Isroil bosh vaziri Binyamin Netanyaxu o‘t ochishni to‘xtatish bo‘yicha muzokaralar “faqat o‘q ostida” o‘tkazilishini aytdi. U G‘azoda yuzlab tinch aholining o‘limiga sabab bo‘lgan hujumlar “faqat boshlanishi” ekanini qo‘shimcha qildi. Bu haqda Al Jazeera xabar berdi.
Netanyaxu 18-mart kuni kechqurun televideniye orqali chiqish qildi. U Isroil harbiylari HAMASga “kuchayib borayotgan kuch” bilan zarba berishini qayd etdi.
HAMAS so‘nggi 24 soat ichida kuchlarimizning og‘irligini his qildi, men sizni va ularni ishontirib aytmoqchimanki, bu faqat boshlanishi. Biz urushdagi barcha maqsadlarimizga erishish uchun kurashishda davom etamiz — barcha garovga olinganlarni ozod qilish, HAMASni yo‘q qilish va G‘azo Isroilga tahdid solmasligiga va’da, dedi Netanyaxu.
Shuningdek, u muzokaralarda oldinga siljish yo‘qligi uchun aybni to‘g‘ridan to‘g‘ri HAMASga yukladi.
Isroil prezident Trampning maxsus vakili Stiv Vitkovning taklifini qabul qilgan bo‘lsa-da, HAMAS buni qat’iyan rad etdi. Shu sababli men kecha HAMASga qarshi harbiy harakatlarni qayta boshlashga ruxsat berdim, deya hujumni izohladi Netanyaxu.
Isroil bosh vaziri G‘azodagi “barcha kutilmagan qurbonlar” uchun HAMAS javobgar ekanini da’vo qildi.
Falastinlik tinch aholi HAMAS terrorchilari bilan har qanday aloqadan qochishi kerak va men G‘azo aholisini xavfdan qochishga chaqiraman, deya ta’kidladi u.
Netanyaxuning bayonoti Isroil ikki oylik sulhdan so‘ng 18-martga o‘tar kechasi G‘azo sektoriga hujumlarni tiklagani fonida yangradi. Isroil hujumlarida 400 dan ortiq falastinlik tinch aholi halok bo‘ldi, ularning aksariyati bolalar, yana 560 dan ortiq kishi yaralandi. Falastin sog‘liqni saqlash vazirligi ma’lumotlariga ko‘ra, qurbonlar orasida 174 dan ortiq bola bor.
♦ G‘azodagi 60 ga yaqin garvovdagilarni ozod qilish va doimiy o‘t ochishni to‘xtatish bo‘yicha sulhning ikkinchi bosqichi haqidagi muzokaralar Isroilning birinchi bosqichni aprel oyining o‘rtalarigacha uzaytirishni talab qilishi tufayli boshi berk ko‘chaga kirib qoldi.
HAMAS o‘t ochishni to‘xtatish rejimi boshlanganidan beri 2 mingga yaqin falastinlik mahbus evaziga o‘ttizdan ortiq garovdagilarni ozod qildi.
Isroil hujumidan oldin AQSH prezidenti Donald Trampning Yaqin Sharq bo‘yicha maxsus vakili Stiv Vitkoff o‘t ochishni to‘xtatishni Ramazon va Pasxadan keyinga ham cho‘zishn taklif qilgandi. Taklifga ko‘ra, HAMAS mahbuslar evaziga qo‘shimcha tirik asirlarni ozod qilishi, tomonlar esa doimiy o‘t ochishni to‘xtatish tizimi ustida ish olib borishi kerak edi.
Bir necha kun oldin AQSH prezidenti o‘zining ijtimoiy tarmoqdagi sahifasida HAMAS guruhiga “so‘nggi ogohlantirish” berib, barcha isroillik garovga olinganlarni ozod qilishni talab qilgan edi. U HAMASning barcha a’zosini yo‘q qilish uchun Isroilga zarur bo‘lgan barcha narsani yuborishini qayd etgandi.
Izoh (0)