АҚШ маъмурияти 30 сентябргача АҚШ Халқаро тараққиёт агентлигининг (USAID) барча хорижий ваколатхоналарини ёпишни режалаштирмоқда. Бу ҳақда The Guardian газетаси АҚШ Давлат департаментининг ўз қўлига тушган ҳужжатига асосланиб хабар берди.
Нашр маълумотларига кўра, АҚШ давлат котиби Марко Рубио “хорижий ёрдам дастурлари устидан назоратни бевосита Давлат департаментига ўтказиб, агентликнинг бутун халқаро ходимларини қисқартириш тўғрисида кўрсатма берган”. Бу кўрсатма USAID’нинг бутун дунё бўйлаб юзлаб вакилларига, жумладан, 100 дан ортиқ мамлакатлардаги дипломатик хизмат ходимлари, пудратчилар ва маҳаллий ходимларга тааллуқли.
Илгари хабар қилинганидек, USAID’нинг учинчи дунё мамлакатларидаги ўрнини “демократияни ривожлантириш” лойиҳаларига эътибор қаратиш орқали Европа Иттифоқи эгаллашни мақсад қилган.
3 февраль куни АҚШ маъмурияти халқаро ташкилотларни молиялаштириш учун катта миқдорда маблағ ажратган USAID фаолиятини амалда тўхтатди. 10 март куни USAID муваққат раҳбари этиб тайинланган АҚШ давлат котиби Марко Рубио ҳукумат текшируви натижаларига кўра ушбу идора дастурларининг 83 фоизи бекор қилинганини маълум қилди.
Бунинг ўрнига АҚШ Давлат департаменти 2,9 миллиард долларлик бюджетга эга махсус А1ОF жамғармасини ташкил этади.
Рубионинг айтишича, бу жамғарма инқирозларга тезкор жавоб беради, Ҳиндистон ва Иордания каби муҳим ҳамкорлар билан фаол ҳамкорлик қилади, репатриация бўйича зарур саъй-ҳаракатларни қўллаб-қувватлайди ва Хитой каби энг яқин рақобатчиларнинг стратегик таҳдидларига қарши туради.
USAID ҳақида
Ташкилот 1961 йилда АҚШ президенти Жон Кеннедининг хорижий мамлакатларга ёрдам кўрсатиш тўғрисидаги қонуни қабул қилинганидан сўнг ижро фармони билан ташкил этилган. Агентлик АҚШнинг халқаро ривожланиш масалалари билан шуғулланган бир нечта аввалги идораларининг вазифаларини ўзида мужассамлаштирди. USAID 1998 йилдан бери мустақил агентлик мақомига эга.
USAID’нинг умумий сиёсий раҳбарлигини АҚШ давлат котиби амалга оширади, шунингдек, агентлик президент ва Миллий хавфсизлик кенгашига бўйсунади. Директор ва унинг икки ўринбосарини АҚШ президенти конгресс розилигини олиб тайинлайди.
Ташкилотнинг бюджети 50 миллиард доллардан ошган. Бугунги кунда унинг таркибида 10 мингдан ортиқ ходим ишлайди, уларнинг учдан икки қисми Қўшма Штатлардан ташқарида фаолият юритади. Ташкилот таркибига бир нечта минтақавий ва ихтисослашган бюролар киради.
Изоҳ (0)