Kreml AQSH prezidenti Donald Tramp ma’muriyatiga Rossiya tabiiy resurslari bo‘yicha kelishuvni taklif qildi, deb xabar bermoqda The Moscow Times.
Rossiya AQSH neft kompaniyalari mamlakatga qaytishi mumkinligiga ishonadi, bundan tashqari, AQSH bilan Arktikada qo‘shma loyihalardan manfaatdor, dedi Saudiya Arabistonidagi muzokaralar boshlanishidan oldin Rossiya to‘g‘ridan-to‘g‘ri investitsiyalar jamg‘armasi rahbari Kirill Dmitriyev.
Ar-Riyodda amerikaliklar bilan uchrashish uchun Vladimir Putin tomonidan tanlangan uchta delegatdan biri Dmitriyevning so‘zlariga ko‘ra, Moskva AQSH bilan iqtisodiy hamkorlikni tiklash muhim deb hisoblaydi.
Dmitriyev, AQSHning yirik neft kompaniyalari Rossiyada “juda muvaffaqiyatli biznes”ga ega bo‘lganini ta’kidlab, ular qachondir qaytib kelishiga ishonch bildirdi.
Biz qo‘shma loyihalar amalga oshirishimiz kerak, jumladan, Arktikada ham, boshqa sohalarda ham. Qo‘shma loyihalar bizga yanada muvaffaqiyatli bo‘lishimizga imkon beradi, deya davom etdi Dmitriyev.
Uning so‘zlariga ko‘ra, Amerika kompaniyalari go‘yoki Rossiyaga qarshi sanksiyalardan 300 milliard dollar yo‘qotgan, Jo Bayden ma’muriyati esa Rossiya iqtisodiyoti holati haqida “juda ko‘p noto‘g‘ri xabarlar bergan”.
Rossiya–Ukraina urushi boshlanishidan oldin Rossiyada neft qazib olish bilan faqat bitta yirik Amerika kompaniyasi shug‘ullangan: bu “Saxalin-1” loyihasining 30 foiziga egalik qiluvchi Exxon Mobil edi. Sanksiyalar joriy etilgandan so‘ng, kompaniya loyihadan chiqishini e’lon qildi, biroq ulushini sota olmadi, dastlab bu 2023-yilda sodir bo‘lishi kutilgan edi, ammo Kreml muddatni ikki marta uzaytirdi — oxirgi marta 2026-yil oxirigacha.
Urush boshlanganidan so‘ng, Amerikaning yetakchi neft xizmatlari kompaniyalari — Halliburton, Schlumberger va Baker Hughes ham Rossiyani tark etishini ma’lum qildi. Ular yordamida mamlakat SSSR qulashi oqibatida yuzaga kelgan neft qazib olish tanazzulidan keyin ishlab chiqarishni tiklashga erishgan edi. Prezident Vladimir Putin 2025-yilga qadar mamlakatda uglevodorodlarni burg‘ulash va qidirish bo‘yicha o‘z texnologiyalarini yaratishni hamda ularning ulushini 80 foizga yetkazishni talab qilgan.
Rossiya va AQSH Ar-Riyodda muzokaralar o‘tkazdi
Dmitriyevdan tashqari, 18-fevral kuni Rossiyadan Saudiya Arabistonida bo‘lib o‘tgan muzokaralarda TIV rahbari Sergey Lavrov va prezident yordamchisi Yuriy Ushakov ishtirok etdi. Dmitriyev muzokaralarni “ijobiy” deya baholadi. Uchrashuvda AQSHdan davlat kotibi Marko Rubio, Trampning milliy xavfsizlik bo‘yicha maslahatchisi Mayk Uolts va Yaqin Sharqdagi maxsus vakili Stiv Uitkoff ishtirok etdi. Ukraina hamda Yevropa davlatlari muzokaralarda ishtirok etmadi.
Muzokara 4,5 soat davom etdi. Ushakov muzokaralar samarali o‘tganini, tomonlar kelajakda bir-birining manfaatlarini inobatga olishga kelishib olganini ma’lum qildi.
Biz shunchaki bir-birimizning manfaatlarimizni hisobga olishga kelishib oldik. Shu bilan birga, ikki tomonlama munosabatlarni rivojlantirish ustida ham ishlaymiz, chunki bu Moskva va Vashington uchun birdek muhim, dedi Ushakov jurnalistlarga.
Delegatsiyalar, jumladan, Rossiya va AQSH rahbarlari Vladimir Putin va Donald Trampning uchrashuvini ham muhokama qilishdi.
Izoh (0)