Bugungi kunda mamlakatimizda parrandachilikka katta eʼtibor qaratilmoqda. Chunki aynan parrandachilik aholini oziq-ovqat mahsulotlari bilan taʼminlanishida asosiy ahamiyat kasb etib, qishloqlarda odamlarning ish bilan band bo‘lishiga hissa qo‘shadi.
Xabaringiz bor, O‘zbekiston Respublikasi Prezidentining 2025-yil 30-yanvardagi PQ-34-son “Chorvachilik va parrandachilikni qo‘llab-quvvatlash, sohada yuqori qo‘shilgan qiymat yaratish bo‘yicha qo‘shimcha chora-tadbirlar to‘g‘risida”gi qaroriga ko‘ra, Parrandachilik sohasida aholi xonadonlari bilan kooperatsiya asosida ishlash tizimini moliyalashtirish uchun Tiklanish va taraqqiyot jamg‘armasining 50 million AQSH dollari miqdoridagi mablag‘lari “Mikrokreditbank” ATBning ustav kapitalini oshirishga yo‘naltirilgan bo‘lib, ayni damda mazkur mablag‘lar hisobiga respublikaning barcha hududlarida parrandachilikning go‘sht va tuxum yo‘nalishida kooperatsiya tizimi asosida 1 million aholini ish bilan taʼminlash bo‘yicha “Parranda boqish — daromad topish” loyihasini amalga oshirish belgilangan.
Ushbu loyiha aholi bandligini taʼminlash maqsadida kam quvvatda ishlayotgan korxonalarni moliyaviy sog‘lomlashtirish, tijorat banklari balansidagi xo‘jaliklarni salohiyatli yirik korxonalarga biriktirish, ishlab chiqarish va qayta ishlash tarmoqlari o‘rtasida kooperatsiya tizimini tashkil etish hamda yangi loyihalarni ishga tushirish hisobiga amalga oshirilishi ko‘zda tutilmoqda.
Mazkur kredit mablag‘lari kooperatsiya tizimi asosida parrandachilik loyihalarini amalga oshirish tashabbusini ko‘rsatgan xo‘jalik subyektlariga ajratiladi.
Qaror ijrosi va shu yo‘nalishdagi korxonalar faoliyatini keng yoritish maqsadida joriy yilning 25-mart kuni bank tomonidan moliyalashtirilgan Toshkent viloyatidagi “Umid” masʼuliyati cheklangan jamiyatiga bir guruh OAV vakillari ishtirokida press-tur tashkil etildi. Press-tur davomida qatnashchilar korxonada parrandachilik mahsulotlari ishlab chiqarish jarayoni bilan yaqindan tanishishdi.
Korxonaning Yangiyo‘l tumani Bo‘zsuv mahallasida joylashgan 56 ta parranda (yillik quvvati 7,5 mln bosh broyler) boqish binolarida yiliga 9 ming tonna parranda go‘shti yetishtirish hamda ichki bozorlarga yetkazib berish quvvatlari mavjud.
Korxonaning parrandachilik faoliyatini rivojlantirish loyihasiga “Mikrokreditbank” ATB tomonidan 75 mlrd so‘m miqdorida kredit ajratilgan.
Shuningdek, 1 ta ozuqa ishlab chiqarish kompleksida yiliga 12,5 ming tonna ozuqa ishlab chiqariladi. 1 ta tovuq so‘yish kompleksida esa soatiga 4 ming bosh parranda so‘yiladi. Korxonadagi 1 ta muzlatkich 1,2 ming tonnagacha mahsulotni o‘zida saqlaydi.
Bundan tashqari, korxonada 157 ming bosh naslli parrandani boqish quvvati mavjud bo‘lib, yiliga 19 mln dona inkubatsion tuxum va 12 mln bosh1 kunlik broyler jo‘jalar yetishtirish quvvatiga ega.
Qaror ijrosini ta’minlash maqsadida korxona tomonidan viloyatdagi bo‘sh turgan va past quvvatda faoliyat yuritayotgan parrandachilik xo‘jaliklari bilan kooperatsiya asosida parranda boqish yo‘lga qo‘yilmoqda.
Eng muhimi, ushbu korxonada hozir 100 ta yangi ish o‘rinlari yaratildi.
Maʼlumot uchun, “Mikrokreditbank” ATB tomonidan joriy yil boshidan buyon tadbirkorlik subyektlarining investitsion loyihalarini moliyalashtirish uchun 8 ta loyihaga jami 63 mlrd so‘mdan ortiq kredit mablag‘lari ajratib berildi.
2025-yilda 10,4 mlrd dona (2024-yilga nisbatan 103,8 foiz) tuxum va 850 ming tonna (105,3 foiz) tirik vaznda parranda go‘shti yetishtirish rejalashtirilgan.
Reklama huquqi asosida.
Izoh (0)