O‘zbekistonda chorvachilikning sutchilik tarmog‘i jadal rivojlantiriladi. 14-may kuni “Qishloq xo‘jaligini rivojlantirish xalqaro jamg‘armasi ishtirokidagi ‘O‘zbekistonning sutchilik sohasida qo‘shilgan qiymat zanjirini rivojlantirish (2-bosqich)’ loyihasini amalga oshirish chora-tadbirlari to‘g‘risida”gi prezident qarori qabul qilindi.
Qarorga ko‘ra, loyihaning asosiy maqsadli ko‘rsatkichlari etib quyidagilar belgilandi, jumladan:
- Jizzax, Qashqadaryo, Sirdaryo, Samarqand va Surxondaryo viloyatlarida jami 320 ta mahallaga, sut yetishtiruvchi 12 mingta aholi va dehqon xo‘jaligiga xizmat ko‘rsatuvchi 100 ta sut yig‘ish punktini tashkil etish;
- 865 nafar aholi va dehqon xo‘jaligiga sutni qayta ishlovchi korxonalarni tashkil etish va modernizatsiya qilishga 250 ming AQSH dollarigacha imtiyozli kreditlar ajratishni tashkil etish;
- sut yetishtiruvchi va sotib oluvchilarni birlashtiradigan Milliy sut mahsulotlari platformasi dasturiy ta’minotini ishga tushirish;
- qoramollarning mahsulotdorligini oshirish bo‘yicha sut yetishtiruvchi 1,2 ming nafar aholi va dehqon xo‘jaligi vakillarining xorijiy mutaxassislar tomonidan o‘qitish.
Loyihaning umumiy qiymati 53,01 million dollar bo‘lib, uni moliyalash uchun Qishloq xo‘jaligini rivojlantirish xalqaro jamg‘armasi tomonidan 25 yilga 30 million dollar miqdorida imtiyozli kredit hamda 7,8 million dollar miqdorida kredit ajratiladi. Loyiha qiymatidan 5,94 dollar ekvivalentidagi mablag‘lar loyiha ishtirokchilari ulushi, 9,27 million dollar ekvivalentidagi mablag‘lar, shu jumladan, soliq, bojxona va ofis ijara xarajatlari to‘lovi ko‘rinishidagi 3,69 million dollar, investitsiya davrida moliyaviy xarajatlar ko‘rinishidagi 5,558 million dollar ekvivalentdagi mablag‘lar O‘zbekiston ulushi hisoblanadi.
Loyihani amalga oshirish davri 7 yil (2025–2031-yillar) etib belgilandi.
O‘zbekistonda sut yetishtirish
Mamlakatda sut yetishtirish hajmi yildan yilga oshib bormoqda. 2024-yilning iyul oyiga kelib mamlakatda 5,4 million tonnadan ortiq sut ishlab chiqarilgan bo‘lib, bu o‘tgan yilning shu davriga nisbatan 2,6 foizga ko‘pdir. Mamlakatda taxminan 4,7 millionta sut chorvasi mavjud bo‘lib, yillik umumiy sut ishlab chiqarish hajmi 10,2 million tonnani tashkil etadi.
Sut ishlab chiqarishning katta qismi dehqon xo‘jaliklari hissasiga to‘g‘ri keladi. Mamlakatdagi sut chorvalarining 94 foizi dehqonlarga tegishli bo‘lib, ular umumiy sut ishlab chiqarishning 90 foizini ta’minlaydi.
2025-yilning mart oyida “Qishloq xo‘jaligida yerdan foydalanish samaradorligini oshirish va mahsulot yetishtirish hajmini ko‘paytirish bo‘yicha qo‘shimcha chora-tadbirlar to‘g‘risida”gi prezident qarori bilan chorvachilik uchun ozuqa ekinlar yetishtirish hajmini oshirish orqali go‘sht va sut mahsulotlari narxlarining barqarorligini ta’minlash belgilangandi.
Izoh (0)