To‘rt oy ichida oltin sotuvi mamlakat umumiy eksportining qariyb yarmini tashkil etdi. Gaz eksporti hajmi ham 85 foiz o‘sdi.
Statistika qo‘mitasi 2025-yil yanvar—aprel oylaridagi O‘zbekiston tashqi savdosi hajmini ochiqladi. Qayd etilishicha, bu davrda mamlakat 11,9 mlrd dollarlik eksport (yillik o‘sish 35,1 foiz), 12,7 mlrd dollarlik (o‘sish 2,9 foiz) import operatsiyalarini amalga oshirgan. Umumiy tashqi savdo taqchilligi 846,3 mln dollar bo‘lgan.
Eng yirik savdo hamkorlar
O‘zbekiston tashqi savdo aylanmasining to‘rtdan uch qismi uchta davlat hissasiga to‘g‘ri kelmoqda. Xususan, hisobot davrida respublika bilan Xitoy 4,2 mlrd dollarlik, Rossiya 3,7 mlrd dollarlik, Qozog‘iston 1,4 mlrd dollarlik savdo qilgan.
Mamlakat eksport–importi tarkibida eng yuqori ulush Toshkent shahri — 8 mlrd dollar ( jami savdoning 32,7 foizi), kam ulush esa Qoraqalpog‘iston (208,8 mln dollar yoki 0,8 foiz) hissasiga to‘g‘ri kelgan.
Nimalar ko‘p eksport qilindi?
Yanvar–aprel oylarida eksport ulushi ortishida oldingi yillar mos davrlariga nisbatan ko‘p oltin sotilgani muhim rol o‘ynagan. Jumladan, joriy yil to‘rt oyidagi eksport tushumining qariyb 5,5 mlrd dollari yoki 46,1 foizi oltin sotuvidan kelgan. Bunda qimmatbaho metall eksporti 2024-yil mos davridagidan (3,4 mlrd dollar) 62,3 foizga o‘sgan.
Yanvar—aprelda mamlakat oltinsiz eksporti hajmi 6,4 mlrd dollarga yetgan (o‘tgan yilning shu davrida 5,1 mlrd dollar bo‘lgan).
To‘rt oy mobaynida 2,5 mlrd dollarlik xizmatlar eksport qilingan (jami hajmining 21,1 foizi). Bu ko‘rsatkich 2024-yil mos davriga nisbatan 36,4 foizga ko‘p. Xizmatlar eksporti tarkibining asosiy ulushi turizm (1,2 mlrd dollar) va transport (924,6 mln dollar) sohalari hissasiga to‘g‘ri kelgan.
Hisobot davrida 1,2 mlrd dollarlik tushumlar sanoat tovarlari (umumiy hajmning 10,1 foizi) eksportidan bo‘lgan.
To‘rt oy davomida mamlakat boshqa davlatlarga 199,7 mln dollarlik gaz (o‘sish 85 foiz), 71,7 mln dollarlik elektr toki sotgan.
O‘z navbatida 429,3 mln dollarlik sabzavot va mevalar (o‘sish 41,9 foiz), 170,6 mln dollarlik donli ekinlar hamda ulardan tayyorlangan mahsulotlar (o‘sish 33,6 foiz) eksport qilingan. Xorijga sut (25 mln dollar, o‘sish 146,8 foiz) hamda go‘sht va go‘sht mahsulotlari (5,8 mln dollar, o‘sish 31,2 foiz) eksporti ham oshgan,
Import tarkibi
Import tarkibida eng katta ulushni mashinalar va transport asbob-uskunalari (33,9 foiz), sanoat tovarlari (16,3 foiz), kimyoviy vositalar va shunga o‘xshash mahsulotlar (13 foiz) tashkil etgan.
Eng ko‘p tovar va xizmatlar Xitoy (3,6 mlrd dollar), Rossiya (2,5 mlrd dollar) va Qozog‘iston (986,8 mln dollar) davlatlaridan sotib olingan.
Respublika hudular miqyosida importning asosiy ulushini Toshkent shahri (48,6 foiz) qamragan bo‘lsa, eng kam ko‘rsatkich Qoraqalpog‘istonda (0,7 foiz) qayd etilgan.
To‘rtinchi oydirki, O‘zbekistonga avtomobillardan (213,7 mln dollar) ko‘ra, ularning ehtiyot qismlari (“zapchastlar”) ko‘proq import qilinmoqda. Jumladan, yanvar–aprel oylarida chet eldan 544,4 mln dollarlik avtomobillar ehtiyot qismlari sotib olingan. Bunda avtomobil importi uch karra qisqargan bo‘lsa, “zapchast” importi 34,4 foizga oshgan.
Hisobot davrida mamlakat 150,5 mln dollarlik tabiiy gaz import qilgan. Bu o‘tgan yil mos davridagidan 64,2 foizga kam.
Izoh (0)