Toshkent viloyati Qibray tumanida fuqaro ehtiyotsizligi oqibatida Bo‘zsuv kanaliga tushib ketdi. Bu haqda FVV xabar berdi.
Keltirilishicha, 27-iyun kuni soat 13:36 da Toshkent viloyati FVBga 112 tizimi orqali Qibray tumani “GES Qodiriya” MFY Mustaqillik ko‘chasidan oqib o‘tgan Bo‘zsuv kanaliga fuqaro ehtiyotsizligi oqibatida tushib ketgani va yordam zarurligi haqida xabar kelib tushgan.
Xabarga asosan zudlik bilan aytilgan manzilga bir guruh qutqaruvchilar yetib borib, fuqaroni sog‘-salomat qutqarib olgan.
5-iyun kuni Farg‘ona viloyati Oltiariq tumanida uch nafar voyaga yetmagan bola sun’iy suv havzasiga cho‘kib ketgan edi. Hozirda prokuratura tomonidan tergovga qadar tekshirish harakatlari olib borilmoqda.
May oyining boshlarida esa Toshkentning Bo‘rijar kanaliga tushib ketgan qizlarni qutqargan erkakning o‘zi halok bo‘lgandi. Davlat rahbari marhumning rafiqasi va farzandlariga hamdardlik bildirdi va marhum Abdumannop Samiqov “Jasorat” medali bilan mukofotlandi. Mukofot uning oila a’zolariga topshirildi. Marhumning turmush o‘rtog‘iga moddiy yordam tariqasida 50 mln so‘m topshirildi.
Ayni payda Favqulodda vaziyatlar vazirligi tomonidan yoz mavsumida suvda cho‘kish holatlarining oldini olish maqsadida keng ko‘lamli profilaktik tadbirlar olib borilmoqda. Tegishli mutaxassislar ishtirokida o‘tkazilgan o‘rganishlar natijasida respublika bo‘ylab 2 004 ta cho‘milish taqiqlangan suv obyektlari aniqlanib, ular ro‘yxatga olinib, nazoratga olingan.
Izoh (0)