Joriy yil 9-iyun kuni Toshkent shahrida O‘zbekiston—Amerika biznes forumi o‘tkazildi. Bu haqda “Daryo” muxbiri xabar bermoqda.
Biznes forum Investitsiyalar, sanoat va savdo vazirligi hamda Amerika—O‘zbekiston Savdo palatasi hamkorligida tashkil etildi.
Tadbirni ochib berish uchun so‘zga chiqqan bosh vazir birinchi o‘rinbosari Jamshid Xo‘jayev nega aynan O‘zbekistonga sarmoya kiritish kerakligi haqida gapirdi.
“Birinchidan, bizda investorlar huquqlari qonun bilan kafolatlangan. Yangi biznes subyektlarini ro‘yxatdan o‘tkazish soddalashtirilgan. Yer maydonlari onlayn-auksion orqali taqdim etiladi. O‘zbekiston iqtisodiyoti so‘nggi yillarda deyarli ikki baravar o‘sdi. O‘tgan yilda o‘sish surʼati 6,5 foiz bo‘ldi. Olti milliard dollardan ortiq to‘g‘ridan-to‘g‘ri xorijiy investitsiyalar jalb qilindi”, dedi hukumat rasmiysi.
Bosh vazir o‘rinbosariga ko‘ra, barqaror iqtisodiy o‘sish taʼminlanayotgani, malakali va yosh ishchi kuchi mavjudligi, mamlakat tabiiy resurslarga boyligi ham investitsiya uchun muhim omillar hisoblanadi.
Forumda O‘zbekiston tomonidan Investitsiyalar, sanoat va savdo vaziri Laziz Qudratov, Senat raisi birinchi o‘rinbosari Sodiq Safoyev ham ishtirok etdi.
“Bir necha yil oldin Amerika—O‘zbekiston Savdo palatasi tashkil etilgan edi. O‘shanda biz Vashingtonda bor-yo‘g‘i 13 ta AQSH kompaniyasini yig‘a bilganmiz. Bugun mana 80 dan ortiq Amerika kompaniyalari O‘zbekistonga keldi. Ular mamlakat salohiyatini ko‘rsatib bermoqda. Bir necha hujjatlarga qo‘l qo‘yildi. Jumladan, informatsion texnologiyalar, tog‘-metallurgiya, farmatsevtika, energetika va taʼlim sohalaridagi loyihalar amalga oshiriladi”, deydi Sodiq Safoyev.
2024-yil yakunlariga ko‘ra, O‘zbekiston bilan AQSH o‘rtasidagi savdo aylanmasi 15 foizga o‘sib, 881,7 million dollarga yetgan. Amerikadan jalb etilgan to‘g‘ridan-to‘g‘ri investitsiyalar hajmi 612,6 million dollarni tashkil etgan.
Bugungi kunda O‘zbekistonda AQSH kapitali ishtirokidagi 314 ta korxona faoliyat yuritmoqda. Shundan 167 tasi to‘liq AQSHga tegishli kompaniyalar hisoblanadi.
Tadbirda ikki davlat ishbilarmonlar va davlat sektori vakillaridan iborat 150 dan ortiq ishtirokchi qatnashdi. Ular orasida ishlab chiqarish, raqamlashtirish, qishloq xo‘jaligi, energetika, moliya va sog‘liqni saqlash sohalarida faoliyat yurituvchi yetakchi amerika kompaniyalari ham bor. Boeing, Visa, Coca-Cola, Medtronic, John Deere, CNH, Morgan Stanley, NASDAQ, Abbott shular jumlasidan.
Izoh (0)