Aka-uka Vachovskilarning “Matritsa” fantastik jangari filmi dunyoni “oldin” va “keyin”ga ajratib yubordi. Filmni suratga olish uchun maxsus yaratilgan betakror vizual effektlar boshqa rejissyorlarning asarlariga ham ko‘chdi va jangari filmlar yaratish uslubini butunlay o‘zgartirib yubordi.
Film ko‘plab nufuzli mukofotlarni qo‘lga kiritdi, ular orasida to‘rtta “Oskar” mukofoti ham bor. E’tiborli jihati shundaki, barcha oltin haykalchalar “Matritsa”ga filmning texnik jihatlari uchun berildi: “Eng yaxshi montaj”, “Eng yaxshi ovoz”, “Eng yaxshi vizual effektlar” va “Eng yaxshi ovoz montaji”. Biroq Amerika kinoakademiyasining bunday yuksak bahosiga qaramay, filmda anchagina xato va kamchiliklar ham bor.
O‘zi qovuriladigan steyk
Odatda suratga olish jarayonida aktyorlar ovqatni yeyishadi, ba’zan bir necha dubllarda ham. Shu bois hatto bitta sahnani suratga olish paytida ham bir nechta taom ishlatilishi mumkin.
Bu xoin Sayfer (Jo Pantolyano) bilan agent Smit (Hyugo Uiving) o‘rtasidagi suhbat sahnasida yaqqol ko‘zga tashlanadi. Ular restoranda tushlik qilib, qo‘zg‘olonchilar guruhini topshirish shartlarini muhokama qilishmoqda. Suhbat davomida Sayfer chala pishgan steykdan katta bo‘lak kesib oladi. Biroq kadr o‘zgarganida uning sanchqisida yaxshi qovurilgan go‘sht bo‘lagi paydo bo‘ladi.
Pechenye yeysanmi?
Eski oshxonada Neo (Kianu Rivz) bashoratchi ayolga duch keladi va o‘zining hali tanlangan bo‘lishga tayyor emasligini bilib oladi. Bu xabar Neoni biroz sarosimaga soladi — u xafa bo‘lmasligi uchun Pifiya mehmonni pishiriqlar bilan siylaydi.
Diqqat bilan kuzatilsa, u stolga olib kelayotgan likopchaga to‘rtta pechenye qo‘yganini ko‘rish mumkin. Keyin Neoga vaziyatni tushuntiradi va unga shirinlikni uzatadi. Ammo endi likopchadagi pechenyelar 6 ta bo‘lib qoladi.
Keyingi sahnada Neo ayolning uyidan tishlangan pishiriq bilan chiqadi. Ammo Morfeusning qisqa gapidan so‘ng Neoning qo‘lida yana butun pishiriq paydo bo‘ladi.
Shunchaki tirnalish
Filmning eng mashhur sahnasi, shubhasiz, bino tomidagi epizoddir. Unda Neo birinchi bor o‘qlardan qochish mahoratini namoyish etadi. Bu lahza “Matritsa” uchun maxsus yaratilgan “bullet time” texnologiyasi yordamida suratga olingan.
Bosh qahramon orqaga egiladi. Unga otilgan o‘qlarning deyarli barchasi yonidan o‘tib ketadi, faqat oxirgi ikkitasi yelkasi va sonini tirnab o‘tadi. Bu paytda Neoning tanasi gorizontal holatga yaqinroq turadi, shuning uchun tirnalishlar qo‘l va oyoq bo‘ylab ketadi. Biroq filmning qolgan qismida Kianu Rivz o‘ng yelkasida gorizontal o‘q izi bilan yugurib yuradi. To‘g‘ri, metroda agent Smit bilan bo‘lgan jang paytida bu iz bir lahzaga yo‘qoladi. Ammo keyin yana paydo bo‘ladi.
Voqea joyi
Film voqealari Amerika megapolisida kechadi. Biroq “Matritsa” Sidneyda suratga olingan. Jamoa suratga olishlarni shunday tashkil etganki, ekranda shaharga aloqador bo‘lgan birorta bino ko‘rinmaydi. Ammo ayrim kadrlardan voqealar Avstraliyada ro‘y berayotganini bilib olish mumkin.
Gap shundaki, avstraliyaliklar ham, britaniyaliklar singari yo‘lning chap tomonidan yurishadi, AQSHda esa harakat o‘ng tomonlama. Bu farq janob Anderson derazadan chiqib, telefonini tushirib yuborgan sahnada yaqqol ko‘zga tashlanadi. O‘sha paytda ko‘chadagi mashinalar Avstraliya uslubida harakatlanmoqda. Xuddi shunday manzarani ko‘prik ostidagi sahnada, Neo Trinitining mashinasiga o‘tirganida, orqa planda kuzatish mumkin.
Voqealar AQSHda kechmagani ko‘rsatuvchi yana bir belgi — agentlar Morfeusni ushlab turgan binodagi lift eshigi yonidagi yozuvdir. Unda yong‘in paytida liftdan foydalanmaslik kerakligi yozilgan. Chunki amerikaliklar liftni “elevator” deb ataydi.
Ko‘zgudagi aks
Film davomida bosh qahramonlar va ularni ta’qib qilayotgan agentlar doimo qora ko‘zoynak taqib yurishadi. Bu aksessuar juda zamonaviy ko‘rinadi va voqealar qaysi reallikda sodir bo‘layotganini ko‘z bilan ilg‘ash imkonini beradi.
Ammo estetik afzalliklar optik kamchiliklar bilan yonma-yon keladi — personajlarning qora ko‘zoynaklarida suratga olish guruhi a’zolari, yoritgichlar va boshqa jihozlarning aksi tushgan o‘nlab holatlarni ko‘rish mumkin.
Shuningdek, janob Andersonni so‘roq qilish sahnasida uning og‘zi to‘satdan bitib qolganida, agent Smitning ko‘zoynaklaridagi aks teskari ekanligini payqash mumkin. Yuzini changallab olgan Kianu Rivz xonaning burchagiga tiqilib oladi, biroq keyingi kadrda Hyugo Uiving taqib olgan ko‘zoynakda u hamon stol ortida o‘tirganini ko‘rish mumkin.
Izoh (0)