Kaliforniya shtati va gubernator Gevin Nyusom AQSH prezidenti Donald Tramp, Pentagon va mudofaa vaziri Pit Xegsetga qarshi Los-Anjelesda Milliy gvardiya qo‘shinlari joylashtirilgani sababli sudga shikoyat arizasini topshirdi. Bu haqda shtat rahbari X ijtimoiy tarmog‘ida yozdi.
San-Fransisko federal okrug sudiga topshirilgan 22 sahifali shikoyatda Tramp federal qonunchilik va konstitutsiyani buzgani ta’kidlanadi. Shtat suddan milliy gvardiyachilarni joylashtirishni bekor qilishni va ular ustidan nazoratni gubernatorga qaytarishni talab qilgan.
“Tramp qonuniy ijro hokimiyati chegaralaridan chiqish uchun bir necha bor favqulodda vakolatlardan foydalangan. 7-iyun, shanba kuni u mahalliy hokimiyat nazoratidagi norozilik namoyishidan foydalanib, yana bir bor misli ko‘rilmagan tarzda hokimiyatni qo‘lga kiritdi. Bu safar Kaliforniya shtati suvereniteti hisobiga va gubernatorning shtat milliy gvardiyasi bosh qo‘mondoni sifatidagi obro‘si hamda vakolatlariga zid ravishda”, deyiladi hujjatda.
Da’vo arizasida ta’kidlanishicha, milliy gvardiya kuchlaridan foydalanish shtat aholisi orasida vahima va taranglikni kuchaytirgan, politsiya esa zo‘ravonlikni to‘xtatishda samarali faoliyat olib borgan.
Kaliforniya bosh prokurori Rob Bontaning jurnalistlarga ma’lum qilishicha, Tramp o‘zidan oldin faqat bir marta, 1970-yilda prezident Richard Nikson pochta ish tashlashi paytida yuk yetkazib berish uchun harbiylardan foydalanganda qo‘llanilgan qonunni ishga tushirgan. Bundan tashqari, bu 1965-yildan beri gubernatorning roziligisiz qonunni amalga oshirishning birinchi holati bo‘ldi. O‘shanda prezident Lindon Jonson Alabamada fuqarolik huquqlari uchun namoyishchilarni himoya qilish maqsadida qo‘shinlarni joylashtirgandi. O‘sha paytda gubernatorlar davlat maktablarini irqiy ajratishni bekor qilish to‘g‘risidagi sud qarorlariga qarshilik ko‘rsatishgandi.
AQSH prezidenti milliy gvardiyani “yaxshi bajarilgan ish” uchun maqtadi. Tramp o‘z qarorini to‘g‘ri deb baholab, jurnalistlarga harbiylar kiritilmaganda shahar “yonib kul bo‘lishi”ni aytdi. U Kaliforniya va Los-Anjeles rahbariyatini norozilik namoyishlari paytida zo‘ravonlikka qarshi yetarli choralar ko‘rmaganlikda aybladi va gubernatorni hibsga olish mumkinligini ta’kidladi.
AQSH hukumati Kaliforniyaga 2 ming milliy gvardiyachi va 700 dengiz piyodasini ommaviy tartibsizliklar boshlanganidan so‘ng yubordi. Bunga AQSH immigratsiya va bojxona politsiyasining (ICE) noqonuniy muhojirlarga qarshi reydlari sabab bo‘ldi: natijada o‘nlab odamlar hibsga olindi.
Namoyishlar Los-Anjeles va San-Fransisko shaharlarini qamrab oldi. Namoyishchilarni tarqatish uchun ko‘zdan yosh oqizuvchi gaz va shovqinli granatalar ishlatildi. Gubernator Oq uyning qarorini noqonuniy deb baholab, milliy gvardiyachilarni zudlik bilan chaqirib olishni talab qildi.
Izoh (0)