Ukraina prezidenti Vladimir Zelenskiy joriy yilning 19-fevral kuniga rejalashtirilgan Saudiya Arabistoniga tashrifi kechiktirilganini e’lon qildi.
U bugungi Rossiya va AQSH rasmiy vakillari o‘rtasidagi uchrashuvdan so‘ng “tasodiflar” bo‘lishini istamasligini ta’kidladi.
U yerda kim qoladi, kim ketadi, kim qayerga borishini bilmayman. Ochig‘ini aytsam, menga farqi yo‘q. Lekin hamkorlarimiz biz haqimizda ortiqcha fikr yuritishlarini istamayman. Men tasodiflarni xohlamayman, shuning uchun ertaga Saudiya Arabistoniga bormayman, dedi Zelenskiy Turkiya prezidenti Rajab Toyyib Erdog‘an bilan uchrashuvdan so‘ng Anqarada o‘tkazilgan matbuot anjumanida.
Ukraina yetakchisi, shuningdek, AQSH va Rossiya delegatsiyalarining o‘tgan uchrashuviga izoh berib, Ukraina Rossiyaning ultimatumlarini qabul qilmasligini yana bir bor qayd etdi. U urush boshida Rossiya Ukrainaga shart qo‘yganini, xususan, Ukraina armiyasi sonini kamaytirish, hududiy yon berishlar, shuningdek, mamlakat rahbariyatiga Rossiya tarafdori bo‘lgan rahbariyatni qo‘yishni talab qilganini aytdi.
Menda shunday taassurot borki, hozir qandaydir muzokaralar bo‘lib o‘tmoqda va ular xuddi o‘sha kayfiyatda kechmoqda, ammo ular Rossiya vakillari va AQSH vakillari o‘rtasida bo‘lib o‘tmoqda. Ukraina haqida, yana Ukraina haqida va Ukraina ishtirokisiz. Qiziq, agar biz eng og‘ir paytda bu ultimatumlarning barchasini rad etgan bo‘lsak, hozir Ukraina bunga ko‘nadi, degan fikr qayerdan paydo bo‘ldi, deydi Zelenskiy.
Zelenskiy idorasi xabar qilishicha, Ar-Riyodga tashrif 10-martga rejalashtirilgan. Shu bilan birga, Zelenskiy AQSH rasmiylarini Kiyevda kutayotganlarini qo‘shimcha qildi.
Rossiya va AQSH Ar-Riyodda muzokaralar o‘tkazdi
Rossiya va AQSH delegatsiyalari Rossiya–Ukraina urushi yakunlariga bag‘ishlangan muzokaralar o‘tkazdi. Uchrashuv 18-fevral kuni Saudiya Arabistoni poytaxti Ar-Riyodda bo‘lib o‘tdi. Muzokaralar Saudiya Arabistoni qirollik oilasining Albasatin majmuasidagi saroylaridan biri — Diriya’da o‘tkazildi. Uchrashuvda Ukraina va Yevropa davlatlari vakillari ishtirok etmadi.
Muzokaralarda Rossiya nomidan tashqi ishlar vaziri Sergey Lavrov, prezident yordamchisi Yuriy Ushakov, shuningdek, Rossiya to‘g‘ridan-to‘g‘ri investitsiyalar jamg‘armasi rahbari Kirill Dmitriyev ishtirok etdi. Rossiya delegatsiyasi tarkibiga TIVning Umumyevropa hamkorligi departamenti direktori o‘rinbosari Dmitriy Balakin va Rossiyaning Kanadadagi elchixonasi maslahatchi-vakili Vladimir Proskuryakov ham kirgan. Uchrashuvda AQSH nomidan davlat kotibi Marko Rubio, prezidentning milliy xavfsizlik bo‘yicha maslahatchisi Mayk Uolts va prezidentning Yaqin Sharqdagi maxsus vakili Stiv Uitkoff ishtirok etdi.
Muzokaralar taxminan to‘rt yarim soat davom etdi.
Ushakovning ta’kidlashicha, tomonlar Putin va Tramp uchrashuviga tayyorgarlikni muhokama qilgan, biroq bu uchrashuv keyingi haftada o‘tkazilishi dargumon.
Rossiya va AQSH muzokarachilarining alohida guruhlari Ukraina bo‘yicha aloqaga kirishadi. Kim Rossiyadan muzokarachilar safiga kirishi va Ukraina bo‘yicha aloqalar qachon boshlanishini Putin hal qiladi, dedi u.
Dmitriyev muzokaralar yakunida murosa haqida gapirishga hali erta ekanini, tomonlar bir-birini tinglashni boshlaganini aytdi, uning so‘zlariga ko‘ra, “Rossiya va AQSH vakillari hurmat bilan va teng huquqli muloqot qilgan”, deb yozadi Reuters.
Izoh (0)