Bugun, 27-iyun kuni “Kalmar o‘yini” serialining yakunlovchi uchinchi mavsumi Netflix platformasida premyera qilindi. Bu serial zamonamizning eng mashhur shoularidan biri hisoblanadi. Final munosabati bilan birinchi va ikkinchi mavsum voqealarini eslatib o‘tmoqchimiz.
Birinchi mavsumda nima bo‘lgandi?
Qarzga botib ketgan qimorboz Son Ki Xun metro bekatida bashang kiyingan erkak bilan bolalar o‘yini — ttakchi o‘ynashga rozi bo‘ladi. Yutsa, u 100 000 von oladi, yutqazsa shapaloq yeydi. Bir necha muvaffaqiyatsiz o‘yinlardan so‘ng, Ki Xunga ramzlar tushirilgan tashrif qog‘ozi beriladi va katta yutuq tikilgan o‘yin o‘ynashga taklif etiladi. Qahramon rozi bo‘ladi va boshqa 455 ishtirokchi bilan birga sirli joyga boradi. U yerda ularga asosiy qoida tushuntiriladi: musobaqadan chiqqan har bir ishtirokchi sovrin jamg‘armasini 100 million vonga ko‘paytiradi. Boshqacha aytganda, 45,6 milliard von tikilgan, ammo bu pulni faqat g‘olib oladi.
“Sekin yursang, uzoqqa borasan” degan birinchi o‘yinda maydon bo‘ylab yugurish paytida ishtirokchilar mag‘lublar nafaqat o‘yindan chiqib ketishini, balki halok bo‘lishini tushunib yetishadi. Biroq omon qolganlar o‘yinni davom ettirish yoki tark etishni tanlash huquqiga ega. Tirik qolganlarning aksariyati o‘yinni to‘xtatishga ovoz beradi. Ishtirokchilar uylariga qaytishadi, ammo tez orada yashash uchun na istagi, na mablag‘i borligini anglashadi. Ki Xunga onasining jarrohlik amaliyoti uchun pul kerak, qahramonning maktabdosh do‘sti va moliyachi Chxo San U bir paytlar o‘g‘irlagan pullarni qaytarishi lozim, qochqin Kan Se Byok ota-onasini Shimoliy Koreyadan olib chiqishni rejalashtirmoqda, 001 raqamli o‘lim to‘shagidagi O Il Nam esa shunchaki o‘yinda jon berishdan cho‘chimaydi.
Qahramonlar qaytib kelishadi, guruh tuzib, boshqa ishtirokchilarni aldashga kirishadi. Tashkilotchilar nizolar va qotilliklarni rag‘batlantiradi. Ikkinchi o‘yin “Shakarli shirinlik” bo‘lib, unda igna bilan karameldan murakkab shakllarni sindirmasdan kesib olish kerak. Uchinchisi — “Arqon tortish”, to‘rtinchisi esa — “Sharchalar” bo‘lib, unda har qanday usul bilan raqibning sharchalarini olish maqsad qilinadi. Kimdir o‘zini qurbon qilib, sharchalarini ixtiyoriy ravishda raqibiga beradi, boshqalar kuch yoki aldov yordamida g‘alaba qozonadi. Ki Xun xotirasi pasaygan keksa Il Namni o‘z g‘alabasiga ishontiradi — 001-raqamli o‘yinchi o‘yindan chiqib ketadi.
Beshinchi o‘yin — “Shisha ko‘prik”: ishtirokchilar toblangan va oddiy shisha plitali ko‘prikdan o‘tishlari kerak. Musobaqada uch kishi — Ki Xun, Chxo San U va og‘ir jarohat olgan Kan Se Byok tirik qoladi. Chxo San U so‘nggi topshiriqni kutayotib, qizni o‘ldiradi.
G‘olibni bolalarning so‘nggi o‘yini — “Kalmar o‘yini” aniqlaydi. Hal qiluvchi lahzada Son Ki Xun do‘stini o‘ldirishdan bosh tortadi va sovrinni bo‘lishishni taklif qiladi, ammo Cho San U o‘zini o‘zi o‘ldiradi. Qahramon uyiga qaytgach, onasidan ayrilganini biladi. Bir yil o‘tgach, Son Ki Xun o‘yinning haqiqiy tashkilotchisi — to‘shakka mixlangan keksa O Il Nam bilan uchrashadi. U o‘limi oldidan o‘zini va o‘zi kabi zerikkan boylarni ovuntirmoqchi bo‘lganini, bolalar o‘yinlari mavzusini esa sog‘inch tufayli tanlaganini tan oladi. Yakuniy qismda Ki Xun Il Namning o‘limidan so‘ng ham o‘yinlar davom etayotganini bilib qoladi va begunoh odamlarning o‘limini butunlay to‘xtatish uchun yana o‘yinga qaytishga qaror qiladi.
Ishtirokchilar o‘yinda omon qolish uchun kurashayotgan paytda, politsiyachi Xvan Chun Xo yo‘qolgan akasini izlaydi. Akasining narsalari orasidan ramzli tashrif qog‘ozini topadi. U Ki Xunni va keyinchalik qahramonni o‘yinga qayta olib ketgan odamlarni kuzatishni boshlaydi. Chun Xo tashkilot askari qiyofasida orolga yashirincha kirib oladi.
