“Oppog‘oy” ertagining yangi talqinida bosh rolni ijro etgan aktrisa Reychel Zegler film muvaffaqiyatsizligi tufayli tanqidlarga dosh berish uchun psixiatr yordamiga murojaat qilgani haqida so‘zlab berdi.
Film muvaffaqiyatsiz chiqqach, aktrisa oila davrasida vaqt o‘tkazish uchun ota-onasinikiga — Nyu Jersiga yo‘l oldi.
“Men bunday holatlarga juda ta’sirchanman, axir bu mening shaxsiy mag‘lubiyatim emas-ku?! Qolaversa, hayotda undan ham battar voqealar bo‘lishi mumkin”, deydi u.
Zegler psixiatr qabulida tez-tez bo‘lganini, mutaxassis unga xavotirni kamaytiruvchi dorilar yozib berganini aytdi. Aktrisaning so‘zlariga ko‘ra, dori-darmonlarsiz u “umuman yashay olmasdi”.
“Mening psixiatrim bu vaqt ichida doim yonimda bo‘ldi”, deydi u.
Avvaldanoq filmdagi bosh qahramon uchun Zeglerning tanlanishi katta bahs-munozaralarga sabab bo‘lgan edi. Klassik ertak muxlislari “qor kabi oppoq” deb tasvirlangan qahramonni lotin amerikalik aktrisa ijro etishiga norozilik bildirgan.
Bunga javoban Reychel Zeglerning ba’zi bayonotlari tanqidni yanada kuchaytirgan: u 1937-yilda suratga olingan asl multfilmni “eskirgan”, undagi romantik voqealarni esa “sog‘lom munosabatlardan yiroq” deb atagan. Aktrisaning aytishicha, yangi versiyadagi Oppog‘oy kuchli va yetakchi ayol obrazi sifatida namoyon bo‘lishi lozim edi.
Disney’ning ushbu loyihasi IMDb’da rekord darajada past — 10 balldan atigi 1,6 ball baho oldi. Platformada 50 ming va undan ortiq ovoz to‘plagan filmlar orasida bu eng past ko‘rsatkichdir. Forbes ma’lumotlariga ko‘ra, 270 million dollarlik byudjet bilan suratga olingan film prokatda atigi 87,3 million dollar yig‘a olgan.
Izoh (0)