O‘zbekiston xalq artisti Yulduz Usmonovaning yolg‘iz farzandi, xonanda Nilufar Usmonova 6-aprel kuni 38 yoshni qarshi oldi. Nilufar mutaxassisligi bo‘yicha huquqshunos bo‘lsa-da, u onasining izidan borib, san’at yo‘lini tanlagan.
“Bolaligimda yolg‘izlanib qolardim”
Yulduz Usmonovaning ilk turmush o‘rtog‘i sozanda Ibrohim Hakimov bo‘lgan. Ikki ijodkor qisqa turmushi davomida qiz farzandli bo‘lgan. Ammo maʼlum sabablarga ko‘ra, ular 1996-yili rasman ajrashgan. Nilufar Usmonova o‘z intervyularida to‘liq oilada ulg‘ayishni orzu qilgani va bolaligida ota-ona mehriga zor bo‘lgani haqida aytib o‘tgan.
— Bolaligim Marg‘ilonda, buvimning hovlisida o‘tgan. Raʼno xolam onamdek mehr bergan bo‘lsa-da, bola baribir o‘z ota-onasini sog‘inar ekan. Xolalarimning o‘z farzandlari bor edi. Ular bilan birga o‘ynardik, urishib qolsak baribir o‘z singlisi, ukasi bilan birga bo‘lib olardi. Men esa yolg‘izlanib qolardim. O‘shanda hali bolalarim ko‘p bo‘ladi, hech kim ularni yolg‘izlatib qo‘ymaydi, deganimda farishtalar “omin” degan ekan. Otamni ham, onamni ham yaxshi ko‘raman. Ajrashish ularning qarori. Qarorlarini hurmat qilgan holda ikkisiga ham bo‘lgan farzandlik mehrim saqlanib qoladi, deydi Nilufar Usmonova.
“Onamning xatosini takrorlamayman”
Nilufar Usmonova onasining qattiqqo‘l bo‘lgani, u qilgan xatolarni takrorlamaslikka so‘z bergani haqida gapiradi.
— Bolaligimdan yumshoq tabiatli qiz bo‘lganman, shu bilan birga odamlar nazarida bo‘lishni yoqtirmasdim. Chunki notanish odamlar ham meni ko‘rsa Yulduzning qizi deb erkalashardi. Bu esa menga yoqmasdi. Onam nihoyatda qattiqqo‘l bo‘lgan, bolaligimda boshimni silab erkalaganini eslolmayman. Xato qilsam urishardi, kaltak yegan paytlarim ham bo‘lgan. Onam mendan katta odamdan talab qilinadigan ishni talab qilardi. O‘sha paytda undan ranjiganman, ammo ona bo‘lgach, uning qarorlari to‘g‘ri ekanligini tushunib yetdim. Eng qizig‘i, nabiralaridan mendan talab qilganchalik, biror narsani so‘ramaydi. Men urishsam, bola-ku, sekin-sekin o‘rganadi, deydi.
Onam qilgan xatolarni qilmayman, sanʼatni tanlamayman, deb o‘z-o‘zimga so‘z bergandim. Ammo bandaning emas, Yaratganning aytgani bo‘larkan, deydi Nilufar Usmonova.
“Qo‘shiqchilikka umuman qiziqmaganman”
Nilufar Usmonova ilk marta 8 yoshida “Shaytonga bo‘ysungan yuraklar” nomli qo‘shiqni onasi bilan duet tarzida ijro etgan. Qo‘shiq Yulduz Usmonovaning 1995-yildagi konsert dasturi uchun maxsus yaratilgan, keyinroq unga klip ham suratga olingan.
— Qo‘shiqchilikka umuman qiziqmaganman. Menga Toshkentda yashashdan ko‘ra Marg‘ilonda buvim bilan birga qolish qiziqroq edi. Toshkentda tezda zerikib qolardim. Ilk marta sahnaga chiqishim ham onamning xohishi bilan bo‘lgan, deydi Nilufar Usmonova.
