Yaponiya seriallarida tomoshabinlar e’tiborini tortadigan o‘ziga xos jihatlar ham bor. Quyida turli janrlarda suratga olingan, e’tibor qaratishga arzigulik yapon doramalaridan iborat to‘plam tayyorladik.
“Noodatiy o‘lim” (2018)
Misumi Mikoto ajoyib patologoanatom hisoblanadi. U “G‘ayritabiiy o‘lim” laboratoriyasida ishlaydi. Laborant Syoji Yuko va yangi xodim Kube Rokuro bilan birgalikda Misumi turli jinoyatlar qurbonlarining jasadlarini yorib o‘rganadi. Aynan ularning ishi eng murakkab va chigal jinoyatlarni fosh etishga yordam beradi.
Har bir qismi alohida hodisaga bag‘ishlangan jinoiy-tibbiy serial. Aktyorlarning mohirona ijrosi va qiziqarli voqealar rivoji tomoshabinni o‘ziga rom etadi. Yaponiyaning ushbu seriali “C.S.I. Jinoyat joyi”, “Dengiz politsiyasi: maxsus bo‘lim”, “Jinoyatchi kabi fikrlash” va shunga o‘xshash filmlar muxlislariga, shubhasiz, ma’qul keladi.
“O‘qituvchining kundaligi” (2018)
Suenaga Xidziri bolalikdan o‘qituvchi bo‘lishni orzu qilgan. 25 yoshli ayol uzoq qishloqda o‘qituvchilik faoliyatini boshlaydi. Unga ishi juda yoqadi, biroq Suenaguni shaxsiy hayotida sinovlar kutmoqda. Universitetda o‘qiyotgan paytidanoq uchrashib yurgan sevgilisi Osakaga xizmat safariga jo‘nab ketadi. Ayriliq sevishganlar uchun haqiqiy sinovga aylanadi. Buning ustiga, yuqori sinf o‘quvchilaridan biri to‘satdan Xidziriga sevgi izhor qiladi. O‘qituvchi uning tuyg‘ulariga javob qaytarishga haqqi yo‘qligini tushunadi. Ammo ko‘p o‘tmay Suenaga Akiraga ko‘ngil qo‘ya boshlaganini anglaydi.
Ushbu romantik serial tomoshabinlar tomonidan turlicha baholandi. Kimdir unda romantika yetishmadi desa, boshqalar o‘qituvchi va o‘quvchi o‘rtasidagi muhabbatni axloqsiz deb hisobladi. Biroq bir narsani tan olish kerak — aktyorlar rollarini ajoyib tarzda ijro etishgan, ularning qahramonlari bir-biriga nisbatan his qilgan tuyg‘ular esa tomoshabinlarni befarq qoldirmaydi.
“Qochish uyat, lekin foydali” (2016)
Mikura Moriyama — universitetni tugatgandan so‘ng nufuzli ish topa olmagan 25 yoshli qiz. Suzaki Hiramasa — uni uy bekasi sifatida ishga olishga qaror qilgan 36 yoshli bo‘ydoq erkak. Biroq tez orada oilaviy muammolar tufayli Moriyama barqarorroq va yuqori maoshli ish qidirishga ahd qiladi. Ammo Suzaki qizning uyidan ketishini xohlamaydi va unga soxta nikohga kirishishni taklif etadi.
Bu doramaning o‘ziga xos xususiyati shundaki, bosh qahramonlarning his-tuyg‘ulari va o‘zaro munosabatlari tabiiy ko‘rinadi. Hikoyaning hazil-mutoyiba uslubiga qaramay, kerakli paytlarda serial jiddiy tus oladi.
“Qahva va vanil” (2019)
Risa — aqlli, go‘zal qiz bo‘lib, atrofida oshiqlari sarson. Ammo u hech kim bilan munosabat o‘rnatishga shoshilmaydi, chunki yaqin orada o‘z insonini uchratishiga ishonadi. Kunlarning birida taqdir uni 30 yoshli tadbirkor Fukami Xiroto bilan yuzlashtiradi. Tashqi ko‘rinishidan bu odam sovuqqon va kirishimsiz tuyulsa-da, u nima xohlayotganini va bunga qanday erishish mumkinligini aniq biladi. Fukami Risa bilan birinchi uchrashuvdayoq uning hayotidagi birinchi va yagona erkak bo‘lishga qat’iy qaror qiladi.
“Aziz singlim” (2014)
Misaki va Xazuki bir-biri bilan kelisha olmaydigan opa-singillar. Misaki xuddi shamoldek beqaror, uning ertaga qayerda bo‘lishi va nima qilishini oldindan aytib bo‘lmaydi. Xazuki esa aksincha, juda mas’uliyatli qiz bo‘lib, to‘yga tayyorgarlik ko‘rmoqda va davlat muassasasida ishlaydi. Uzoq yillar davomida opa-singillar bir-birlari bilan gaplashmaydi, chunki har safar uchrashuv janjal bilan tugaydi. Kutilmaganda Misaki singlisining uyiga kelib, uning to‘yini buzadi va keyin u bilan birga yashashini e’lon qiladi.
Bu juda qiziqarli va jo‘shqin drama bo‘lib, uning syujetida ko‘plab dolzarb muammolar ochib berilgan. Opa-singillik muhabbatining asta-sekin uyg‘onishi ham juda ta’sirli tasvirlangan.
Izoh (0)