerak, men bunday sevgiga tayyor emasman. Bu narsa meni bezillatadi. Bu dunyoda hech bir jonzot haqiqiy, tubsiz, beg‘araz sevgiga arzimaydi. Bunday sevgiga faqat Alloh munosib. Meni bunday sevishlari kerak emas. Ayol kishi erini hurmat qilishi kerak, deydi Yigitali Mamajonov.
Oradan bir necha oy o‘tib, oila rishtalari qayta tiklandi. Yigitali turmush o‘rtog‘i bilan munosabatlari yaxshilangach, oilaviy Umra safariga borib qaytishdi. Undan so‘ng bir muddat teleko‘rsatuvda birgalikda boshlovchilik qilishdi.
Yigitali Mamajonov “Mendirman Jaloliddin” tarixiy seriali kastingidan nega norozi?
— Jaloliddin Manguberdi tarixiy serialining kastingiga chaqirishdi. Kastingga bordim, juda zo‘r deya olmayman, chunki birdan, juda tez bo‘lib ketdi. “Qo‘lingdan nima keladi”, deyishdi. O‘zim haqimda ma’lumot berdim. O‘qiganimni, serial, kino, kliplarda suratga tushganimni ma’lum qildim. “Ot minishni bilasanmi?”, deyishdi, “Fil minishni ham bilaman”, dedim. “Xohlasangiz tryuklar ham qila olaman”, dedim, uni ham ko‘rsatganimdan so‘ng “Voy, zo‘r, Yigitali”, deb qoyil qolishdi. Ammo meni bu rolga olishmadi, chunki Jaloliddinni o‘ynayotgan turk aktyori men ko‘rsatgan ishlardan birortasini qila olmas edi. Ularga bu narsalarni qilishga ancha bor. Maqtanish emas, hali ancha bor. Chunki bu ishlarni u aktyorlarning o‘rniga qilishi uchun kaskadyorlarga pul to‘lashadi va ular qilishadi. Biz esa bu ishlarni o‘zimiz qilamiz. Kerak bo‘lsa rolni ulardan yaxshi o‘ynab bera olamiz, faqat yaxshi rejissyor bilan ustimizda ishlasak kifoya. O‘sha rol bilan yashaymiz, kerak bo‘lsa. Xullas keyin serialga chaqirilganim ham yo‘q, deydi aktyor.
“Gonorari qimmat aktyorman”
Yigitali Mamajonov 20 dan ortiq film va seriallarda bosh rollarni ijro etgan. 40 dan ortiq videokliplarda suratga tushgan.
— Ko‘p gonorar so‘raydigan aktyorlar toifasiga kiraman. Mehnatimga yarasha so‘rayman, chunki olgan pulimni har doim oqlaganman. Shu kungacha ham birinchi navbatda ssenariyga qaraganman, bundan keyin ham shunday bo‘ladi. Agar ssenariy yaxshi bo‘lmasa, men u filmda suratga tushmayman. Yolqin To‘ychiyev, Ayub Shahobiddinov, Sanjar Matkarimov, Mansur Vasatining filmlarida suratga tushishni xohlayman. Tanimagan rejissyorlarimni rad etishim mumkin. Shunda ham birdan rad etmayman — ular bilan suhbatlashaman. Agar suhbat jarayonida u meni nimagadir ishontira olsa, film ssenariysini o‘qib chiqib, rozilik bildirishim ham mumkin.
Men suratga olish ishlari davomida Yulduz Rajabova, Asal Shodiyeva bilan yaxshi til topishib ishlaganman. Odatda partnyor tanlamayman. Muhimi, fikrimiz to‘g‘ri kelsa, men bog‘dan kelganimda, sherigim tog‘dan kelmasa bo‘ldi, deydi aktyor.
Izoh (0)