Isroil xavfsizlik xizmatlari G‘azo sektorida HAMAS tomonidan qurilgan yerosti tunnel tarmog‘ining chorak qismi yo‘q qilinganini ma’lum qildi. Bu haqda ibroniy tildagi “Mako” nashri hukumatdagi manbalarga tayanib xabar berdi.
Xavfsizlik rasmiylariga ko‘ra, 2023-yil oktyabridan beri davom etayotgan harbiy harakatlarga qaramay, G‘azo ostidagi tunnellar tarmog‘ining 75 foizi saqlanib qolmoqda. Biroq Isroil askarlari HAMAS jangchilari bilan yuzma-yuz to‘qnashuvlar kamayganini, ular tunnel tizimlari orqali yashirinayotganini bildirgan.
Yerosti shahri
2007-yildan buyon G‘azo va Misrning Sinay hududi orasida yuzlab kontrabanda tunnellari qurilgan. Ular orqali qurol, mahsulotlar va ayrim hollarda hatto insonlar tashilgan. Misr hukumati 2011–2015-yillar oralig‘ida xavfsizlik vaji bilan 2 mingdan ortiq tunnelni yo‘q qilgani aytiladi. Shunga qaramay, ularning katta qismi hanuz saqlanib qolayotgan bo‘lishi mumkin.
Isroil harbiylari G‘azo janubidagi Filadelfiya yo‘lagini nazorat qilishda davom etmoqda. 14 kilometr uzunlik va 100 metr kenglikdagi hudud demilitarizatsiya zonasi bo‘lib, 1979-yilgi Misr–Isroil tinchlik shartnomasining bir qismi hisoblanadi.
Yahudiy davlatining mudofaa vaziri Isroil Kats mazkur hududda bir nechta tunnelni o‘z ko‘zlari bilan ko‘rganini aytib, Filadelfiya yo‘lagi Livan va Suriya chegaralaridagi kabi xavfsizlik zonasi sifatida saqlab qolinishini bildirgan.
Biroq rasmiylarning fikricha, HAMAS harakati G‘azoni Misr bilan bog‘lovchi tunnellar qurishda davom etmoqda. Isroil kuchlari esa Filadelfiya yo‘lagini nazorat qilayotganiga qaramay, bunga to‘liq qarshilik ko‘rsata olmayapti.
Falastin Sog‘liqni saqlash vazirligi ma’lumotiga ko‘ra, Isroil G‘azoga zarbalarini qayta boshlaganidan buyon kamida 1 482 kishi halok bo‘lgan. Urush boshidan beri esa qurbonlar soni 50 mingdan oshgan. Yana 10 mingdan ortiq falastinlik bedarak yo‘qolgan va halok bo‘lgan deb hisoblanmoqda.
Izoh (0)