Mamlakat bozorlarining arzonlashtirilgan rastalarida 1 kg mol va qo‘y go‘shti o‘rtacha 65–75 ming, savdo rastalarida 90–95 ming so‘mdan sotilmoqda. Bu haqda Qishloq xo‘jaligi vazirligi bayonotida maʼlum qilingan.
Qishloq xo‘jaligi vazirligi go‘sht narxi qimmatlashishi yuzasidan rasmiy bayonot bilan chiqdi. Qayd etilishicha, go‘sht narxi oshishi global miqyosda kuzatilmoqda. Bu dunyoda go‘sht ishlab chiqarish hajmi sekinlashayotgani, yirik importchi davlatlarda talab yuqoriligi va ozuqa xomashyosi va transport xarajatlari ortishi bilan bog‘liq.
“Masalan, Rossiyada tovuq go‘shti narxi yil boshidan buyon 9,7 foizga, Qozog‘istonda esa 4,7 foizga oshgan. Umuman olganda, O‘zbekistonda go‘sht narxi mintaqaviy tendensiyalar doirasida saqlanmoqda va global bozor tebranishlariga nisbatan barqarorlikni namoyon qilmoqda”, deb yozgan vazirlik.
Bayonotda O‘zbekiston bozorlarining arzonlashtirilgan rastalarida 1 kg mol va qo‘y go‘shti o‘rtacha 65–75 ming so‘mdan, savdo rastalarida 90–95 ming so‘mdan, savdo markazlarida 95–100 ming so‘mdan sotilayotgani maʼlum qilingan.
“Toshkent shahridagi arzonlashtirilgan rastalarda 65–75 ming so‘mlik go‘shtni xaridorlarning 15–18 foizini, 90–95 ming so‘mlik ro‘zg‘orbop go‘sht esa 82–85 foizini, 110–130 ming so‘mlik suyaksiz (lahm) go‘sht atigi 1–2 foizini tashkil etadi”, deya tahlil qilgan vazirlik.
Bayonot davomida O‘zbekistondagi narxlar ayrim davlatlardagi raqamlar bilan taqqoslangan.
“Rossiyada 1 kg mol go‘shti 10–12, Belarusda 6–8, Qozog‘istonda 7–11, Tojikistonda 8–10, Gruziyada 9,5–12, Ozarbayjonda 9,5–12,5, Turkiyada 12–14 dollar, shuningdek, iqtisodiyoti rivojlangan davlatlar Shvetsiyada 46,2, Islandiyada 38,86, Janubiy Koreyada esa 28 dollar atrofida sotilmoqda”, qayd etilgan tahlilda.
Vazirlikka ko‘ra, O‘zbekiston dunyoning go‘sht eng arzon sotiladigan davlatlari qatorida bo‘lib, Markaziy Osiyo mamlakatlari ichida Qirg‘izistondan keyingi ikkinchi o‘rinni egallaydi.
Bayonotda 2025-yil I choragida go‘sht narxiga taʼsir qiluvchi yem—ozuqa, elektr energiyasi va yoqilg‘i–moylash materiallari qimmatlashgani keltirilgan.
“Chorvachilikda go‘sht yetishtirish uchun kuchli ozuqaga bo‘lgan talab yuqoriligi, ozuqa yetishtirish uchun yer maydonlarining yetishmasligi tufayli chorva mollarini ozuqa bilan taʼminlanish darajasining 35-40 foizini tashkil etmoqda. 2024-yil oktyabr oyidagi narxlar bilan solishtirilganda, bugungi kunda shrot narxi 3 ming so‘mdan 7 ming so‘mga, sheluxa 2 800 so‘mdan 4 ming so‘mga, omuxta yem 2 900 so‘mdan 3 700 so‘mga, bug‘doy 2 200 ming so‘mdan 3 500 ming so‘mga, makkajo‘xori silosi 500 so‘mdan 900-1 000 so‘mga, somon 15 ming so‘mdan 25 ming so‘mga, beda esa 25 ming so‘mdan 45 ming so‘mga oshgan. Ozuqa xarajatlari, mehnatga haq to‘lash va elektr energiyasi xarajatlarining oshishi ham go‘sht tannarxiga bevosita taʼsir ko‘rsatayotganini alohida taʼkidlash zarur”, deya bayon etgan vazirlik.
Vazirlikning maʼlum qilishicha, 2024-yilda O‘zbekistonda umumiy 2,9 mln tonna tirik vaznda (1,7 mln tonna so‘yilgan vaznda) go‘sht ishlab chiqarilgan. Jami 93 ming tonna go‘sht import qilingan. Ishlab chiqarilgan go‘shtga nisbatan import salmog‘i 5,4 foizni tashkil etgan.
Import qilingan go‘shtning 70 foizi qayta ishlash korxonalariga yo‘naltirilgan bo‘lsa, qolgan qismi Toshkent shahri dehqon bozorlaridagi arzonlashtirilgan rastalarda sotilgan.
Maʼlumot uchun, O‘zbekiston o‘rtacha 4 dollardan go‘sht import qilmoqda. Importning juda katta qismi Belarus va Qozog‘iston hisobiga to‘g‘ri keladi. Uch oydan buyon so‘rovlarda go‘sht eng ko‘p qimmatlagan mahsulot o‘laroq sanalmoqda.
Mart oyida O‘zbekistondagi go‘sht narxi MDH davlatlariga nisbatan qimmatligi ma’lum qilingan edi.
Statistika agentligi tahliliga qaraganda, go‘sht narxlari yanvardan beri har oy oshib bormoqda. Markaziy bank so‘rovlarida ham aholi tomonidan go‘sht qimmatlashgani bildirgan.
Iqtisodiyot va moliya vazirligi o‘rganishlariga ko‘ra, Toshkent shahridagi bozorlarda mol go‘shtining ulgurji narxi 73 ming so‘mdan 95 ming so‘mgacha, qo‘y go‘shti esa 83 ming so‘mdan 95 ming so‘mgacha tashkil etmoqda.
Izoh (0)