Ozarbayjonda “Rossiya segodnya” mediaguruhiga kiruvchi Sputnik axborot agentligining vakolatxonasi tugatildi. Bu haqda Tashqi ishlar vazirligi matbuot kotibi Oyxon Hojizoda xabar berdi.
Hojizodaning ta’kidlashicha, Rossiya kompaniyasi Ozarbayjonda faqat bitta muxbir uchun akkreditatsiya olishi mumkin. “Rossiya segodnya” mediaguruhi vakolatxona tugatilgani haqida rasmiy bildirishnoma olmaganini bildirdi.
Shuningdek, Ozarbayjonda BBC faoliyati ham to‘xtatildi. Korporatsiya tomonidan e’lon qilingan bayonotga ko‘ra, Ozarbayjon tomoni bu qaror haqida uni og‘zaki xabardor qilgan. Jurnalistlar “vaziyatga oydinlik kiritilgunga qadar” o‘z faoliyatini to‘xtatgan.
BBC ozarbayjon tilida reportajlar olib borishni davom ettirish niyatidaligini bildirgan. Ozarbayjon Tashqi ishlar vazirligi faqat bitta muxbirga akkreditatsiya berishni rejalashtirayotganini ta’kidlagan.
Bundan tashqari, Ozarbayjon “Amerika ovozi” radiosi muxbirining akkreditatsiyasini bekor qilgan. Bu qarorning sabablariga aniqlik kiritilmagan.
Fevral oyi boshida ozarbayjonlik rasmiylar Bokudagi Rus uyi faoliyati to‘xtatilgani haqida xabar bergandi. Faoliyatni tugatish to‘g‘risidagi qaror AQSH Xalqaro taraqqiyot agentligi (USAID)ga nisbatan ham qabul qilingan. BakuTV telekanali Bokudagi Rus uyi niqobi ostida Rossiya maxsus xizmatlari ishlayotganini ta’kidlagan. Shundan so‘ng Ozarbayjon elchisi Rahmon Mustafoyev Rossiya Tashqi ishlar vazirligiga chaqirilgan va unga norozilik bildirilgandi.
Izoh (0)