Xitoyning Xiaomi kompaniyasi o‘zining Youpin kraudfanding platformasida Mijia Front-Opening Travel Suitcase nomli aqlli chemodanni taqdim etdi.
Minimalistik dizayni bilan ajralib turadigan bu model xizmat safarlari uchun mo‘ljallangan. Chemodan yengil, ammo mustahkam korpusga ega bo‘lib, 15,6 dyuymgacha bo‘lgan noutbuklarni o‘ziga sig‘dira oladi.
Chemodanning eng e’tiborga molik jihatlaridan biri — old qismidan ochiladigan maxsus tuzilmasi. Bu foydalanuvchiga chemodanni ochmasdan kerakli buyumlarni tezda olish imkonini beradi. Ayniqsa, bu tuzilma aeroportdagi xavfsizlik nazoratidan o‘tishda yoki safar paytida ishlashda juda qulay. Uch qavatli maxsus bo‘limlarga noutbuk, planshet va boshqa qurilmalarni joylashtirish mumkin.
Asosiy bo‘lim esa kiyim-kechak va shaxsiy buyumlar uchun mo‘ljallangan. Unda yuklarni mahkamlovchi maxsus kamarlar mavjud, ular chemodan ichidagi buyumlarning joyidan siljib ketishining oldini oladi. Ichki qoplamasi esa antibakterial material bilan qoplangan bo‘lib, stafilokokk va ichak tayoqchasi kabi bakteriyalarga qarshi himoya vazifasini bajaradi.
Bundan tashqari, Xiaomi chemodani zarbaga chidamli va yengil materialdan tayyorlangan. Undagi g‘ildiraklar harakat paytida shovqin chiqarmaydi. Chemodandagi uch pog‘onali tutqich esa har xil bo‘ydagi odamlar uchun moslashtiriladi. Xiaomi bu modelga kalitsiz maxsus qulf o‘rnatgan bo‘lib, bojxona xodimlari uni buzmasdan ochishi mumkin.
Youpin platformasidagi ma’lumotlarga ko‘ra, yangi Mijia Front-Opening Travel Suitcase 16-iyundan boshlab 369 yuanga (taxminan 51 AQSH dollari) sotuvga chiqadi.
Izoh (0)