Joriy yil martida oylik va yillik inflyatsiya darajalarida o‘sish kuzatildi. Bu haqda Statistika qo‘mitasi e’lon qilgan tahlilda qayd etilgan.
2025-yil martida tovar va xizmatlarning oylik narxlari 0,9 foizga ko‘tarildi. Birinchi chorakda (yanvar-mart oylarida) bu raqam 2,1 foizga oshgan. 2024-yil yanvar-martidagi ko‘rsatkich 1,7 foizlik o‘sgan.
Mart oyida yillik inflyatsiya darajasi 0,2 foizga oshib, 10,3 foizga yetdi. Fevraldagi ko‘rsatkich 10,1 foiz, yanvardagisi 9,9 foiz bo‘lgandi. Birinchi chorak davomida yillik inflyatsiya 0,5 foiz yuqoriladi. Oxirgi 12 oyda tovar va xizmatlar 8 foizdan 10,3 foizga (jami 2,3 foiz o‘sgan) qimmatlashgan.
O‘tgan oyda mamlakat miqyosida yillik inflyatsiya darajasi eng yuqori hudud Toshkent shahri bo‘ldi — 12 foiz. Eng past ko‘rsatkich esa Sirdaryo viloyatida qayd etilgan — 8,6 foiz.
Martda oziq-ovqat inflyatsiyasi boshqa tovar va xizmatlar guruhlariga nisbatan yuqoriroq o‘sdi va 1,5 foizni tashkil etdi. Nooziq-ovqat mahsulotlari narxlari 0,2 foiz, xizmatlarniki 0,7 foizga oshdi.
O‘tgan oyda mol go‘shti 8,3–8,8 foiz, qo‘y go‘shti 9,1 foiz, go‘sht qiymasi 5,4 foizga qimmatlashdi. Tovuq go‘shti narxlari 0,1-0,6 foiz, tirik baliq 1,7 foizga oshdi. Boshqa asosiy turdagi mahsulotlardan sariyog‘ 1,1 foizga, sut 0,9 foizga, spirtsiz ichimliklar narxlari 0,5 foizga ko‘tarildi. Guruch narxi esa 2,3 foiz, bug‘doy uni 1,4 foiz arzonlashdi.
Meva-sabzavot mahsulotlari narxlari dinamikasi mavsumiylik omiliga bog‘liq bo‘ldi. Mevalar va yong‘oqlar oy davomida sezilarsiz darajada qimmatlashdi (o‘rtacha 0,1 foizga). Sabzavotlar, ildizmevalilar va dukkaklilar o‘rtacha 0,3 foizga, shu jumladan, sabzi 15,7 foizga, pomidor 4,3 foizga, bulg‘or qalampiri 3,8 foizga, karam va sarimsoq 2,6 foizga, piyoz 1,9 foizga qimmatlashdi, deyiladi qo‘mita hisobotida.
Qayd etilishicha, o‘tgan oyda bodring narxida 14,7 foiz, kartoshkada 3,7 foiz arzonlashish kuzatilgan.
Martda maishiy chiqindilarni olib ketish xizmati narxi respublikada o‘rtacha 4 foizga oshdi. Shu bilan birga, havo transportida yo‘lovchilarni tashish xizmatlari narxi 4,4 foiz qimmatlashgan. Jumladan, ichki yo‘nalishda samolyot chiptalari narxi 3,9 foiz, xalqaro yo‘nalishda 4,8 foiz o‘sgan.
Avtomobil transporti xizmatlari 0,5 foiz, temir yo‘l transporti 0,4 foizga qimmatlashgan. Mobil aloqa xizmatlari narxi o‘rtacha 3,5 foizga oshgan.
Fevral oyida aholining kelgusi 12 oylik inflyatsion kutilmalari yanvardagiga (14,4 foiz) qaraganda oshib, 15,3 foizga yetgan xabar qilingandi. Aholi kelasi bir yil davomida kommunal to‘lovlar, yoqilg‘i va energiya resurslari qimmatlashishidan ko‘proq xavotir bildirgan.
Izoh (0)