2025-yil 2-fevral kuni iste’dodi, xarizmasi va betakror uslubi bilan butun dunyoni zabt etgan xonanda Shakira tavallud kunini nishonladi. Undagi maftunkor ovoz, plastik raqslar va Lotin Amerikasi, arab va pop-motivlarning betakror uyg‘unligi xonandani zamonaviy musiqa ramziga aylantirdi.
Yulduzning tug‘ilishi
Uilyam Mebarak Shadid asli livanlik bo‘lib, bolaligidan shifokor bo‘lishni orzu qilardi. Biroq u shunchalik shubhaga beriluvchan ediki, risoladagidek ishlashning ham uddasidan chiqa olmasdi, chunki umr bo‘yi o‘ziga turli kasalliklarni o‘ylab topib, ularni davolash uchun ichishi kerak bo‘lgan dorilarni ham o‘zi belgilardi.
Keyinchalik u zargarlik buyumlarini sotishga qaror qilib, Nyu Yorkda kichik do‘kon ochadi, ammo omadi kelmaydi. Shaxsiy hayotidagi muammolar esa uni butunlay gangitib qo‘ygandi.
Sakkiz farzandni dunyoga keltirgan birinchi xotini vafotidan so‘ng, Uilyam Mebarak Kolumbiyadagi Barrankillya shahriga ko‘chib o‘tadi va bu yerda ham zargarlik do‘konini ochadi. Unga sotuvchi sifatida yollangan ispan va italyan millatiga mansub yosh Nidiya Ripoll Torrado keyinchalik unga turmushga chiqadi — ularning Shakira Izabel Mebarak Ripoll ismli qizi tug‘iladi.
Shakira oilaning yagona farzandi bo‘lib, lekin otasining oldingi nikohidan sakkizta o‘gay aka-opalari bor edi. U bolaligidayoq qobiliyatlarini namoyon qila boshlagan, musiqa va she’rlarni yaxshi ko‘rar, otasiga o‘xshagan yozuv mashinkasi bo‘lishini orzu qilardi. To‘rt yoshidayoq u qorin raqsini shu qadar nafis ijro etardiki, uning raqsi hammaga yoqardi; 7 yoshida u she’r yoza boshlaydi, 8 yoshida esa otasining kasodga uchrashi tufayli birinchi iztirobni boshdan kechiradi. O‘shanda ota-onasi uydagi hamma narsani sotishga majbur bo‘lishgan, hatto konditsionerlarni ham.
Ota-ona qizining odatiy dunyosining tamomila barbod bo‘lganini unutishga harakat qilib, Shakirani uysiz bolalar qanday yashayotganini ko‘rishga olib borishadi. Qizcha hammasini to‘g‘ri tushunadi. Yillar o‘tib qo‘shiqchi muhtoj bolalarga yordam berish uchun xayriya jamg‘armasini tuzadi.
Shakira bolaligidan otasi tez-tez ijro etadigan arab musiqasini tinglagan. Shuningdek, u qorin raqslarini ijro etayotgan qizlarni tomosha qilishni juda yaxshi ko‘rardi va ularning harakatlarini juda aniq takrorlardi. Bu san’at keyinchalik uning o‘ziga xos xususiyatiga aylandi. 10 yoshida Shakira kuchli ovozi bilan e’tiborni o‘ziga jalb qilib, mahalliy tanlovlarda qatnasha boshladi, uch yildan so‘ng esa Sony Music Colombia bilan birinchi shartnomasini imzolaydi.
Uning birinchi albomlari muvaffaqiyat qozonmaydi, ammo yosh qo‘shiqchi musiqa yaratishda davom etadi va tanaffusdan so‘ng Pies Descalzos albomini taqdim etadi, bu esa uni Lotin Amerikasida mashhur qiladi. Keyingi albom bu muvaffaqiyatni mustahkamlaydi va unda yangragan arab ohanglari yosh xonandaning tashrif qog‘oziga aylanadi.
Uning ingliz tilidagi “Whenever, Wherever” va “Underneath Your Clothes” singllari butun dunyo bo‘ylab xitga, o‘zi esa mashhur yulduzga aylanadi. U Kolumbiya teleserialida rol o‘ynaydi, lekin tez orada kino u uchun emasligini anglaydi.
