Yaponiya chet ellik sayyohlar uchun kirish qoidalarini kuchaytirmoqda. Bu haqda Tengrinews xabar berdi.,
Asosiy o‘zgarishlar qatorida majburiy tibbiy sug‘urta, soliq imtiyozlari va qarzlarni nazorat qilishni kuchaytirish bor. U sog‘liqni saqlash muassasalariga moliyaviy yukni kamaytirishga qaratilgan.
Bu o‘zgarishlarga sayyohlarning davolanib, to‘lovlarini to‘lamasdan ketib qolish holatlari ko‘paygani sabab bo‘lgan. Masalan, 2024-yil sentyabr oyida 11 mingdan ortiq xorijlik davolangan bo‘lsa, ulardan 90 ga yaqini 61 million iyendan ortiq (420 ming dollar) qarz bo‘lib qolgan.
Yangi qoidalarga ko‘ra:
- sug‘urtasi bo‘lmagan turistlarga kirishga ruxsatnoma berilmaydi;
- davolanishdan qarzi bo‘lgan chet el fuqarolariga mamlakatga takroriy tashrif buyurish rad etiladi;
- shifoxonalar to‘lanmagan to‘lovlar to‘g‘risidagi ma’lumotlarni immigratsiya organlariga taqdim etadi;
- immigratsiya xizmatlari qarzdorlar ro‘yxatiga kirish imkoniyatiga ega bo‘ladi.
Yangi qoidalarni joriy etilish vaqti hali aytilmagan.
Qayd etilishicha, 2024-yilda Yaponiyaga 36,8 million xorijiy mehmon tashrif buyurgan. 2025-yil aprel oyining o‘zida mamlakatga 3,91 million sayyoh kirib kelgan. Bu o‘tgan yilga nisbatan 28,5 foizga ko‘pdir. Biroq sayyohlar oqimining o‘sishi bilan birga Tokio, Osaka va Kiotodagi shahar kasalxonalariga yuklama ham ortib bormoqda.
Yaponiya Sog‘liqni saqlash vazirligi ma’lumotlariga ko‘ra, xorijliklarning 30 foizga yaqini mamlakatga sug‘urtasiz keladi. Muammo yangi emas: 2022-moliyaviy yilda so‘rov o‘tkazilgan shifoxonalarning deyarli 1/3 qismi chet ellik bemorlarning tibbiy xizmatlar uchun pul to‘lash holatlari haqida xabar bergan.
O‘zgarishlar faqat turistlarga ta’sir qilmaydi. Yaponiyada yashovchi xorijliklar ham endi qat’iy nazorat ostida bo‘ladi. 150 ta munitsipalitetda o‘tkazilgan so‘rov natijalariga ko‘ra, Milliy tibbiy sug‘urta ro‘yxatidan atigi 63 foiz xorijliklar o‘tgan. Taqqoslash uchun, yaponlar uchun bu ko‘rsatkich 93 foizni tashkil etadi.
Kelajakda viza muddatini uzaytirish bilan sug‘urta va soliq to‘langanini isbotlash o‘rtasida qat’iy bog‘liqlik bo‘lishi ham aytilgan.
Yaponiya, shuningdek, o‘zining mashhur turistik “soliqsiz xarid qilish” tizimini qayta ko‘rib chiqmoqda. 2026-yil 1-noyabrdan boshlab 10 foiz soliq hozirgidek do‘konda ushlab qolinmasdan, xarid vaqtida to‘lanadi. Pulni qaytarish uchun jo‘nashdan oldin ariza berish kerak bo‘ladi.
2030-yilgacha ishga tushirilishi kerak bo‘lgan Yaponiyaning elektron sayohat ruxsatnomasi muddatidan oldin amalga oshiriladi. O‘zgarishlar AQSH, Kanada, Avstraliya, Buyuk Britaniya, Fransiya va Singapur kabi 71 ta vizasiz mamlakat sayyohlariga ta’sir qiladi. Bu Koreyaning KETA yoki Kanadaning eTA’siga o‘xshaydi: vizasiz bo‘lsa ham, oldindan onlayn shaklni to‘ldirish kerak bo‘ladi.
Izoh (0)