AQSH tibbiy yordam dasturlari qisqartirilgani sabab Janubiy Sudanning sharqiy Jongley shtatida kamida sakkiz kishi, jumladan besh nafar bola halok bo‘ldi. Gap shundaki, ular mahalliy klinikalar yopilgani bois issiqda uch soatlik yo‘l bosib, vafot etgan. Bu haqda Al-Jazeera telekanali Save the Children xayriya tashkilotiga tayanib xabar bermoqda.
-NTTfkh5M.avif)
Qayd etilishicha, ularning o‘limi AQSH sobiq prezidenti Donald Trampning “Amerika birinchi” siyosati sabab xalqaro gumanitar dasturlariga mablag‘ ajratish qisqartirilganidan keyin yuz bergan.
“Kuchli davlatlar tomonidan yaqin haftalar ichida qabul qilingan qarorlar bolalar o‘limiga olib keldi — bu holat jahon hamjamiyatini larzaga solishi kerak,” dedi Save the Children’ning Janubiy Sudandagi direktori Kristofer Nyamandi.
O‘tgan yilgacha tashkilot mamlakatdagi 27 ta sog‘liqni saqlash markazini qo‘llab-quvvatlab kelgan. Biroq AQSH yordamining qisqarishi sabab ularning yettitasi butunlay yopilgan, qolgan 20 tasi esa faoliyatini cheklashga majbur bo‘lgan. Buning natijasida butun mamlakat bo‘ylab faoliyat ko‘rsatayotgan 600 dan ortiq tibbiyot xodimining 200 nafari ishsiz qolgan.
Bundan tashqari, AQSH mablag‘lari hisobiga bemorlarni shifoxonaga olib boruvchi transport xizmati ham izdan chiqqan. Natijada vabo yuqtirgan bemorlar tibbiy yordam olish uchun 40 daraja issiqda soatlab piyoda yurishga majbur bo‘lgan.
AQSH Davlat departamenti voqea yuzasidan ma’lumotga ega emasligini bildirgan bo‘lsa-da, rasmiylar Janubiy Sudan rahbariyatini xorijiy yordamni noqonuniy ishlatishda aybladi.
“Favqulodda vaziyatlar uchun yordam dasturlari davom etmoqda, ammo biz amerikalik soliq to‘lovchilardan korrupsioner siyosatchilarni moliyalashtirishga ruxsat so‘rashni vijdonan to‘g‘ri deb hisoblamaymiz,” deya ta’kidlagan AQSH Davlat departamenti vakili Reuters’ga.
Janubiy Sudan hukumati mamlakatda keng ko‘lamli korrupsiya borligini tan olgan, biroq prezident Salva Kir oilasiga oid ayblovlarni rad etgan. Shu sababli gumanitar yordamlar asosan nodavlat tashkilotlar orqali yetkazib beriladi.
Save the Children tashkilotining mamlakat uchun joriy yillik byudjeti 50 million dollardan 30 million dollarga qisqarishi kutilmoqda. Bu esa gumanitar vaziyatni yanada og‘irlashtiradi.
BMT hisobiga ko‘ra, mamlakatda yashovchi 12 million aholining uchdan bir qismi mojarolar yoki tabiiy ofatlar sabab o‘z uylarini tark etgan. UNICEF ma’lumotiga ko‘ra, o‘tgan yilning oktyabr oyida e’lon qilingan vabo epidemiyasi bilan hozirgacha 40 ming kishi kasallangan. Bemorlarning 700 nafari vafot etgan. Ularning yarmi 15 yoshgacha bo‘lgan bolalardir.
Izoh (0)