Germaniya mehnat bozoriga O‘zbekistondan mutaxassislarni jalb qilishga qaratilgan uch tomonlama memorandum imzolandi, deb xabar bermoqda “Dunyo” axborot agentligi.
Ma’lum qilinishicha, O‘zbekistonning Berlindagi elchixonasida uch tomonlama anglashuv memorandumini imzolash marosimida “Mikrokreditbank” Aksiyadorlik tijorat banki boshqaruv raisi Orif Bo‘tayev, International People IP GMbH and Co.KG kompaniyasi rahbari Tomas Fyorster boshchiligidagi delegatsiya, diplomatlar, shuningdek, onlayn tarzda German Sparkassenstiftung for International Cooperation tashkilotining O‘zbekistondagi rahbari Matias Vangler ishtirok etdi.
Imzolangan memorandumga ko‘ra, nemis tomoni o‘zbekistonlik mutaxassislarni gastronomiya, oziq-ovqat logistikasi, logistika va go‘sht mahsulotlarini qayta ishlash sanoati sohalarida Germaniya korxonalarida ishlashga tayyorlash uchun dual kasbiy ta’lim o‘quv yurtlarida o‘qish jarayonini yengillashtirish maqsadida til kurslari taklif etadi. Shuningdek, saralangan mutaxassislarga viza va boshqa hujjatlarni rasmiylashtirish, Germaniyada kutib olish, ish va yashash joylari bilan ta’minlash va ro‘yxatdan o‘tkazish ishlarida yaqindan yordam beradi.
“Toshkent shahrida kompaniyamizning International People Education GmbH til o‘quv markazi o‘z faoliyatini boshladi. Hozirgi kunda o‘quv markazida nemis tili bilim darajasini aniqlash bo‘yicha xalqaro til sertifikatlari olish uchun mo‘ljallangan til kurslari hamda kasbga yo‘naltirilgan maxsus til kurslariga qatnashish imkoniyati mavjud”, dedi o‘quv markazi rahbari Akbar Faxriyev.
Nemis kompaniyasi delegatsiyasining 2025-aprel oyida O‘zbekistonga safari, German Sparkassenstiftung for International Cooperation vakolatxonasi va “Mikrokreditbank” bilan birgalikda amaliy harakatlar rejasini ishlab chiqishi kutilmoqda.
Qayd etilishicha, ushbu memorandum O‘zbekiston va Germaniya o‘rtasida imzolangan migratsiya va mobillik sohasida keng qamrovli sheriklik to‘g‘risidagi bitim ijrosini ta’minlash yo‘lidagi navbatdagi amaliy qadamlardan biri bo‘lib xizmat qiladi.
2024-yilning sentyabrida o‘zbekistonliklar uchun Germaniyaga migratsiya masalasida bir qator yengilliklar ishlab chiqilayotgani ma’lum qilingandi. O‘sha yili Samarqandda bo‘lib o‘tgan O‘zbekiston—Germaniya oliy darajadagi muzokaralari natijasida bir qator hujjatlar imzolangandi. Ular orasida “Migratsiya va mobillik sohasida har tomonlama sheriklik to‘g‘risida” hukumatlararo bitim ham bor edi.
O‘zbekiston oliy o‘quv yurtlari va kasb-hunar kollejlarining diplomlari Germaniyada tan olinishiga erishish ham rejalashtirilmoqda.
Izoh (0)