Amerikalik milliarder Ilon Mask “Ozodlik radiosi” va “Amerika ovozi”ni yopishga chaqirgandi. Qirg‘iziston prezidenti Sadir Japarov buni qo‘llab-quvvatladi. Bu haqda “24.kg” xabar berdi.
Japarov turli AQSH fondlari “Ozodlik” va boshqa ommaviy axborot vositalarini moliyalashtirish uchun qancha mablag‘ ajratayotgani haqida gapirganini eslatdi.
“Agar pulni qayerga sarflashni bilmasangiz, to‘g‘ridan to‘g‘ri bizga, davlatga topshiring. Biz demokratiya va inson huquqlarini eng yuqori darajada ta’minlaymiz”, degandi o‘shanda Sadir Japarov AQSH Davlat departamenti rahbariyatiga murojaat qilib.
Qirg‘iziston rahbari AQSH prezidenti Donald Tramp USAID faoliyatini uch oyga to‘xtatganini, hozir esa Mask va boshqa amerikalik siyosatchilar “Ozodlik radiosi”ni yopishni talab qilayotganini tasodif deb hisoblamoqda.
Donald Tramp va Ilon Mask mening tashabbuslarimga muhtoj emas. Ikkalasi ham milliarder. Ular pul osmondan tushmasligini juda yaxshi biladi. Ular amerikaliklarning pullarini behuda sarflashni to‘xtatmoqchi va mutlaqo to‘g‘ri qilishadi. Hozir XXI asr. Har qanday ma’lumot besh daqiqada butun dunyoga tarqaladi. 20-30 yil oldin “Ozodlik”ni hamma kutgan, eshitgan, ishongan. Chunki u paytda internet yo‘q edi, smartfonlar yo‘q edi. Hozir odamlar “Ozodlik” yangiliklariga muhtoj emas. Hamma ma’lumotni internet orqali oladi, dedi Japarov.
Sadir Japarovning fikricha, xalq yangiliklarni tahlil qilishni o‘rgangan, hamma narsaga ham ishonmaydi. Odamlar qaysi xabarlar ishonchsiz ekanini tushunadi.
Masalan, “Ozodlik” kimningdir obro‘siga putur yetkazuvchi noto‘g‘ri ma’lumot tarqatsa, xalq tahlil qila boshlaydi. Bu noto‘g‘ri ekani aniqlanganida, “Nega siz noto‘g‘ri ma’lumot tarqatyapsiz?”, deb odamlar so‘raydi. Ular esa o‘sha xabarni saytidan o‘chirib tashlab, “Kechirasiz”, deydi. Agar ularni sudga bersangiz, butun dunyoga jar sola boshlaydi: “Bizda so‘z erkinligi o‘ldi!” Bu normal holatmi? Haqiqatga to‘g‘ri kelmaydigan ma’lumotlarni tarqatish yoki yangiliklarni manipulyatsiya qilish so‘z erkinligimi? Har narsaga ruxsat berishni so‘z erkinligi yoki inson huquqlari bilan adashtirmaslik kerak, dedi Sadir Japarov.
Qirg‘iziston prezidenti shu sababli Tramp va Maskning qarorlari qo‘llab-quvvatlashga loyiq ekanini ta’kidladi.
Tramp va Maskning moliyalashtirishni to‘xtatish qarori
Milliarder Ilon Mask Hukumat samaradorligi departamenti (DOGE) rahbari hisoblanadi. Ushbu tuzilma ortiqcha me’yoriy hujjatlarni yo‘q qilish, amaldorlar va xarajatlarni qisqartirishga e’tibor qaratadi. Shundan kelib chiqib, milliarder “Ozodlik radiosi” va “Amerika ovozi” soliqchilar pulini sarf qilayotganini aytgan.
“Ha, ularni yoping. Yevropa endi ozod (bo‘g‘uvchi byurokratiyani hisobga olmaganda). Ularni endi hech kim tinglayotgani yo‘q. Bu shunchaki o‘zi bilan gaplashayotgan aqldan ozgan radikal so‘lchilar bo‘lib, ular amerikaliklarning soliqlaridan yiliga 1 milliard dollarni sarf qilmoqda”, deb yozgan milliarder X sahifasida.
U avvalroq AQSH hukumati Politico, The New York Times (NYT) gazetalari va Associated Press (AP) agentliklarini moliyalashtirishni to‘xtatishini aytgandi. Bunga AP Davlat departamentidan 620 ming dollar, NYT Sog‘liqni saqlash vazirligi va ijtimoiy xizmatlardan “o‘nlab million dollar” olgani sabab qilib ko‘rsatilgan.
“Politico gazetasi demokratlar haqidagi ijobiy maqolalari uchun USAIDdan 8 million dollar olgan, degan AQSH prezidenti.
Oq uy moliyalashtirish USAID orqali amalga oshirilganini ma’lum qilgan. Politico bunga javoban “hech qachon davlat dasturlari yoki subsidiyalarining benefitsiari bo‘lmaganini” ta’kidlagan. Trampning qo‘shimcha qilishicha, “bu tarixdagi eng katta janjal bo‘lishi mumkin” va demokratlar “bundan qochib qutula olmaydi”.
Izoh (0)