Chun Xo tergov boshlaydi: dalil to‘playdi, hujjatlarni suratga oladi, xodimlar iyerarxiyasini, halok bo‘lgan ishtirokchilarning a’zolarini sotishni, garov o‘ynayotgan VIP mehmonlarni va o‘yinlarning ko‘p yillik tarixini o‘rganadi. Ma’lum bo‘lishicha, qahramonning akasi Xvan In Xo nafaqat o‘tgan o‘yinlardan birining g‘olibi, balki qora niqob ostida yashiringan hozirgi o‘yinlarning boshlovchisi ham ekan. Mavsum yakunida Xvan In Xo ukasiga kelishuv taklif qiladi, ammo politsiyachi rad etgach, unga o‘q uzadi. Yarador qahramon qoyadan suvga qulab tushadi.
Ikkinchi mavsum qanday davom etdi?
Ikki yildan buyon Son Ki Xun o‘yinning yangi tashkilotchilarini tinmay izlab, yutgan barcha pulini shunga sarflaydi. Bir kuni Ki Xunning ikki xodimi bir erkakni topib, uni ta’qib qilishadi va tuzoqqa tushib qolishadi: yollovchi ularni bog‘lab, rus ruletkasini o‘ynashga majbur qiladi. Xuddi shunday garovni yollovchi tez orada Ki Xunga ham taklif etadi — qahramon g‘alaba qozonadi.
Birinchi mavsum finalidan so‘ng tirik qolgan politsiyachi Xvan Chun Xo akasini izlashni davom ettirib, Ki Xunning iziga tushadi. Qahramonlar tashkilotchilarni to‘xtatish uchun birlashadi va yollovchining narsalari orasidan Xellouin kechasi o‘tkaziladigan tungi klub manzilini topadilar. Klubga bostirib kirish chog‘ida tashkilotchilar Ki Xunni o‘g‘irlab ketishadi va qidiruvni to‘xtatishni talab qilishadi — bunga javoban qahramon o‘yinga qaytishni so‘raydi.
Yangi o‘yinlar. Son Ki Xun yangi ishtirokchilar orasida uyg‘onib, yangilikdan xabar topadi: har bir o‘yindan so‘ng ovoz beriladi — agar ko‘pchilik o‘yinni davom ettirishni rad etsa, to‘plangan sovrin puli omon qolganlar o‘rtasida taqsimlanadi. Ki Xun iloji boricha ko‘proq ishtirokchini qutqarish uchun “Sekin yursang, uzoqqa borasan” o‘yinining qoidalarini barchaga tushuntiradi, ammo baribir qurbonlardan qochib bo‘lmaydi. Keyingi ovoz berishda ko‘pchilik o‘yinlarni davom ettirishni tanlaydi — hal qiluvchi ovoz Xvan In Xoga tegadi. U birinchi mavsumdagi Il Nam singari o‘zini 001-raqamli ishtirokchi sifatida ko‘rsatadigan boshlovchidir.
001-raqamli o‘yinchi va boshqa ishtirokchilar Ki Xunning tajribasi hammaga keyingi sinovlardan oson o‘tishga yordam beradi, deb o‘ylaydi. Yangi o‘yinchilar orasida shov-shuvli reper Tanos, Ki Xunning do‘sti va unga o‘xshash qimorboz Pak Chong Be, omadsiz Pak Yon Sik onasi (Kan E Sim) bilan hamda transgender ayol Cho Xyon Chju bor. O‘yinchilar Ki Xunda bo‘lmagan musobaqalardan o‘tishadi: beshta bolalar o‘yinidan iborat to‘siqlar yo‘lakchasiga ega “Beshkurash” va “Uchinchisi ortiqcha”.
Politsiyachi Chun Xo sudxo‘rlar guruhi bilan birgalikda dengizda o‘yin o‘tkaziladigan joyni izlamoqda. Tashkilotchilar Ki Xunning tishiga yashirilgan kuzatish qurilmasini olib tashlashgani sababli qahramonlar aniq joylashuvni aniqlay olmaydi. Ko‘p o‘tmay, jamoa a’zolaridan biri tashkilotchilar uchun ishlaydigan va kerakli orolni topishga faol ravishda to‘sqinlik qilayotgan ikki tomonlama josus ekani ayon bo‘ladi.
“Uchinchisi ortiqcha” o‘yini tugagach, navbatdagi ovoz berish o‘tkazilishi lozim edi. Ishtirokchilar orasida mushtlashuv bo‘lib, Tanos halok bo‘ladi. O‘yinni davom ettirish tarafdorlari o‘ch olishga qaror qilishadi va tunda o‘yinni to‘xtatish uchun ovoz berganlarga hujum qilishadi. Qirg‘in paytida Ki Xun guruhi yashirinib, qo‘zg‘olon rejasini pishitadi. Ishtirokchilarni ajratish uchun askarlar yetib kelganda, qahramonlar qurollarni qo‘lga olib, dispetcherlik xonasiga yetib borish va o‘yinni to‘xtatish maqsadida isyon ko‘taradilar. Xonaga yaqinlashganda, Xvan In Xo ishtirokchilarga xoinlik qiladi, o‘z o‘limini sahnalashtiradi va tashkilotchining qora libosida Ki Xunning ko‘z oldida Pak Chon Beni o‘ldiradi.
Izoh (0)