Ilk umidsizlik
Xonanda birinchi marta aktyor Osvaldo Riosga ko‘ngil qo‘yadi. U Shakiradan 16 yosh katta bo‘lib, seriallarda rol o‘ynagan va ikki marta turmush qurgan edi. Tajribasiz qiz esa unda orzusidagi oq otdagi shahzodani ko‘rdi. Aktyorning sobiq xotinlaridan biri uni oilaviy zo‘ravonlikda ayblаb, hatto sud orqali tovon puli undirganiga qaramay, bu holat qizni zarracha tashvishga solmaydi. Darhaqiqat, Osvaldo dastlab xonandaga juda e’tiborli edi: uning barcha istaklarini oldindan sezar, unga chin ko‘ngildan yaqin odam bo‘lib tuyulardi. Biroq uning Shakiraga bo‘lgan munosabati butunlay soxta bo‘lib chiqdi — u shunchaki qo‘shiqchidan o‘z shuhratini oshirish uchun foydalangandi.
O‘rgangan ko‘ngil o‘rtansa qo‘ymas deganlaridek, aktyor yana xiyonat ko‘chasiga kiradi. Shakira esa buni tushuntirishni talab qilganda Osvaldo odatdagidek yolg‘on gapira boshlaydi. Bu safar Shakira unga ishonmaydi va munosabatlariga nuqta qo‘yadi.
2000-yilda Shakira Argentina prezidenti Fernando de la Ruaning o‘g‘li Antonio de la Rua bilan tanishadi. Shakira baxtli edi, u intervyularida Antonioni ideal erkak deb ta’riflaydi. Antonio Shakira uchun nafaqat sevgilisi, balki haqiqiy tayanchiga aylanadi. Erkak uning karyerasida faol ishtirok etib, biznes maslahatchisi vazifasini bajaradi. Shakira sevgilisiga turmushga chiqishni orzu qilardi, biroq to‘y sanasi haqidagi savollarga doimo hazil bilan javob berardi.
Ular tanishganidan bir yil o‘tgach, Antonioning otasi sharmanda bo‘lib, prezidentlik lavozimidan chetlashtirilsa ham, Shakira o‘z obro‘siga putur yetkazmaslik uchun yigiti bilan aloqasidan voz kechmadi. Hatto Argentinada albomlarini sotish taqiqlanganda ham e’tibor bermaydi.
Ammo 2011-yilda ular ajralishayotganini e’lon qilishganda hamma hayratda qoldi. Ajralish sabablari ma’lum emas, lekin mish-mishlarga qaraganda, Shakira erining xiyonatidan charchagan. Ajralishdan so‘ng Antonio Shakirani sudga berib, uning karyerasiga qo‘shgan hissasi uchun 250 (keyinchalik yana 100) million dollar tovon talab qiladi. Biroq sud ularning munosabatlari biznes yuzasidan emas, shaxsiy ekanligini aytib, uning da’vosini rad etadi.
Yolg‘on muhabbat
Ko‘p o‘tmay, Shakira ispaniyalik futbolchi Jerar Pike bilan uchrasha boshlaydi. Ular 2010-yilda futbol bo‘yicha jahon chempionatining rasmiy madhiyasi bo‘lgan Waka Waka klipini suratga olish paytida tanishgan.
Jerar o‘zining xarizmasi va hazilkashligi bilan qo‘shiqchining e’tiborini darhol o‘ziga tortdi. Ularning romantikasi tez rivojlanib, ular dunyodagi eng ko‘p muhokama qilinadigan juftliklardan biriga aylanadi. Futbolchining o‘zidan 10 yosh kichikligi Shakirani mutlaqo cho‘chitmasdi ular haqida nima deyishayotgani unga mutlaqo ahamiyatsiz edi, u Pikeni quyoshim deb atardi.
