Qashqadaryo viloyatdan poytaxtga sotish uchun olib ketilayotgan isteʼmolga yaroqsiz 431 kg go‘sht yo‘q qilindi, deb xabar berdi Jizzax viloyati IIB matbuot xizmati.
Maʼlum qilinishicha, G‘allaorol tumanida joylashgan “Sangzor-15” YPX maskanida xizmat olib borayotgan IIO xodimlari Samarqand-Toshkent yo‘nalishida harakatlanayotgan Cobalt avtomashinasini to‘xtatgan. Qashqadaryo viloyati, Chiroqchi tumani, “Chuvilloq” mahallasida yashovchi, 1994-yilda tug‘ilgan fuqaro boshqaruvidagi avtomashina tekshirilgan salon va yukxonada 431 kg go‘sht borligi aniqlandi.
Haydovchi ushbu go‘shtni Toshkent shahriga sotish maqsadida olib ketayotganini maʼlum qilgan. Ammo hech qanday hujjat taqdim etmagani bois mahsulotlar vaqtincha saqlash uchun muzxonaga joylashtirilib, isteʼmolga yaroqliligi tekshirilgan.
Veterinariya-sanitariya oziq-ovqat xavfsizligi laboratoriyasi xulosasiga ko‘ra, go‘sht mahsuloti isteʼmolga yaroqsizligi ayon bo‘ldi. Mahsulot tegishli tartibda yoqib, yo‘q qilindi.
Qonunbuzar fuqaroga esa tegishli tartibda maʼmuriy jazo qo‘llanilgan.
Oqqo‘rg‘on tumanida eshak suyaklarining suvga tashlab ketilayotgani holatidan boshlangan tadbir Ohangaron tumanida davom ettirilib, 3 nafar shaxs gumonlanuvchi sifatida ushlangani va tergovga qadar surishtiruv olib borilayotgani haqida xabar berilgan.
Ijtimoiy tarmoqlarda Surxondaryo viloyatida fuqarolarning eshak so‘ygani aytilgan va hayvonlar jasadi ko‘ringan video tarqalgandi. Viloyat hokimligi axborot xizmati rahbari bu eski video ekanligini bildirgan.
Ma’lumot uchun, eshak terisi va ichagi tibbiyotda subtovar sifatida foydalaniladi. Qonunchilikda eshak go‘shtini iste’mol qilish yoki sotganlik uchun javobgarlik yo‘q. Faqat eshak go‘shtini boshqa hayvon, masalan, mol go‘shti deb sotganlik uchun javobgarlik mavjud.
Izoh (0)