Isroil hukumati Falastin hududidan qo‘shinlarni olib chiqmasdan HAMASni garovga olinganlarni qo‘yib yuborishga majburlash uchun “jahannam rejasi”ni tayyorlamoqda. Bu haqda The Guardian xabar berdi.
Mazkur reja doirasida G‘azodagi qamalni yanada kuchaytirish rejalashtirilgan. Hozircha olti haftalik vaqtinchalik tinchlik kelishuvi kuchda qolayotgan bo‘lsa-da, uning keyingi bosqichi haqida muzokaralar olib borilmayapti. Shu sababli, Isroil va HAMAS yana urushga qaytish ehtimoliga tayyorgarlik ko‘rmoqda.
Isroil G’azoga oziq ovqat va yonilg‘i ortilgan gumanitar yordamni to‘xtatishdan tashqari sektorning 2,2 million aholisini asta-sekin to‘liq izolyatsiya qilishga tayyorgarlik ko‘rmoqda. Hukumat bu choralar dasturini “jahannam rejasi” deb atayotgani aytilmoqda.
Walla yangiliklar sayti xabar qilishicha, mudofaa vaziri Isroil Kats mamlakar mudofaa kuchlariga jangovar harakatlarga qaytish uchun tayyorgarlik ko‘rishni buyurgan. 5-martdan kunidan boshlab ular yangi shtab boshlig‘i general-mayor Eyal Zamir qo‘l ostida xizmat qiladi. Zamir G‘azoda qolgan HAMAS jangchilari ustidan tez va hal qiluvchi g‘alabaga erishish uchun kuchli hujum tarafdori hisoblanadi.
HAMAS ham tayyorgarlik ko‘rmoqda
Arab nashrlariga ko‘ra, HAMAS ham janglarni qayta boshlashga tayyorlanmoqda. Garovga olingan isroilliklarga nisbatan kuchaytirilgan xavfsizlik choralari ko‘rilayotgani aytilmoqda.
Ta’kidlanishicha, HAMAS urush paytida portlamagan Isroil qurollaridan yuqori portlovchi moddalarni ajratib olgan va janglar qayta boshlansa, ulardan foydalanishi mumkin.
O‘t ochishni to‘xtatish bo‘yicha muzokaralar 28-fevral kunidan beri to‘xtab qolgan. Isroil hukumati Ramazon oyi va undan keyin Pasxa bayramida o‘t ochishni to‘xtatishning birinchi bosqichini 20-aprelgacha uzaytirish taklifini qat’iy talab qilmoqda. Bu davrda garovga olinganlarning yarmi Isroil qamoqxonalaridagi falastinliklar evaziga ozod etilishi kerak. Qolgan yarmi esa urushni butunlay to‘xtatish to‘g‘risida kelishuvga erishilgandan so‘ng ozod qilinadi.
G‘azodan hali qaytmagan 59 nafar isroillik garovga olingan shaxslar bor, Isroil rasmiylari ularning kamida 34 nafari allaqachon halok bo‘lgan deb hisoblaydi
Netanyaxu yuqoridagi taklifni AQSH maxsus vakili Stiv Vitkovga topshirgan, biroq Vitkov hozircha bu haqda hech qanday izoh bermagan.
HAMAS ushbu taklifni rad etib, bu yanvar oyida o‘t ochishni to‘xtatish to‘g‘risidagi dastlabki kelishuvni buzish ekanini aytdi. Unda o‘t ochishni to‘xtatish joriy haftada ikkinchi bosqichga o‘tishi nazarda tutilgan. Mazkur bosqichda garovga olinganlarni ozod qilish Isroil qo‘shinlarining G‘azodagi strategik nuqtalardan, G‘azo va Misr o‘rtasidagi bufer chiziq bo‘lgan Filadelfiya yo‘lagidan boshlab olib chiqilishi bilan bog‘liq.
O‘t ochishni to‘xtatishning birinchi bosqichi davomidagi olti hafta mobaynida G‘azoga kuniga 600 ga yaqin yuk mashinasi, asosan oziq-ovqat va yoqilg‘i bilan, kirib bordi. Bu urushdan oldingi o‘rtacha ko‘rsatkichga to‘g‘ri keladi. Isroil hukumati hududda allaqachon asosiy ehtiyojlar uchun katta zaxiralar mavjudligini ta’kidlamoqda.
G‘azoda oziq-ovqat va ta’minot yetarli – o‘t ochishni to‘xtatish davrida haftasiga 4200 ta yuk mashinasi kirib bordi, bu ko‘p oylarga yetadi, dedi hukumat vakili Devid Menser.
U HAMASda “semizlik epidemiyasini keltirib chiqaradigan darajada oziq-ovqat borligini” aytib, “ta’minot mavjud, lekin HAMAS uni taqsimlamayapti” deya da’vo qildi. Isroil bosh vaziri HAMAS harakatini “qabul qilib bo‘lmas shartlar qo‘yish” va “insonparvarlik yuklarini o‘g‘irlash”da ayblagan. Falastin harakati mazkur ayblovlarni rad etib, buni “shantaj” deb atagan.
Izoh (0)