Navoiy viloyatining Nurota tumanidagi ayrim bog‘chalarda go‘sht iste’molga yaroqsizligi aniqlandi. Bu haqda Iste’molchilar huquqlarini himoya qilish jamiyatlari federatsiyasi xabar berdi.
Ma’lum qilinishicha, tumandagi maktab va bog‘chalarda o‘quvchi hamda tarbiyalanuvchilarning sog‘lom ovqatlanishini tashkil etish holati jamoatchilik nazorati tartibida o‘rganilgan. Jarayonda qator kamchiliklarga duch kelingan.
Jumladan, o‘rganishlar natijasida ayrim maktabgacha ta’lim muassasalarida bolalar uchun ajratilgan oziq-ovqat mahsulotlarining saqlanish qoidalariga rioya qilinmayotgani kuzatilgan. Ba’zi bog‘chalarda esa go‘sht mahsulotlarining 4/1 qismi yaroqsiz holatda ekani qayd etilgan.
-ty4oHDsf.avif)
Federatsiya tumandagi aynan qaysi bog‘chalarda bunday holat qayd etilganiga aniqlik kiritmagan. O‘rganish ishlari davom etayotgani, uning yakunlari va aniqlangan kamchiliklar bo‘yicha tegishli tashkilotlarga ma’lumot taqdim etilishi bildirilgan.
Navoiy viloyati hokimi Normat Tursunov fevral oxirlarida davlat maktabgacha ta’lim tashkilotlarida barkamol avlodni tarbiyalash yo‘nalishidagi ustuvor vazifalar muhokamasiga bag‘ishlangan tanqidiy-tahliliy yig‘ilishda bog‘chalardagi kamchiliklarga to‘xtalib, 1 kun muddatda mas’ullardan “halollik va vijdon bilan ishlash” qasamyod xatini yozdirib olish topshirig‘ini bergandi.
Bog‘chalarda oziq-ovqat bo‘yicha aniqlangan muammolar
2023-yilning sentyabrida Samarqanddagi bog‘chada bolalar ovqatidan go‘sht kam chiqqandi. “Bog‘cha qozoniga solinishi kerak bo‘lgan 12 kilo go‘sht cho‘michga chiqmadi” sarlavhali videolavha ijtimoiy tarmoqlarda tarqalgandi. Viloyat Maktabgacha va maktab ta’limi boshqarmasi bolalarning haqqiga xiyonatni kechirib bo‘lmas holat deb atagandi.
2024-yilning boshlarida Buxoro shahridagi bog‘chada bolalarga berilishi kerak bo‘lgan oziq-ovqat mahsulotlari talon-toroj qilingandi. Tekshiruv davomida tarbiyalanuvchilarga berilishi kerak bo‘lgan 12 kilogramm pishirilgan go‘sht va 4 kilogramm baliq mahsuloti oshpazlar yuvinish xonasidagi vannada yashirib qo‘yilgani aniqlangan. Oshpazlarning shaxsiy buyumlari saqlanadigan shkaf va tashkilotning bo‘sh turgan xonasidan ham yashirib qo‘yilgan oziq-ovqat mahsulotlari topilgan.
O‘sha yilning iyulida Buxoro viloyatining Peshku tumanidagi bog‘chada 150 nafar bola ovqatiga 300 gramm go‘sht solingani aniqlangandi.
Izoh (0)