AQSHning 14 ta shtatidan demokrat prokurorlar va rasmiylar prezident Donald Tramp va Hukumat samaradorligi departamenti (DOGE) rahbari Ilon Maskni sudga berdi. Bu haqda ABC News xabar berdi.
Da’vo arizasida ta’kidlanishicha, Maskning tayinlanishi AQSH konstitutsiyasini buzmoqda, chunki u senat tomonidan tasdiqlanishi lozim bo‘lgan vazifalarni bajarmoqda.
Hech kim tomonidan saylanmagan bitta shaxs qo‘lida davlat hokimiyatining to‘planishidan ko‘ra demokratiyaga kattaroq tahdid yo‘q, deya ta’kidlanadi da’vo arizasida.
Shtatlar Maskka davlat mablag‘larini o‘zgartirish, federal xizmatchilar bilan shartnomalarni bekor qilish va boshqalarni taqiqlashni so‘ramoqda.
Ariza Nyu-Meksiko bosh prokurori Raul Torres va Arizona, Michigan, Merilend, Minnesota, Kaliforniya, Nevada, Vermont, Konnektikut, Rod-Aylend, Massachusets, Oregon, Vashington va Gavayi shtatlari rasmiylari tomonidan berilgan.
Nyu-Meksiko boshchiligidagi shtatlarning ta’kidlashicha, Mask “misli ko‘rilmagan” vakolatlarga ega bo‘lgan, bu unga federal agentliklarni tugatish va qonunchilik tasdig‘isiz byudjetlarni qisqartirish imkonini beradi. Shuningdek, AQSH Xalqaro taraqqiyot agentligining (USAID) 26 nafar xodimi va pudratchilari DOGE vakolatlarini cheklashni talab qilib, da’vo arizasi kiritgan.
Bir qator idoralar allaqachon DOGE’ning maxfiy ma’lumotlarga kirishini cheklagan, sud esa agentlikka USAID’ning 2 mingdan ortiq xodimini qisqartirishni vaqtincha taqiqlagan. Da’vogarlar Maskning barcha qarorlarini noqonuniy deb topishni va uning DOGE’dagi faoliyatini senatda tasdiqlanmaguncha to‘xtatib turishni talab qilmoqda.
Tramp administratsiya ta’kidlashicha, Mask qonun doirasida harakat qilmoqda, DOGE esa davlat xarajatlarini qisqartirish va korrupsiyaga qarshi kurash bilan shug‘ullanmoqda.
Izoh (0)