Rossiya prezidentining xalqaro masalalar bo‘yicha yordamchisi Yuriy Ushakov Vashington tomonidan taklif etilgan 30 kunlik o‘t ochishni to‘xtatish "Ukraina harbiylari uchun vaqtinchalik nafas olish imkoniyati" ekanligini bildirdi. Bu haqda u "Rossiya-1" telekanali efirida ma’lum qildi.
Ushakovning ta’kidlashicha, Moskva sulhdan ko‘ra uzoq muddatli yechimdan manfaatdor.
"Bizning maqsadimiz uzoq muddatli tinch yo‘l bilan hal etishdir. Biz buning uchun mamlakatimizning qonuniy manfaatlarini va ma’lum xavotirlarimizni hisobga olgan holda tinch yechimga erishishga intilamiz. Tinchlik harakatlariga taqlid qiluvchi yuzaki qadamlar, menimcha, hozirgi vaziyatda hech kimga kerak emas," dedi Ushakov.
U AQSH milliy xavfsizlik bo‘yicha maslahatchisi Mayk Uolts bilan suhbatda Rossiya nuqtayi nazarini bildirganini ta’kidladi.
"Men, tabiiyki, vaqtinchalik sulh bo‘yicha erishilgan kelishuvlarga izoh berdim va bu Ukraina harbiylari uchun oddiy tanaffusdan boshqa narsa emasligini, undan ortiq hech narsa emasligini aytdim," dedi Rossiya prezidenti yordamchisi.
Ushakovning qo‘shimcha qilishicha, Vladimir Putin 13-mart kuni Ukrainada vaqtinchalik o‘t ochishni to‘xtatish rejimini joriy etish taklifiga "aniqroq va mazmunliroq baho" berishi mumkin.
Intervyu davomida u AQSH kelgusida ushbu masala yuzasidan hamkorlikda ish olib borishda Rossiyaning pozitsiyasini inobatga olishiga umid bildirgan. Shuningdek, uning so‘zlariga ko‘ra, Donald Tramp ma’muriyati "Ukrainaning NATOga a’zo bo‘lishi haqida gap bo‘lishi mumkin emasligini" anglaydi.
AQSH hukumati 11-mart kuni Ukraina bilan o‘tkazilgan muzokaralarda butun front chizig‘i bo‘ylab 30 kunlik o‘t ochishni to‘xtatishni taklif qildi. Ukraina bu taklifni qo‘llab-quvvatladi.
13-mart kuni Donald Trampning Yaqin Sharq bo‘yicha maxsus elchisi Stiv Uitkoff Moskvaga tashrif buyurdi. Uning tashrifi haqida Oq uy bir kun oldin e’lon qilgan edi. U kim bilan muzokara olib borishi aniq emas edi. Ommaviy axborot vositalari uning Rossiya prezidenti Vladimir Putin bilan ehtimoliy uchrashuvi haqida xabar bergan. Yuriy Ushakov tashrif tafsilotlari haqida izoh berishdan tiyilgan.
Izoh (0)