U Jerar o‘ynaydigan Barselonaga uning ortidan ko‘chib o‘tadi. Sobiq sevgilisi Antoniodan farqli o‘laroq, u sevgidan boshqa hech narsa talab qilmasligidan mamnun edi. Shakira bir necha bor Jerar uning ilhom manbayi bo‘lganini ta’kidlagan. 2013-yilda ularning birinchi farzandi Milan, 2015-yilda esa ikkinchi o‘g‘li Sasha dunyoga keladi. Qo‘shiqchiga rasmiy nikoh haqida savollar berilganda, u oila qurish uchun pasportdagi muhr mutlaqo shart emasligini aytardi. Ammo bir kuni Shakira turmush qurishni istamasligi haqidagi bayonoti bilan muxlislarini hayratda qoldiradi.
Uning so‘zlariga ko‘ra, u uchun rasmiy nikoh muhim emas, bundan tashqari, Jerardan shubhalanishga asos yo‘q. U ajoyib ota bo‘lib, o‘g‘illariga g‘amxo‘rlik qilar, shu bilan birga sevgilisini ham unutmasdi. Jerar Shakira ovozini yo‘qotganda ham, tushkunlikka tushganda ham uni qo‘llab-quvvatladi, uning hissiyotlariga chidadi va yordam kerak bo‘lganda doim yonida bo‘ldi.
Bir kuni kasal otasiga bir necha kun qarab, keyin uyiga qaytgan xonanda muzlatkichdagi qulupnay murabbosining yarmi bo‘sh bankasiga ko‘zi tushadi... Jerar ham, o‘g‘illari ham bu murabboni umuman yeyishmasdi... Shakira u yo‘qligida uyida boshqa ayol bo‘lganini va u ayol bu yerda bemalol yashaganini darhol tushunadi. 2022-yilda esa er-xotin ajrashishini e’lon qilishadi. Keyinchalik ommaviy axborot vositalari mazkur ajralishga olib kelgan Pikening ko‘plab xiyonatlari haqida yozadi.
Qayta oyoqqa turish
Xonanda intervyularining birida xiyonat sabab uning dunyosi barbod bo‘lganini aytadi. “Men oilam uchun, muhabbatim uchun karyeramni qurbon qildim va oxir-oqibat o‘zligimni yo‘qotdim” deb tan oladi u. U hafsalasi pir bo‘lganini yashirmaydi: “Meni axlatday uloqtirishdi”. Shakiraning aytishicha, u bir necha bor g‘azab, nafrat tuyg‘ularidan azoblangan. U bu dard bilan yashashga o‘rgandi va nihoyat, qayta tiklanish bosqichiga yetdi. Musiqa unga umidsizlik botqog‘idan chiqishga yordam bergan najotbaxsh kuchga aylandi.
Shakira Mayamiga ko‘chib o‘tdi, musiqa yozish va o‘g‘illarining tarbiyasiga e’tibor qaratdi, endi u yolg‘iz ona ekanini va kimningdir yordamiga muhtojmasligini anglashga harakat qildi. 2023-yilda qo‘shiqchi bir nechta muvaffaqiyatli treklarni chiqardi va uning Bizarrap bilan hamkorlikda kuylagan qo‘shig‘i YouTube’da ko‘rishlar soni bo‘yicha rekord o‘rnatdi.
2024-yil bahorida xonandaning yangi munosabatlari haqida mish-mishlar tarqaldi, bu safar “Emili Parijda” teleserialidagi roli bilan tanilgan 31 yoshli aktyor Lyusen Laviskount bilan. Shakira bu gap-so‘zlarga hech qanday izoh bermadi. Bir muncha vaqt o‘tgach, jiddiy munosabatlar hozircha unga mutlaqo begonaligini aytdi.
Haqiqatda u olgan saboqlarini unutmagan holda yashashni va karyerasini davom ettirishni istaydi. “Men o‘ylaganimdan ancha zaifman. Men doim og‘riqdan qo‘rqardim, chunki chiday olmasam kerak, deb o‘ylardim”.
Bir vaqtlar Shakir va Jerar Pike ideal juftlik deb hisoblangan, chunki ular bir kunda tug‘ilgan, faqat 10 yil farq bilan, bunday o‘xshashliklar yulduzlar oilasida kamdan kam uchraydi.
Izoh (0)