AQSH ma’muriyati 30-sentyabrgacha AQSH Xalqaro taraqqiyot agentligining (USAID) barcha xorijiy vakolatxonalarini yopishni rejalashtirmoqda. Bu haqda The Guardian gazetasi AQSH Davlat departamentining o‘z qo‘liga tushgan hujjatiga asoslanib xabar berdi.
Nashr ma’lumotlariga ko‘ra, AQSH davlat kotibi Marko Rubio “xorijiy yordam dasturlari ustidan nazoratni bevosita Davlat departamentiga o‘tkazib, agentlikning butun xalqaro xodimlarini qisqartirish to‘g‘risida ko‘rsatma bergan”. Bu ko‘rsatma USAIDning butun dunyo bo‘ylab yuzlab vakillariga, jumladan, 100 dan ortiq mamlakatlardagi diplomatik xizmat xodimlari, pudratchilar va mahalliy xodimlarga taalluqli.
Ilgari xabar qilinganidek, USAIDning uchinchi dunyo mamlakatlaridagi o‘rnini “demokratiyani rivojlantirish” loyihalariga e’tibor qaratish orqali Yevropa Ittifoqi egallashni maqsad qilgan.
3-fevral kuni AQSH ma’muriyati xalqaro tashkilotlarni moliyalashtirish uchun katta miqdorda mablag‘ ajratgan USAID faoliyatini amalda to‘xtatdi. 10-mart kuni USAID muvaqqat rahbari etib tayinlangan AQSH davlat kotibi Marko Rubio hukumat tekshiruvi natijalariga ko‘ra ushbu idora dasturlarining 83 foizi bekor qilinganini ma’lum qildi.
Buning o‘rniga AQSH Davlat departamenti 2,9 milliard dollarlik byudjetga ega maxsus A1OF jamg‘armasini tashkil etadi.
Rubioning aytishicha, bu jamg‘arma inqirozlarga tezkor javob beradi, Hindiston va Iordaniya kabi muhim hamkorlar bilan faol hamkorlik qiladi, repatriatsiya bo‘yicha zarur sa’y-harakatlarni qo‘llab-quvvatlaydi va Xitoy kabi eng yaqin raqobatchilarning strategik tahdidlariga qarshi turadi.
USAID haqida
Tashkilot 1961-yilda AQSH prezidenti Jon Kennedining xorijiy mamlakatlarga yordam ko‘rsatish to‘g‘risidagi qonuni qabul qilinganidan so‘ng ijro farmoni bilan tashkil etilgan. Agentlik AQSHning xalqaro rivojlanish masalalari bilan shug‘ullangan bir nechta avvalgi idoralarining vazifalarini o‘zida mujassamlashtirdi. USAID 1998-yildan beri mustaqil agentlik maqomiga ega.
USAID’ning umumiy siyosiy rahbarligini AQSH davlat kotibi amalga oshiradi, shuningdek, agentlik prezident va Milliy xavfsizlik kengashiga bo‘ysunadi. Direktor va uning ikki o‘rinbosarini AQSH prezidenti kongress roziligini olib tayinlaydi.
Tashkilotning byudjeti 50 milliard dollardan oshgan. Bugungi kunda uning tarkibida 10 mingdan ortiq xodim ishlaydi, ularning uchdan ikki qismi Qo‘shma Shtatlardan tashqarida faoliyat yuritadi. Tashkilot tarkibiga bir nechta mintaqaviy va ixtisoslashgan byurolar kiradi.
Izoh (0)