Бухоро вилоятида аёл оилавий муаммолар сабаб ўзини сувга ташламоқчи бўлди. Бу ҳақда вилоят ИИБ хабар берди.
Маълум қилинишича, рухсат этилмаган чўмилиш ҳавзаларида ёш болаларнинг ота-онаси ёки катталарнинг назоратисиз ушбу жойларга бориши оқибатида чўкиш ҳолатлари кузатилмоқда.
Бухоро вилояти ИИБ патрул-пост хизмати ходимлари томонидан шу каби рухсат этилмаган сув ҳавзаларида чўмилмаслик бўйича аҳоли билан тарғибот ишлари олиб бориш жараёнида Бухоро шаҳрида яшовчи фуқаронинг сув бўйида мақсадсиз ўтиргани аниқланди.
“Ушбу фуқаро билан олиб борилган суҳбат давомида ҳаётий қийинчилик ва оилавий муаммолар сабабли турли ўй-хаёллар билан сув бўйига келганлигини маълум қилган.
Айтиш мумкинки, Патрул-пост ходимларининг сергаклиги сабаб содир бўлиши мумкин бўлган кўнгилсиз ҳодисанинг олди олинди, бир инсоннинг ҳаёти сақлаб қолинди”, дейилади хабарда.
5 июнь куни Фарғона вилояти Олтиариқ туманида уч нафар вояга етмаган бола сунъий сув ҳавзасига чўкиб кетган эди. Ҳозирда прокуратура томонидан терговга қадар текшириш ҳаракатлари олиб борилмоқда.
Май ойининг бошларида эса Тошкентнинг Бўрижар каналига тушиб кетган қизларни қутқарган эркакнинг ўзи ҳалок бўлганди. Давлат раҳбари марҳумнинг рафиқаси ва фарзандларига ҳамдардлик билдирди ва марҳум Абдуманноп Самиқов “Жасорат” медали билан мукофотланди. Мукофот унинг оила аъзоларига топширилди. Марҳумнинг турмуш ўртоғига моддий ёрдам тариқасида 50 млн сўм топширилди.
Айни пайда Фавқулодда вазиятлар вазирлиги томонидан ёз мавсумида сувда чўкиш ҳолатларининг олдини олиш мақсадида кенг кўламли профилактик тадбирлар олиб борилмоқда. Тегишли мутахассислар иштирокида ўтказилган ўрганишлар натижасида республика бўйлаб 2 004 та чўмилиш тақиқланган сув объектлари аниқланиб, улар рўйхатга олиниб, назоратга олинган.
Қибрайда ФВВ қутқарувчилари томонидан каналга тушиб кетган фуқаро қутқарилганди.
Изоҳ (0)