Қашқадарё вилоятдан пойтахтга сотиш учун олиб кетилаётган истеъмолга яроқсиз 431 кг гўшт йўқ қилинди, деб хабар берди Жиззах вилояти ИИБ матбуот хизмати.
Маълум қилинишича, Ғаллаорол туманида жойлашган “Сангзор-15” ЙПХ масканида хизмат олиб бораётган ИИО ходимлари Самарқанд-Тошкент йўналишида ҳаракатланаётган Cobalt автомашинасини тўхтатган. Қашқадарё вилояти, Чироқчи тумани, “Чувиллоқ” маҳалласида яшовчи, 1994 йилда туғилган фуқаро бошқарувидаги автомашина текширилган салон ва юкхонада 431 кг гўшт борлиги аниқланди.
Ҳайдовчи ушбу гўштни Тошкент шаҳрига сотиш мақсадида олиб кетаётганини маълум қилган. Аммо ҳеч қандай ҳужжат тақдим этмагани боис маҳсулотлар вақтинча сақлаш учун музхонага жойлаштирилиб, истеъмолга яроқлилиги текширилган.
Ветеринария-санитария озиқ-овқат хавфсизлиги лабораторияси хулосасига кўра, гўшт маҳсулоти истеъмолга яроқсизлиги аён бўлди. Маҳсулот тегишли тартибда ёқиб, йўқ қилинди.
Қонунбузар фуқарога эса тегишли тартибда маъмурий жазо қўлланилган.
Оққўрғон туманида эшак суякларининг сувга ташлаб кетилаётгани ҳолатидан бошланган тадбир Оҳангарон туманида давом эттирилиб, 3 нафар шахс гумонланувчи сифатида ушлангани ва терговга қадар суриштирув олиб борилаётгани ҳақида хабар берилган.
Ижтимоий тармоқларда Сурхондарё вилоятида фуқароларнинг эшак сўйгани айтилган ва ҳайвонлар жасади кўринган видео тарқалганди. Вилоят ҳокимлиги ахборот хизмати раҳбари бу эски видео эканлигини билдирган.
Маълумот учун, эшак териси ва ичаги тиббиётда субтовар сифатида фойдаланилади. Қонунчиликда эшак гўштини истеъмол қилиш ёки сотганлик учун жавобгарлик йўқ. Фақат эшак гўштини бошқа ҳайвон, масалан, мол гўшти деб сотганлик учун жавобгарлик мавжуд.
Изоҳ (0)