Xonanda boshlang‘ich taʼlimni Marg‘ilon shahridagi 18-sonli maktabda oladi. Undan so‘ng onasi Nilufarni Toshkentga olib kelib, til o‘rganishiga sharoit yaratadi. 10 yoshida uni Buyuk Britaniyaga o‘qishga yuborishadi, shu tarzda Nilufar Vinehall maktabi va Sherborn xalqaro kollejida tahsil oladi. Nilufar Usmonova 2001-yili O‘zbekistonga qaytib keladi va o‘rta taʼlimni xalqaro maktabda yakunlaydi.
“Seni istamagan odamga intilma”
Xonanda Nilufar Usmonova erta turmushga chiqqan. U 17 yoshida huquqshunos Novzod Saidgaziyev bilan oila qurgan. 2004-yilda xonanda ilk bor onalik baxtiga sazovor bo‘lgan. Xonandaning ilk turmushi uzoqqa cho‘zilmadi.
— Ajrashishimizning sabablari ko‘p. Men bir marta rasman nikohdan o‘tganman va ajrashganman. U inson olamdan o‘tib ketdi, yomon gaplar bilan eslashni istamayman. U besh qiz ichida o‘sgan yagona o‘g‘il farzand edi. Oilamni mustahkamlash uchun harakat qilganman, ammo onamning gaplari qattiq taʼsir qilgan. Seni istamagan insonga intilib qadringni tushirma, hammasi taqdirdan, degan. Qaynonam ham xuddi onamdek cho‘rtkesar ayol edi. O‘g‘liga yoqmayaptimi ajrash, degan. Shunday bo‘lsa-da, bu insondan minnatdorman. Chunki bu nikoh aqlli o‘g‘lim Saidaʼzamxonning tug‘ilishiga sabab bo‘ldi, deydi xonanda Nilufar Usmonova.
“Ajrashganimdan keyin onam bilan ham yasholmaganman”
Turmushdan ajrashgan Nilufar Usmonova ruhiy tushkunlikka tushadi. Onasi bilan jiddiy kelishmovchiliklarga borib, o‘g‘li bilan alohida yashashga qaror qiladi.
— Birinchi turmushim bo‘lmaganidan keyin, onam ikkinchi marta turmushga bermoqchi bo‘lganida o‘g‘limni olib, uydan chiqib ketganman. Chunki men onam aytgan insonga turmushga chiqishni xohlamaganman, sababi men boshqa insonni sevardim. Onam mashinamni olib qo‘yib, yashashim uchun uy bergan. O‘sha uyning sharoiti yaxshi bo‘lgani uchun men uni ijaraga berib, o‘zim sharoitsiz uyda yashaganman. Chunki bolamning bog‘chasiga, o‘zimning yurish-turishimga pul kerak edi. Baʼzan juda pul zarur bo‘lib qolganida, kosmetika sotadigan ayoldan tovar olib, xonanda dugonalarimga sotib, pul topganman, deydi Nilufar Usmonova.
“Ijara uyda o‘g‘limni tok urgan”
Xonanda moliyaviy qiyinchiliklarga uchragan kunlarini quyidagicha eslaydi.
— O‘g‘lim Saidaʼzamxon kuni bilan bog‘chada bo‘lardi, kechki payt uyga kelganida tez tayyor bo‘ladigan lapshani yaxshi ko‘rgani uchun, shuni olib tayyorlab berardim. Bola shuni yeb uxlardi, ertalab yana bog‘chaga ketardi. Uyim shu darajada eski, sharoitsiz ediki, poldan linoleum yirtilib, sementi chiqib yotardi. Eski “Biryusa” muzlatkichi turardi. Uni ichida hech narsa bo‘lmasdi, deyarli. Faqat ovqat qilish uchun zarur bo‘lgan go‘sht, kartoshka, sabzi, piyoz bo‘lardi. Bir kuni Saidaʼzamxon o‘sha muzlatkichni ochgandi, tok urib, orqaga otib yubordi. Shu holat menga juda qattiq taʼsir qildi. Do‘stlar, tanish-bilishlar orqali to‘ylarga chiqa boshladim. To‘ylarga kirib, qistirilgan pulni olib, chiqib ketardim. Shunday qilib men o‘zimni to‘ylarda “raskrutka” qilib olganman. Mening qo‘shiqlarim to‘ybop bo‘lmagani uchun kim qancha pul bersa, boraverganman o‘sha to‘yga.
