Ommaviy axborot vositalarida O‘zbekistonda go‘sht narxi MDH davlatlari bilan solishtirganda qimmat degan mazmunda e’lon qilinayotgan materiallar sababli 2025-yilning fevral oyi holatiga O‘zbekiston, Qozog‘iston, Qirg‘iziston, Tojikiston va Rossiyada go‘sht mahsulotlari (mol go‘shti, qo‘y go‘shti, tovuq go‘shti)ning o‘rtacha narxlari tahlil qilindi.
Narxlarga oid axborot tegishli mamlakatlar milliy statistika idoralarining veb-saytlari e’lon qilingan oylik va haftalik ma’lumotlar asosida tayyorlandi. Bunda mamlakatlar, ularning poytaxtlar va yirik shaharlari kesimida o‘rtacha narxlar ko‘rib chiqildi. Narxlar milliy valyutalarning AQSH dollariga nisbatan o‘rtacha kursi bo‘yicha hisoblangan.
Mol go‘shti
2025 yilning fevral oyida mamlakat kesimida o‘rtacha hisobda mol go‘shtining eng yuqori narxi Qirg‘izistonda kuzatildi – 7,4 $/kg. O‘zbekistonda mol go‘shti narxi 7,1 $/kg, Rossiyada – 6,6 $/kg, Qozog‘istonda – 5,7 $/kg ni tashkil etdi.
Oziq-ovqat mahsulotlari narxlarini tahlil qilishda nafaqat joriy narxlar, balki ularning o‘sish sur’atlari ham hisobga olish zarur. Bu boradagi dinamika mahsulotlar naqadar tez qimmatlashayotgani (yoki arzonlashayotgani) va haqiqatan ham narxlarning keskin o‘sishi bor-yo‘qligini ko‘rsatadi.
Masalan, joriy yilning dastlabki ikki oyida Qozog‘istonda mol go‘shtining narxi 6,2 foizga oshdi. Qirg‘izistonda o‘sish 4 foizni tashkil qildi, O‘zbekistonda – 3,7 foiz, Rossiyada – 3,4 foiz.
Bunda, Markaziy Osiyo mamlakatlarida narx dinamikasining tezlashishi faqat fevral oyida kuzatilmoqda. Jumladan, Qozog‘istonda 4,2 foizga, Qirg‘izistonda 3,5 foizga, O‘zbekistonda 3,1 foizga tezlashdi.
Ko‘rib chiqilayotgan mamlakatlarning poytaxtlari va yirik shaharlarida mol go‘shtining eng yuqori narxi Moskvada – 8,3 $/kg, Bishkekda – 7,7 $/kg, Dushanbeda – 7,3 $/kg, Sankt-Peterburgda – 7,2 $/kg, Toshkentda – 6,8 $/kg qayd etilgan.
Qo‘y go‘shti
Ko‘rib chiqilayotgan mamlakatlar orasida eng qimmat qo‘y go‘shti Rossiyada – 8,8 $/kg, O‘zbekistonda – 7,4 $/kg, Qirg‘izistonda – 7 $/kg, Qozog‘istonda – 5,8 $/kg.
Qirg‘izistonda yil boshidan beri qo‘y go‘shtining o‘rtacha narxi 4,1 foizga, O‘zbekistonda 3,4 foizga, Qozog‘istonda 2 foizga va Rossiyada 0,4 foizga oshdi.
Narxlarning oylik o‘sish dinamikasi Qirg‘iziston va O‘zbekistonda eng yuqori bo‘ldi – fevral oyida o‘sish 3 foizni tashkil etdi. Qozog‘istonda qo‘y go‘shtining o‘rtacha narxi 2,1 foizga, Rossiyada 0,9 foizga oshdi.
Poytaxtlar va yirik shaharlar kesimida eng qimmat qo‘y go‘shti Moskvada – 11,7 $/kg, Sankt-Peterburgda – 10,5 $/kg, Toshkentda – 8,1 $/kg, Dushanbeda – 7,5 $/kg, Bishkekda – 6,7 $/kg. Ko‘rib chiqilayotgan mamlakatlar orasida qo‘y go‘shtining eng past narxlari Qozog‘istonda: Olmaotada – 6,5 $/kg, Ostonada – 6,3 $/kg.
Tovuq go‘shti
Qirg‘izistonda tovuq go‘shtining fevral oyidagi o‘rtacha narxi 4,2 $/kg ni tashkil etdi. Shu bilan birga, Qozog‘istonda 3 $/kg, O‘zbekiston va Rossiyada esa 2,4 $/kg bo‘ldi.
Rossiyada yil boshidan beri tovuq go‘shtining o‘rtacha narxida keskin o‘sish kuzatilmoqda – 9,7 foiz. Shu bilan birga, Qozog‘istonda narxlar 4,7 foizga oshgan, Qirg‘izistonda amalda o‘zgarishsiz qolgan, O‘zbekistonda esa tovuq go‘shti hatto 0,5 foizga arzonlashgan.
2025 yil fevral oyida narxlar o‘zgarishining eng yuqori oylik dinamikasi Rossiyada kuzatildi – 7,4 foiz. Qozog‘istonda bu raqam 4,4 foizni tashkil qildi, O‘zbekistonda – 0,3 foizni. Shu bilan birga, Qirg‘izistonda tovuq go‘shti fevral oyida 0,8 foizga arzonlashdi.
Poytaxtlar va yirik shaharlar kesimida eng qimmat tovuq go‘shti Bishkekda qayd etilgan – 4,1 $/kg. Qozog‘iston shaharlarida tovuq go‘shti arzonroq: Ostonada 3,4 $/kg, Olmaotada – 3,2 $/kg. Toshkentga bir kilogramm tovuq go‘shti 3,1 dollarga to‘g‘ri keladi. Ko‘rib chiqilayotgan shaharlar orasida eng arzon tovuq go‘shti Moskva va Sankt-Peterburgda qayd etilgan – 2,6 $/kg.
Oziq-ovqat mahsulotlari narxining global o‘sishi
Ta’kidlash joizki, global miqyosda oziq-ovqat narxlarining oshishi mahalliy bozorlarga ham ta’sir ko‘rsatmoqda. BMTning Oziq-ovqat va qishloq xo‘jaligi tashkiloti (FAO) hisob-kitoblariga ko‘ra, fevral oyi yakunlari bo‘yicha Oziq-ovqat narxlari indeksi 1,6 foizga oshdi, bu asosiy oziq-ovqat mahsulotlari narxlarining o‘sishi davom etayotganidan dalolat beradi.
FAO go‘sht narxlari indeksining o‘rtacha qiymati 118,0 punktga yetdi, bu o‘tgan yilgi darajadan 5,4 punktga yoki 4,8 foizga yuqori. O‘sishning asosiy sababi – jahon bozorlarida barqaror yuqori talab bilan bog‘liq bo‘lgan mol go‘shti narxining oshishi bo‘ldi.
Izoh (0)