— Birinchi gonorarimga olgan eng qimmat narsa bu 1375 dollarlik muzlatkich bo‘lgan. “Chirindi” uyimda o‘sha qimmatbaho muzlatkich turardi. Bolamni tok urib yuborgani menga qattiq taʼsir qilgan, shuning uchun eng qimmatidan olganman, deydi xonanda.
Ajrimdan keyingi ruhiy tushkunlik
Ruhiy tushkunlik va moddiy qiyinchiliklar uni ijod qilishga undaydi. 2005-yili “Bolam, shu yurt seniki” nomli qo‘shiqni ijro etadi. Bu bilan onasiga ham nimanidir isbotlashni istagandi. Ammo qo‘shiq yaratish, ijodni boshlash oson emas. Shu bois u prodyuserlik kompaniyasiga murojaat qilib, hamkorlikni taklif qiladi.
— Birinchi marta to‘yga chiqishim juda qiziq kechgan. Do‘stim Jamshid Bobojonov shunaqa qilib o‘tiraverasanmi, bolang uchun ham ishlashing kerak-ku, deb koyib bergan. Shundan keyin to‘ylarga chiqishni boshlaganmiz. Ammo faqat do‘stlarimizning to‘yiga borardik. Chunki hali tashqaridan to‘y oladigan darajada mashhur emasdim, deydi xonanda Nilufar Usmonova.
Nilufar Usmonova 2006-yili Toshkent davlat yuridik institutiga o‘qishga kiradi. Ammo u yerda o‘qish oson kechmaydi. 2009-yili oila qurgach, akademik taʼtil olishga majbur bo‘ladi. Chunki xonanda ketma-ket ikki o‘g‘il farzandli bo‘ladi. Xullas akademik taʼtillar bir-biriga ulanib xonanda 2013-yilda o‘qishni yakunlaydi.
“Yettita bolam bo‘lishini orzu qilaman”
Hozirgi kunda Nilufar Usmonovaning besh nafar farzandi bor. Xonanda intervyularida yana farzand ko‘rish niyati borligini aytib keladi.
— Yettita bolam bo‘lishini orzu qilaman. Ular bir-biriga tirgak bo‘ladi. Besh farzandimni yolg‘iz tarbiyalayapman. Yolg‘iz ayollarga qanchalik qiyinligini yaxshi bilaman. Besh bolaning taʼminoti uchun ham hamisha harakatdaman, deydi u.
“Parhez bilan ozishim qiyin”
Nilufar Usmonova muntazam sport bilan shug‘ullanadi. Unga tug‘ruqdan so‘ng qomatini rostlash va ortiqcha vazndan xalos bo‘lish ham muammo emas.
— Ko‘pchilik ayollar tug‘ruqdan so‘ng semiradi. Menda ham har bir farzandimni dunyoga keltirgach, vazn to‘plash bilan bog‘liq muammolar bo‘lgan. Parhez qilishim qiyin. Shu bois ko‘proq suv, meva-sabzavotlarni isteʼmol qilib, tinimsiz sport bilan shug‘ullanaman. Chunki parhezda yog‘lar erishi passiv, jismoniy mashqlar bilan shug‘ullanganda esa faol bo‘ladi. Shu bois faqat parhezning o‘zi bilan kutilgan natijaga erishish qiyin, deydi xonanda.
“Hech qachon taqiq bo‘lmagan”
Xonanda 2022-yili ilk marta yakkaxon konsert dasturini o‘tkazdi. U 15 yillik faoliyati davomida biror marta yakkaxon konsert dasturini taqdim etmagandi.
— Konsert berishimga hech qachon taqiq bo‘lmagan. Tan olaman, u paytlari yosh bo‘lganman, o‘yin-kulgiga o‘ch bo‘lganman. Bundan tashqari farzandlarimning ketma-ket tug‘ilishi sabab konsert berishga o‘zimda kuch topolmaganman. Ijodkor konsert berish uchun ruhan tayyor bo‘lishi kerak ekan, deydi Nilufar Usmonova.
Nilufar Usmonova tadbirkorlikda ham o‘zini sinab ko‘rishga qaror qildi. Hozircha uning turfirmasi va ro‘zg‘or buyumlari savdosi bilan shug‘ullanadigan do‘koni bor.
Izoh (0)